Coroniqueta de dos luscos en a comarca d'os Ports

 21000 palabras, un capezuto e dos collons

La cinta, qui l'aigaz visto ya la conoixez e en tendrez lo vuestro criterio, amuestra la vida cutiana de Barré (Anchel Lois Saludas), el pastor belsetán, empezipiando per cómo cosira las suyas vacas e las suyas güellas, cómo triballa lo suyo huerto, cómo cudia lo mon, la vida que fa en a suya casa, con a suya mai...  

Encara que ignores de raso que ye ixo de l'aragonés, encara que te pareixca una cosa d'un mundo luen d'o tuyo, a la marcheta, Maxi Campo Clavería, lo director d'a cinta, nos va metiendo en la gran fayena de la vida de Barré, las palabras belsetanas que repleca (no s'aturau encara) e que reculle en as suyas libretas. A bonico a bonico, qui no en aiga sentito charrar de Barré e la suya fayena, como si esplevisniase, se bi mete de capeza en a suya tozolonería, te bi engarrolinas e rematas anglucionando meter-te a aduyar-lo, a colaborar en a més molimental fayena an nunca s'ha metito denguno per esfensar l'aragonés, el belsetán. 

E si lo veye chen como nusatros, que sapemos qué ye ixo de l'aragonés e miramos d'esfender-lo, la goyaremos asaberlo sintiendo la frescor d'o parlar de Barré, cómo chemina eles u enes, cómo comprendes que l'e dimpués de la r que remata los infinitivos i altras palabras, suena a muntón curta, de raso diferent a cualsiquier altra e...

Sentirez como charran de Barré e d'a suya fayena, chen como Mott (sí Bryan Mott charrando de Barré), sentirez viellismas gravacions belsetanas de Mott, chen como Gargallo (lo catedratico de Romanicas en la U. de Barcelona), Romanos, Usón... i muitos més.

Tota la cinta muestra la manera que l'aragonés (i més que més el belsetán) s'apagan, s'amortan... pero que, manimenos, Barré, mantiene la capeza bien alta e no pierde l'esperanza. Puestar pleguen neo-parlants que aduyen a salvar la nuestra luenga.

Esperanza: vista la cinta, 17 personas d'a val de Bielsa li pidioron a Barré que lis fera clases de Belsetán, chen de totas las edaz que empecipian lo suyo compromiso per salvar la luenga (e tot lo que la luenga porta con era).

La cinta e Barré (ixo diciba la chen que la vió i lo escuito ixos dos luscos) emocionan. Emocionan de veras. E yo aficho: emocionan e, encara més, commueven, mueven a fer.

Yo lo veigo asinas. Encara que... la cinta ha tenito criticas buenas e bel·lunas malas. En totas las cosas d'a vida pasa, chent que li cuaca, chent que no li choca, a uns els fa goyo, als altros no. Milanta detalles pa poder discutir-se u zaragatiar. Yo tos he dito aquí lo sentimiento cheneral que devantoron la cinta e Barré en Vilafranca e Morella (luscos d'os dias 3 e 4) e en yo. 

Cal meter ficacio tamién en a fayeta feta pel filologo valencián Salvador Pallarés, que ye la persona que, de baldes de tot, ye colaborando con Barré e ya ha dichitalizau las suyas libretas. La fayena fuerte viene luego, una fayena de 21.000 sinyoras fayenas, triballo a estallo.

E tamién cal fer ficaz d'o merito de Maxi Campo. Granizo de veras!

Un zaguer pensamiento. Barré e yo semos coetanios (yo 3 meses més viello que er), puestar ixo tamién m'influye en cómo lo veigo...

Remató la cinta e empecipioron bels minutos de batemans. No los conté, pero sé que estioron buena cosa de minutos de chent emocionata e commuesa.

JLCF, Bombolón Carboner

O FILOLOGO, A ESPOBLAZIÓN E A LUENGA ARAGONESA

D’o protagonista d’a zinta “Con la tierra en los pies”, enguerata en salas comerzials en a primabera de 2026, se diz en bel inte d’o metrache que abió de concarar tres guerras: a Segunda Guerra Mundial, con tot o que ixo implicó de contorniello interno en o suyo país, Alemania; a nuestra inzebil Guerra Zebil; e o suyo particular contorniello con o suyo mayestro en a lingüística, o que podió afeutar a ra difusión d’a suya obra.

En paralel, pero cuasi un sieglo dimpués, podérbanos dizir que ista obra zinematografica d’o direutor e guionista zaragozano Fernando Vera, ha abito de concarar tres dificultaz e no menors. Se trata, en primer puesto, d’un semi-decumental, y enguerar un documental en o zercuito comerzial ye una cosa prou complicata, que en as mías luengas añadas de zinefilia pocas begatas he beyito. Trata, antimás, d’a espoblazión, tema que puede resultar prou arido, e ta forro de bota, e como terzera e zaguera dificultá, sopre l’aragonés, u si queremos dar-li més presenzia, a luenga aragonesa, d’a que se ban sentindo curtetas conbersas u parolas, tot un logro ta ra nuestra malferita luenga.

Amanexen en a zinta importans feguras binclatas a l’aragonés, como pueden estar Óscar Latas u María Pilar Benítez, que esplanican con gran peticuaza como ro Perineu aragonés, en iste causo a redolada de Sobrarbe, se’n fue espoblando, u charran d’as andanzas d’o filologo alemán Rudolf Vilmes en as añadas 30 d’o sieglo pasato, un filologo que, -d’a mesma traza que atros lingüistas estranchers formatos en reputatas unibersidaz, como Saroïhandy u Gerhard Rohlfs-, biacheó ta intresar-se por a luenga aragonesa, -luenga que iba desaparexendo a mida que emigraban os suyos fablans-, cuan muitos li feban de menos, ya estasen espiertos u no. En o causo de Vilmes biachó ta ra bal de Bió, una d’as bals con menos recursos naturals y en do a espoblazión estió muito notable.

He comentato que se trata d’un semi-decumental e lo’n ye perque alterna eszenas de fizión -muito bien redolatas e retratatas, anque ye platero que aber o paisache d’o Perineu aragonés de trafundo aduya a conseguir ixa sobrebuena fotografía-, con eszenas tipicas de decumental como pueden estar entrebistas a esferens personaches, que se ban intercalando con a fizión. Amás d’os ya cuaternatos, bi acobaltarba ra presenzia d’o conoxito e prestichioso periodista aragonés Manuel Campo Vidal, con una bisión d’o pasato muito propia, pero tamién d’o esbenidero, e a presenzia d’a tamién periodista Elena Puértolas, como direutora d’o Diario del Alto Aragón, que esplanica de traza muito esclatera tot o prozeso d’emigrazión e o deseyo de muitos, encara que temporal, anque siga a ratos, de tornar-ie, de tornar a ixa tierra mantornata.

No xublidaré en istas poquetas linias a ra protagonista entripitata per dos autrizes, una en a etapa d’a nineza e atra en a biellera, e que da consistenzia e unidá a tota ra zinta. O trato que tenió en a nineza con Vilmes la marcó ta cutio e determinó ro suyo esdebenidero, o mesmo que determinó o esbenidero de tantas presonas o progreso e a boluntá de prosperar. Muitos joporon enta ra ziudá, e atros muitos difuera d’a suya tierra, Aragón, por manca d’oportunidaz. ¿Emigrazión u espulsión? Remeremos a iste respeuto ros bersos de Chusé Damián Dieste: ¿Qué zierzera alufradora, qué Prometeu guito, forachitó a flama d’a parentalla, enclusa rusia?

¿Estió tot isto inebitable? Cada un tendrá ra suya respuesta, pero la tendrá més alezatata dimpués de beyer ista sobrebuena e a ratos emotiba obra, que me niego a calificar nomás de decumental, pos, ¿no ye tota zinta en o fundo un decumental?

                                                                                                        Luis Gayán

IV TROBADA D’ARAGONÉS D’ALQUEZRA. CHINERO DE 2026. CORONICA CURTA

Fa ya más d’ un par de semanas que yera-nos en a Trobada d’Alquezra e ya se ye asolato o camatón d’esperienzias positibas que estoi que bi teniemos toz. 

A sensazión que atura ye a d’una Trobada más refirmata, más rica e más ubierta ta dembas  no esclusibamén lingüísticas como son as meyoambientals e as soziolingüisticas en  rilazión con atras luengas como l’euskera, antimás d’una presenzia artistica fortal. Tot ixo  continando con a línia lingüistica e literaria en aragonés e arredol de l’aragonés con a que  naxió; e con o buen ambién entre ra chen, o que alsegura un ochetibo alazetal: charrar en  aragonés con uns e con atros. 

O programa se desembolicó seguntes s’eba parato. Nomás calió cambiar o puesto de  l’akelarre dende O Mullón ta un tresaire en acullidor rinconet d’Alquezra, porque con  l’airera que feba en O Mullón no ese-nos puesto fer o fuego ta cremar-ie o poncho. Con  tot e con ixo l’esconchuro cuentra os muitos mals de l’aragonés, composato e leyito por  o Bombolón Borinero, tanimientres ardeba o poncho semontanés, estió una nobedá bien  pincha d’a que caldrá fer un costumbre en a portalada d’as beniens Trobadas. 

O biernes día 9 de chinero s’enzetó a Trobada con " Pirineu dinno”, con David Lorenz e  Laura Martín, luitadors por a dinnidá d’a montaña. 

O sabado 10 teniemos : 

De maitín: 

- Rematadura d’a esposizión “Charrar ta no callar” de Cristina Raso. Fotos artisticas  e testos bien conchuntatos en l’aragonés sopre as luengas minorizatas. Portalada  aparén en aragonés baixorribagorzano de Jorge Pueyo. 

- Rematadura d’a esposizión de l’Atelier: “Paxentando ro fuego” de Kate Buil e  “Paisaches de lana” de Teresa Abad. Arte e polideza de conchunta en as fotos de  Kate i en as obras en lana de Teresa. 

- “Inzendios forestals. Paisache y territorio” por Raúl Vicente, que zarraba o zerclo  d’o lema “Cosirar a tierra, cosirar a vida”. Esperienzias profesionals e analís d’o  contorniello sozial, ecolochico i economico d’os fuegos granizos de ué. 

- “Monzón Notizias”. Curto ganador d’o Espiello 2025, por María Garreta (Asoziazión Querim). Frescura e simpatía con ninos aprendendo aragonés en  Monzón. 

- “L’aragonés en a “korrika” 2026”. Por Ane, Lurdes e Xabi, miembros d’ AEK. Amostranza, anbiesta soziolingüistica de l’euskera e promoción de l’euskera en a  “korrika”, cursa chigán ta ra que estiaño ye conbidato l’aragonés con l’oczitano e  o bretón. 

- Bermú en o salón de plens d’o Conzello, conbidatos por l’Asoziazión Cultural  d’Alquezra. Cal cuaternar a polideza, amplaria e solennidá d’ixe salón, con as suyas istoricas pinturas murals d’o sieglo dezigüeito. 

De tardis:

- Presentazión literaria conchunta por Elena Chazal e Chuan de Fonz, con muita buena umor i en aragonés baixorribagorzano d’os suyos libros : respeutibamén, “Cuentos de la lluna nueva” e “Sobre tot no tomar mal. Historias sin solta ni  volta”. 

- “Charrando aragonés. A luenga aragonesa en a suya zona d’uso predominán”. Por  Alex Pardos: rechira de calidá en l’aria soziolingüistica de l’aragonés. 

De nueis:  

- Borina con mosica aragonesa ufrita por o bogal punchadiscos “Rasmia” en l’ inte  en o que a chen ya se relaxa dimpués d’o trachín d’o día. 

O dominche 11 nos en fuemos ta Bierxe: 

- Besita d’a ilesia romanica de San Fertús, con pinturas murals gotico-linials de  muita calidá d’o sieglo XIII-XIV.  

- Besita d’exemplars d’un molimento natural: a planda “Petrocoptis Guarensis”.  Estió enfilata por a uellada saputa de Rafel Vidaller que mos lebó ta unas rallas ta  beyer ixas alfayas. Rafel ye bombolón d’onor e taute d’o blog “Chiretas de  Marisco”, que dende aquí recomendamos ta saper más d’o “Petrocoptis  Guarensis” e d’atros intresans temas. Antimás, esplicazións cheolochicas  adizionals d’o paisache de Guara e peña Falconera, por Pau Arbués que, como de  perén, aduyan a capir o nuestro guallardo entorno natural.

En ista IV edizión d’a Trobada s’atorgó o títol de “Bombolona d’onor” a Alizia Castán,  d’o Corrinche, que tomó o nombre de “Bombolona Calçotera”, fendo-li-ie a entrega d’un  bombolonet de punto cusito en Alquezra. Bienplegata ta casa tuya, Alizia! 

En l’alpartato d’agradeximientos no ixuplidamos a denguno d’entre toz os asistens,  muitos d’os cuals ya fan parti d’o paisache d’a Trobada por asistir-ie añada dezaga  d’añada. Manimenos cal siñalar e agradexer á: 

- Toz os que esen quiesto, pero no han puesto benir-ie ista añada.

- Toz e cadagún d’os ponens. Por os temas e por l’emplego cheneral de l’aragonés  en as suyas presentazions. Ye d’acobaltar-ie a presenzia de chobens balors como  María Garreta e Alex Pardos. 

- Totas as artistas: Cristina, Kate, Teresa, por aber feito puyar o ran estetico (i etico) d’a Trobada. Á Kate Buil, antimás, por fer tan pinchos os cartels de totas as  Trobadas d’Aragonés d’Alquezra. 

- O Consello d’a Fabla, por a suya presenzia, autoridá e trayeutoria insustituyible  en a esfensa de l’aragonés. 

- Ra colla d’o Corrinche, por l’amistanza e porque astí bi son totas as añadas. - AEK, entidá organizadera d’a “korrika”, por conbidar-ie l’aragonés ta fer-lo más  bistero, e por o escamallo d’aber-se-ne amanato t’Alquezra. 

- Ra Escuela-refuchio d’Alquezra, por a suya acullita e por cudiar-nos tan bien toz  os años. 

- O Conzello d’Alquezra, por a suyo refirme fortal, aduya e asistenzia t’os autos d’a  Trobada.

Á ra fin, a chenta zaguera rematata por o té de ralla que mos ufrió Rafel Vidaller, mos  dixó a buena sapia d’a cuatrena Trobada d’Aragonés d’Alquezra d’a que marchemos toz  con ganas de tornar-ie l’añada benién, antimás de con o ricuerdo bibo d’a olibereta  alquezrana. 

Agora ye l’inte ! 

Chinero de 2026. 

BOMBOLÓN BUXO

Leyer o poema "Akelarre ta esfuriar os mals de l'aragonés"

IV TROBADA D'ARAGONÉS BOMBOLONIAR 9-10-11 CHINERO 2026

 

Trobada 2026

Programa cheneral

Biernes

Sabado de maitíns

Sabado de tardis

Dominche

Por si tos cuaca de venir-ie, serez bienplegatos!

IV Trobada d'aragonés

Diseño: KaterinaBuil

 

ALMETAS E TOTONS

Os primers días d’o mes d’aborral s’adedican t’os que ya se’n fuoron, con zelebrazions esferens seguntes as culturas e os tiempos.  Tot cambea, como de firme lo ha feito  ista fiesta añal en as zagueras decadas, engaronatos como semos por a onda atlantica d’a cultura americana e Halloween.

En o Semontano a tradizión oral chira en istas calendatas arredol d’ as almetas e os totons, protagonistas prenzipals d’a “nuei d’almetas”.

As almetas dondean con una bela en cada mano e sayas blancas. Ta aduyarlas en o suyo camín se feban orazions, toques de campanas e lifaras con chodigas. Pero sobre tot se meteban perén carabazas buedas en as que se retallaban os uellos o naso e a boca, foratos por an surtiba a luz d’a bela se que bi ficaba aintro, de nueis, como ye de dar. Iste rito semontanés no ye importato con a resta de zelebrazions de Halloween, sino que ye autoctono, e de radiz zelta u puestar de radiz romana en o Mediterranio de cultura no zelta como ye o nuestro causo, alazetato en os farols sepulcrals romanos u feralia lucem. Si bella begata tos amanaz ta Sarlat-la- Canéda en Aquitania podrez almirar a suya “linterna d’os muertos”, que feita en piedra, en estilo romanico en o canto d’o zimenterio, tiene o mesmo esclusibo fin: alumbrar as almetas d’os defuntos á trabiés d’a luz que surte por as suyas finestras. 

Os totons son guardians d’o zimenterio que leban sayons, pero istos pantasmas campan nomás con un zirio e tienen un caraúter muito más negatibo que as almetas, fendo por ixo más medrana que aqueras. Asinas, á ras presonas que no fan soziedá se gosa clamar-las “totons”. Rilazionato con iste bocable trobamos : “tutón”, “entutar-se”, “entutau u entutato”, “fer o totón” e “totoniar” fendo referenzia á o feito d’estar u bibir escondito e sin rilazión sozial.

Bi ha buena cosa de rilatos d’acontezíus con as almetas, como que diz que d’una zarpadeta de chodigas amanixeban deseparatas tantas como misas amenistaban que lis en ofrexesen. 

Por atro costato, cuan se mataba bella arrés (craba u uella) gosaba tirar-se a suya “almeta” t’os esteños, en os que se quedaba apegata. Se feba serbir ta ixo a punteta d’o esternón, que anatomicamén ye l’apendize xifoides. En Benás, seguntes rechistra Andolz, se clamaba “almeta del paripau”, sin que, ta yo lo menos, aparixca platero o sinificato de “paripau”.

Antiparti, rechistra Mostolay que o día de Toz os Santos se feban unas tortas chicotas, clamatas tamién “almetas”.

Remero bien en a mía nineza as carabazas -calaberas que ficaba-nos en puestos escuros de nueis. A fuen yera uno d’os preferitos, por a escureldá e porque de seguras que bi acudirba ra chen a escar augua, cuan no bi’n eba corrién. 

Dimpués, en a telebisión de blanco e niero, empezipioron con a turruntera añal de “Don Juan Tenorio”, obra que nunca no se fartaban de chitar-la, tanimientres que nusatros sí de beyer-la.

Á ra fin plegó Halloween, que a suya estetica de “zoombies”, mesmo sendo estrania ta ra nuestra cultura tradizional, ye firme arradigata en as nuebas chenerazions. Con Halloween, en un biache de “tornachira”, son ritornatas t’a Europa as carabazas iluminatas que surtindo dende Irlanda e Ingalaterra eban plegau t’os U.S.A.

Ye de siñalar que en Raiquero-Alquezra encara zelebran a “nuei d’almetas” con almetas, totons e carabazas iluminatas, albirtiendo á os besitans que “ixo no ye Halloween” e agradexendo-lis que no i baigan disfrazatos. 

Cal adempribiar os nuebos costumbres, pero ixo sí, deixando bien platero que as carabazas iluminatas, encara que no esclusibamén, son nuestras e aquí bi yeran muitismo antis de plegar Halloween. Con tot e con ixo, ye de dar que con Halloween as carabazas-calaberas tienen muitas más probalidaz de continar esistindo.

Aborral de 2025.

BOMBOLÓN BUXO

MARE NOSTRUM. MAR D’OS NUESTROS

Feba tiempo que no beyeba a mar e fa poco que bi estié, nomás dos dietas, en a “Costa Daurada”

Fa goyo beyer a mar, sentir-la e dixar que as suyas ondas te faigan fiestetas en os piez. Enfrontinato ta era, a suya grandaria te fa saper o chiquirrins que semos. S’amuestra como o que ye, una esprisión fortal d’a naturaleza. Ixa que, seguntes os clasicos, yera composata de cuatro componens: augua, aire, tierra, fuego.

Imachen de "Miami Turismo", Conzello de Mont-Roig

A mar Mediterrania ye una mar espezial. O Mare Nostrum que libró a zibilizazión greco-romana. A mar almogábar sulcata en a edá meya por as galeras costruyitas en as “drassanes reials de Barcelona” en a que, seguntes l’almirán Roger de Lauria, dica os pexes teneban que lebar en o lumo o “sinyal reyal d’Aragón”.

Una mar de plachas d’arena fineta, emplitas ué de toristas e de restaurans de gustoso minchar.

A mar á ra que Serrat adedicó dos cantas inixuplidables: “Mediterráneo” e “Plany al mar”. 

Una mar que, tanimientres te dixas embazilar por a suya polideza e por o suyo son, conbida a escubrir bel poema de Salvador Espríu, u a tornar á sentir as cantas de Serrat.

Una mar que as suyas ondas te fan mirar-te-las “anar i venir sense parar” entremistanto que o suyo remor te fa sondormir con l’esmo alticamato por que la tiengamos feita “una claveguera”, un socanillato. Una mar feita ué foscor de fosal, que os suyos “ploros eternos” se fan autuals por os migrans que bi s’afogan e por a mortalera en as suyas espuendas orientals, en Gaza. 

Una mar que dezaga tiene una tierra emplita de sarratons, selbas, oliberas, biñeros, árbols fruiters e bodegas mudernistas que s’asemellan a catedrals. E que conserba a suya luenga. 

Una mar e una tierra que, ta yo, fan que te trobes como en casa tuya.

Mayo de 2025

BOMBOLÓN BUXO

DEBINIDÁ AUSÉN

Antismás tenebas un tron en cada casa,

en a banqueta de foratos perén luziba bella bela.

Denzima d’a biella limonda un rolde de santos alufraba

os trangos perditos por o corredor e as cambras silenziosas.

Ers yeran os nuestros aponderadors con Tú,

os ministros tuyos en as casas nuestras.

Antismás os ombres e as mullers co Tú charraban,

rezando á ra suya traza, enta Tú s’enfilaban,

por cualsiquier nesezidá: l’orache, as cullitas,

a salú d’a parentalla, dica por o bestiar te demandaban.

 

Güé ya no fican en as dembas a branqueta d’olibera bendezita,

ya no se besa o pan en replegar-lo d’o sulero.

¿Se fa talmén bella cruz en o calibo cuan truena,

u creyes que bellas presonas encara rezan en misa?

Bi abrá sequera anque se faigan robatibas,

si ha d’acantaliar, profes que lo ferá.

¿An yes amagato con o tuyo luengo silenzio?

¿Talmén yes acoflato en bella boira e sondormito?

Ubre os tuyos güellos e alufra o nuestro nabesar solencos:

Á begatas somos igual como ninos con chuguez nuebos,

e n’a nuestra macatrulla melampería nos parixe

que tenemos un chicot dios drento de nusotros,

más no t’alticames por ixo, millor, imple-te de goyo,

pos beyes que á ra tuya semellanza queremos bibir.

 

Perditas son as nuestras orazions e rogarias,

estricallata a nuestra fe e a nuestra pazenzia,

entremistanto Tú, puyato yes denzima d’un peirón,

igual como un estilita solenco e encantanau.

 

Bombolón retabillador        

ESPOSIZIÓN “ARIAS LINGÜISTICAS D’ARAGÓN E DE L’ARAGONÉS” A BARCELONA

Entre es días 30 de chinero e 14 de febrero ban tenir la enchaquia de poder parar a Barcelona la esposizión “Territorios lingüisticos d’Aragón e de l’aragonés”, espentada per la Unibersidá de Zaragoza con el refirme, encara, de la Direzión Cheneral de Politica Lingüística e enfilada per Francho Nagore. Debán de la imposibilidá d’instalar-la a’l Centro Aragonés, la esposizión ba trobar cado a’l primer piso del Pati de Lletres de la facultá de filolochía de la Universitat de Barcelona, grazias a’l refirme d’el catedratico José Enrique Gargallo.

A la debantadera, el presidén d’el CAB, Jesús Félez, ba dar la benpllegada a es asistens y ba informar de la situazión de l’edifizio de la carrera Joaquín Costa, a l’aspera de las obras de remodelazión. Dimpués de la introduzión de Pau Arbués en nombre de la colla O Corrinche e las parolas de José Enrique Gargallo, ba ser Francho Nagore, enfilador de la esposizión, qui mos ba amostrar de traza prou pllatera el suyo conteniu: un panorama basau en la cheografía lingüística an Francho ha parau eixempllos de bocabulario en el territorio aragonés, en relazión con la extensión d’aragonés, castellano d’Aragón e catalán d’Aragón, parolas trestalladas en güeito grupos diferens seguntes las suyas estensions. Pa fer-lo s’ha basau en datos aportaus per es atlas lingüisticos ALPI e ALEANR e atras fuens como las repllegas de Rafel Vidaller sobre bocabulario relazionau con la naturaleza.

El resto de días la esposizión ba tenir prou besitas e ba fer naixer l’intrés per parti d’estudians de filolochía e publlico en cheneral, seguntes mos ban dir José Enrique Gargallo e Felis Fanlo, treballador PND de la UB, estudián d’aragonés e miembro de la colla O Corrinche, a més de sobrino d’el tamé conserche de la unibersidá e escritor tensino Felis Gil d’el Cacho, qui tamé ha feit parte de la reedizión de la suya obra.

En plegar el 14 de febrero, es benticuatro panels de la esposizión  ban tornar cara ta Uesca ta poder seguir la suya ruta per llugars e bilas d’Aragón. Muitas grazias, Francho e Maite, ¡benbenius un biache més a Barcelona e dica més beyer!

[Alberto Lamora]