A CASA (V)

Leyer “A casa I” Leyer “A casa II” Leyer "A casa III" Leyer “A casa IV” Leyer “A casa VI”

O chicot güerto de casa teneba una poza ta replegar as auguas cuan plebeba por meyo d’una canalera en o rafil e un tubo bachante, e tamién ista bachante replegaba l’augua d’un labadero de ropa que abeba n’o clamau terrau d’alto. En ixe hortaler se teneban belunas ortalizias e bel frutal, asinas como bella parra d’ugas moscatel, e asabelas flors. En o güerto d’a Pozaca que ye chunto á dita fuén, se teneban as trunfas, en gran cantidá pos yera un güerto gran e sobrebueno, de tierra muito fértil, con 4 faxetas d’esferens grandarias an abeba una mica de tot, trunfas, fresas, tomates, chudietas, espargos, cols, berzas, borrainas, ensaladas, zebollas, allos, pepinos, calabazins, alberchenas, espinaques, algarchofas. Tamién abeba un figonero muito güeno, e un  azeitunero ta olibas d’aliñar berdas e belunas almendreras. A poza yera graniza, teneba n’o lau cucho dica un labadero de ropa, e ta cullir augua con pozals, cuan estaba plena, á o que se puyaba por una escalera de piedra cualcosa rustica, e ta o lau dreito e á ran de solero una mena de laco de ladrillos, un pozallón que cuan quitabas o tapón tenebas que meter debán d’o chorro un pozal güelto, pos surtiba con muita rasmia e te mullabas ascape. Ista poza se plenaba con a plebia e más que más cuan bachaba o ballo dende as basas de Basacól.

Bachar o ballo yera cuan mandaban l’augua ta regar os güertos e plenar as pozas, más que más en o estiu, l’augua recorreba por grabedá todas as carreras d’o lugar, por una canalizazión de piedras que bi ha en meyo d’as mesmas, e plegaba á todas as casas e güertos, por carreras, callizos e arbellóns. Regaban por turno, e ro que teneba a poza esmediada, la replenaba. Tenebas que estar al tanto en o tuyo puesto ta ubrir a talladera e zarrar-la cuan rematabas a fayena e l’encargau de riegos, creigo que gosaba estar l’aguazil, teneba que puyar ta Basacól á tallar-la.  L’augua de gasto cutián se trayeba dende a fuén d’a Plaza, a cuala plegaba allí por una tubería dende a fuén d’a Mentirosa, que asinas claman á ixa fuén que bi ha en o lugar bezín de San Pelegrín, sobre á que Alquezra tien dreitos d’emplego muito antigos.  Ista fuén yera con a d’o Barranco, tamién clamata de Monchirigüel, as dos fuéns d’augua de manantío dica que metioron as auguas e socanillatos por as casas, en l’año 60 u 62. Muitas comunadas e chornadas de duros treballos costarban, ta fer una zancha á pico e pala dende a Mentirosa dica ras basas de Basacól, e lugo dende Basacól por a clamor d’a Payuala dica ra plaza Mayor. Ixos sí que treballorón por Alquezra, faziorón o Camín de l’augua.

Ta trayer l’augua ta casa, s’aparellaba una caballería con albarda e argaderas, istas yeran de bimbre, obras d’arte d’os zesteros que güé en diya, denguno saberba fer. Aquí tenébanos a Pedro Cuello, Pedro zestero.  Teneban cuatro bagos ta sendos cántaros de uns 10 litros cadagún, e febas toz os biaches que fesen manca, dica plenar en casa todas as tinallas u atros depósitos que tenese cadagún. En casa nuestra ya tenébanos augua n’a cozina que saliba por un grifo dorau d’os antigos, porque chusto n’o piso d’alto fizioron un depósito de obra prou gran e chusto por un forau n’o solero metioron o tubo e ro grifo ta ra cozina. Pleno d’augua ixe depósito, en tenebas ta uns díyas, pero si no’n saliba por o grifo ya s’abeba rematau, e torna á carriar augua atra begada. En a escalera tenébanos una cantarera de obra n’a paret, puyando á man drecha, que se beyeba dende o patio, ya que no yera zegata, teneba baldosa n’o solero e capeban dos cántaros e una botexa e se conserbaba fresca n’o estiu.

Ta ra bodega tamién plegaba augua por un arbellón gran, que ye una canalizazión soterránea, de perén, que replegaba as auguas de filtrazións d’os güertos que bi ha á l’atro lau d’a carrera nuestra, e tamién d’as plebias, ista augua plenaba un chicot depósito de ladrillo, do se reculliba con pozals ta emplir os abrebaderos de piedra d’as bestias, u ta regar bel tiesto, u t’o güerto si yera menester. Iste depósito, cualo alazed ye a lenera d’a casa tien un forato que trabesa a piedra e sale ta o torno, denzima d’as pozas de decantazión, e se beye escurrir por a paret e si yera muita, surtiba un buen chorro e se iba plenando. Asinas mesmo, dende o solero d’o torno e dimpués d’as pilas de decantazión, se forma una cadolla e ras auguas alcuentran salita en otra canalizazión soterranea e con prou inclinazión, que trabesando tot o siestro, desaguaba en carrera Arregueses.

 (Continará…)

Fabián Castillo Seas,  Bombolón Retabillador

 

Leyer “A casa I” Leyer “A casa II” Leyer "A casa III" Leyer “A casa IV” Leyer “A casa VI”