A CASA (III)

Leyer “A casa I” Leyer “A casa II” Leyer “A casa IV” Leyer “A casa V” Leyer “A casa VI”

Cuan abeba almendrada, en Setiembre, imos dito que escoscábanos alto n’o minchador, en una mesa gran, á begatas chuntando dos mesas, tapadas por unas mandiletas, se estendillaban as almendras, un saco u dos denzima d’a mesa, e toz aposatos en sillas u drechos arredol d’a mesa, ibanos quitándo-les as cascas, ramillas, fuellas, que cayeban ta debacho d’a mesa. Astí remaniban buena cosa de días, e se formaban unos montons an que nos rebulcábanos á chugar dica que bel cortapichas nos se meteba entre a ropa. Á l’otrol día, güellábanos debacho d’a mesa e contimparábanos os borguilez de unos e d’atros ta beyer quí eba escoscato más e quí menos, yera como un chuego, pero siempre ganaba l’agüelo Fabián, qui s’aposaba en a capezera d’a mesa, amán d’o fogaríl. As almendras escoscatas s’espardéban bel tiempo en o cuarto d’as almendras, (que yera o mesmo que o d’as patatas ya nombrau) ta que se ixucasen, as que no se podeba porque yerán zarratas de raso, s’escaldaban en un balde e dimpués con una naballeta s’ubriban á man, e ro lulo tamién se quitaba á man con o martiello, como ye de dar. Ya en zagueras se tornaban á ensacar ta ra suya benda. Siempre s’alzaban bels sacos ta o gasto de casa, más que más ta fer-las rustidas, garrapiñatas, e con bresca e azúcal o turrón de Nabidá. 

Cuan as olibas, abiento u chinero, os sacos aguardaban en o siestro, i eba que fer-lo antis de que chumiasen por o fundo a umedá de l’augua que siempre conteneban. Si se pasaban muito tiempo en os sacos, a ra fin s’amasegaban. Dimpués de plegar d’o mon, se paraba l’abental, un traste que pesa prou e que abeba que bochar entre dos u tres. O nuestro yera de bariellas de fierro, en abeba atros de cañas. Nusotros lo pinchábanos en l’arrancadero d’a escalera, ligato con una sogueta en o primer barandau, e debacho d’er s’estendillaba un mandil ta replegar as fuellas. Una begata bien escobau o solero, se feba un redol con mandils u sacos enrrollatos ta que no se’n salisen as olibas, e con un capazo, l’agüelo Fabián e o suyo fillo Fabianer, o mio pai, uno por cada lau, eban escargando ras olibas en á parte altera de l’abental, e os demás achinollatos alredol d’o redol, ébanos quitando ras fuellas que plegaban t’o solero. Ascape se feba un muntón tarcual d’olibas e a yo me cuacaba o rudio que feban al redolar por as bariellas, e engalzar todas as fuellas e rametas yera un chuego ta nusotros. A l’otrol día s’ensacaban con aduya d’una pala, dica o día que nos tocaba o torno, ta fer a moltura. 

Por ixos días, as mullers replegaban olibas ta fer-las apañadas con sal, as panseñas yeran as millors, pero tamién s’apañaban de neral, que son más gordas, pa negras, e pa berdas tenébanos un azeitunero en o güerto d’a Pozaca, que las feba gordas tamién, e s’amortaban con augua e sosa. Como se teneba tamién tomate en conserba, con zebolla e olibas, tenebas l’apañijo, complemento perfeuto de chentas e brendas. Cuan se remataba de cullir as olibas, se feba a fiesta d’a rematadura, ixe día en o món os cullidors feban rudio con o palo-gancho chirando-lo muito aprisa entre os baroz d’a escalera, e tamién pinchaban un ramo que estase bien cargau, en a rella d’a finestra d’a armita San Antón, pa dar grazias á Dios e demandar-le olibada á l’año benién. Se conbidaba á minchar á familiars e amigos, e se feban de postre crespillos, tiernas fuellas de borraxa rebozatas en una pasta de farina, güebo e azúcal e freyitas en azeite. 

En a falsa s’alzaban tuertas de yerba ixuta ta ros animals, en Faxanoria u Nacargüela se teneban belunas faxas d’alfalz u pipirigallo, plandas forraxeras, que ixutas minchaban en ibierno ro ganau. Se feban dos u tres tallos á l’año, allora plebía muito más que no agora. Dimpués de dallata, se dixaba unos días en o món á enxugar e xoriar-se, e lugo s’engabillaba e se feban faxos, ligando-los con benzellos, ta carriar-los con as caballerías. Se escargaban debán d’a puerta casa, e con a carrucha se puyaban á ra falsa, una presona alto en o bentanal e l’atra abacho engafetaba o faxo e tiraba d’o ramal e cuan plegaba t’o bentanal a presona lo pillaba con a man e lo meteba dentro a falsa, e los esligaba y espardeba ta ixucar-sen. Lugo, entre dos presonas e con l’aduya d’un palo, se trenaban e quedaban pinchatas en os maderos d’o teito, ta minchar os animals en ibierno. 

A falsa teneba bentanals, tanto debán, norte, como dezaga, sur, con buena bentilazión. Tamién se pinchaban d’os suyos alteros teitos, as piels de coniellos, crabas, bella rabosa, que amortaban e dimpués de ixutas las bendeban.  Tamién a lana d’esquilar bella güella, dimpués de labada se ixucaba denzima de cañizos, e as mullers filaban con as ruecas chobillos de fina lana, ta lugo techir pialucos u tricoz. Cuan se culliban as figas e figons, a ra fin d’agosto e setiembre, se meteban a ixucar á o sol denzima d’un cañizo, u dentro d’un porgadero boca arriba, d’ista traza tenebanos figons dica nabidá, teneban que estar sanos e con o rabillo sin quitar. A falsa tamién yera o puesto d’a casa an que iban á parar os oxetos que ya no baleban pa cosa.

(Continará)

Fabián Castillo Seas, Bombolón Retabillador

Leyer “A casa I” Leyer “A casa II” Leyer “A casa IV” Leyer “A casa V” Leyer “A casa VI”