DESTRIBUZIÓN D’AS CAMBRAS
CONSERBAZIÓN D’OS ALIMENTOS
ASPEUTOS DE TRADIZIÓN RELICHIOSA
Antis de dentrar en a casa, ya en o branquil e a frontera se pueden beyer un par de detalles etnolóchicos como serban un trucador faliforme, que segúntes o Istituto Aragones d’Antropolochia que publicó un treballo muito intresán de Pedro Colomina, Gloria Lomillos y Carlos Franco de Espés, istos trucadores fálicos son reminiszenzias d’un anzestral culto á ra fertilidá, practicau durante miles de años en a Peninsula Iberica, como demuestran Julio Caro Baroja y Ramón Violant y Simorra. Se puede leyer en a pachina web d’o IAA, que ye de libre aceso. Una zoqueta de chabalin, ta protexer a os animals de malautias, isto d’as zoquetas de chabalíns y esgarrapaderas d’esparberos u boletas ya no ye tan anzestral, pero sí que se beyen en puertas de corrals de Lezina t’alto. Uns ramos d’olibera ixutos enreligatos en un balcón, bendezitos o domingo de ramos zaguer, pa tener güena cullita á l’año benién, antimás Arnál Cabero dize que los ficaban en as dembas an sembraban trigo y luego, segando, cuan lo i trobaban aturaban a fayena un inte pa echar un trago y un padenuestro. Una carrucha ta puyar yerba t’a falsa con a que se feban ixas trenzas que se clamaban tuertas de alfalz, se feban entre dos personas, retorziendo a yerba con unos palos e se pinchaban en os maderos pa ixucar. Tamién se almira o escuto eraldico d’os Sancho pero a nusotros nunca no nos clamo a ficanzia.
Dentrando ya en o siestro, a ra man dreita, yera a estrabilla u cuadra, con dos pesebres con rastillo de fusta, uno gran enfren e un atro chicot ta ra cucha. Tres abrios podeban estar anchos, dezaga d’o rastillo se les meteba a suya comida que yera yerba ixuta e bella lata de prenso, panizo, ordio, o que abeba. M’alcuerdo que o teito no se beyeba cosa, debito a que se plenaba de tararainas grises de polbo e no s’escoscaban nunca pos creyeban que fer-lo yera malo ta ra salú d’os abrios, si lo diziban aquers lolos d’antis, tenerba que estar berdá. No creigaz que allora tenerban os bajes ista puerta de fusta con debuxos labraus, que no yeran de casa güena, allora yera ubierta de mitá entalto.
En as bancadas de piedra se teneban os aparellos d’emplego cutián, albardas, colchonetas, zinchas, morrals, cabezanas, almuazas, ramals, fagillars, etc. Tamién abeba una pallera de obra que teneba que estar plena con a palla que se feba trillando. Tamién abeba una pila de peña cuadrangular e con tapa de fusta an s’alzaban os boticos de craba ficaus en salmuera ta que no se ixucasen si no s’emplegaban por bel tiempo. Ista mesma pila s’emplegaba tamién ta parar a cal con a que se blanquiaban as paretes interiors.
Aquí tamién yera o cuarto d’o patio que se teneba zarrau con picaporte e clau pa que no dentrasen os michins u cualsiquier can, ya que en er se teneban cazuelas con a conserba en azeite, y tamién pinchaus d’os maderos ganchos de fierro e garranchas de fusta pa pinchar embutius e un guardacarne con malla y una puerta, pa tener a carne fresca, tozino y ensundia e que no dentrasen as moscas. En o solero estaba o picador de carne, un grueso tronco en bertical con a cochilla de partir carne, e belunas estraletas de man.
Dende o siestro, pasando t’o piso d’abaxo abeba dos cambras que teneban relación con a bidolla. A ra dreita yera o cuarto d’o trigo, en er s’amuntonaba o trigo al fondo cuentra a parete e o solero bien escobau. Abeba allí una zafra gran con portezuela pa salida d’o grano, conteneba ordio ta minchar os animals. Toz os animals minchaban grano, panizo en tenebanos en un regano en Faxanoria, pero no guaire. Sobre una mesa abeba almutes, fanegas, dobles, bella pala de fusta, talegas, sacos de tela, escobas, capazos.
E ta ra cucha estaba o cuarto a zafra, tamién clamau a dispensa u reposte. Teneba una finestra que daba t’o corral. En era abeba una gran zafra metalica negra, ta liquidos, pos teneba grifo de salida. Abeba tamién un banco alto de fusta, pa fer treballos d’acotraziar, martiellos, estenazas. Sacos d’arpillera grans plenos de fuellas d’olibera ixutas que minchaban bien as güellas e os coniellos. Sacos de salbau ta acotraziar as pasturas d’os tozinos. Sacos de paper con granulos u piensos compuestos, sacos de plástico de abonos.
O masador yera en o piso d’alto, allí as mullers paraban a masa pa lebar-la dimpues t’o forno común an se forniaban todas as piezas de pan que cada casa amenistaba. Cuan las meteban en o forno cada una les feba una marqueta con os didos, pa conoxer-las dimpués de forniadas. Feban una cruz, un redol, un pizco, culebreta, asinas cada muller conoxeba as suyas. Abaxo beyeremos os trastes que s’emplegaban ta ista faina. Pero ya antis se abeba feito a siega e a trilla e moliu o trigo en o Molin de Fuen de Baños, abaxo beyeremos tamién os aperos que s’emplegaban. O solero yera de peñetas enruellau pero luego s’enzementó porque yera puerco y s’escobaba muito mal. Agora solo queda un siñal pa muestra chusto en meyo.
A faina d’abentar as olibas tamién la febanos aquí, en o siestro, pero a de escoscar as almendras la febanos alto chunto a o fogaril, en una mesa muito gran que s’estaba mas caliens.
Ya baxando t’o corral en o primer rellano tenebanos a ra dreita o pozal de l’azeite, un depósito de obra an s’alzaba a cullita d’azeite de una añada ta otra, con una capablidá alto u baxo de uns 2000 litros. O que contrimuestra que l‘azeite yera asaber que importán en ista casa e que chunto con o bin e as piels de crabas e coniellos, yeran os productos prenzipals que como arrieros que yeran portiaban con una recua de tres abrios que puyaban por Sebil dica plegar ta ra Güarguera, lis conoxeban en toz os lugars, Sarsa de Surta, Cañardo, Laguarta, Matidero. U bendeban u feban trueque con atros productos, pucheros de Nabal, ferramientas, patatas. Y en iste mesmo rellano, ta ra cucha y enta ro fundo, yera o truxal, muito importán tamién pos yera an se chafaban as ugas, se conserva la estructura de piedra que puede beyerse abaxo en a bodega, a boca se perdió. En ista sala tenemos agora representata a bida cutiana con o fogaríl y as cadieras, tal y como la tenebanos alto, tamíen a cambra de matrimonio, labores de muller, y tamién a matazía.
Aquí en o siestro os oxetos que se beyen son de gran amplaria os tres, dos relazionaus con a siega, una abentadora donada por Carmen d’Aurelio de casa Juan de Colas y un trillo de discos con os zaguers alantos d’aquers tiempos, donau por Mari y Pascúal Castillo de casa Cancer. Bi ha dos forcas palleras, una gran y atra más chicota pero acotraziada por o ferrero pos le mancaba un trozo. O terzero ye un telar que se baxo d’o lugar de Guaso, acotraziau por Balbina Campo e o suyo mariu Chosé Noguero, artesanos tichidores de Balbastro. Sapemos que bi eba telars en Alquézra porque lo ize Pascuál Madoz en a suya descrizión d’Alquézra de l’año 1845 cuan siñala: Indusria: bels telars de paños ordinarios, l’arriería e ro filau de lanas a ra que s’adedican guena cosa de mullers…
A casa teneba en os baxos una cambra gran, con brenca de luz pero bella finestra chicota dexaba bentilazión, clamata o cuarto as patatas. En era s’alzaban as patatas esparditas por o solero, ta que no se florexiesen, y d’allí s’iban cogiendo á diario con una zesta ta ir gastando. Se teneban deseparatas as gordas d’as menudas que clamaban rebailaderas porque siempre rodaban d’aquí t’alla y se daban cozidas en a pastura á os tozinos. Tamién se teneban allí, esparditas as almendras una begata escoscatas, ta que perdiesen a umedá dica l’inte d’a suya benta. D’os maderos, bien probistos d’asabelos claus, ganchos y ganchez, pendeban unos luengos palos clamatos palangas, tamién palo de tomatillas, an se pinchaban razimos de tomates y ugas, prebiamén enreligatos entre sí, de icha traza teneban pal ibierno tomate pa untar y pansas.
(Continará…)
Fabián Castillo Seas, Bombolón Retabillador
No hay comentarios:
Publicar un comentario