A CASA (II)

Leyer “A casa I” Leyer "A casa III" Leyer “A casa IV” Leyer “A casa V” Leyer “A casa VI”

En ista mesma cambra, dentrando a ra cucha, bi eba un rezipién d’obra clamato o zenizal,  como d’un metro d’altaria, an s’alzaba a zeniza d’o fogaríl.  Ista s’emplegaba dimpués ta fer leixiba e blanquiar os linzuelos, mesos en un cuezo gran e remullaus con augua, se tapaba ra boca d’o cuezo con bel trapo que feba de colador, e se plenaba de zeniza dica arriba d’o cuezo, ta dimpués chitar amonico augua calién sobre a zeniza, yera desinfectán e blanquiaba, e tamién se chitaba en o güerto de casa como fiemo.

D’o mesmo teito se pinchaba tamién bella garrancha con rastras d’allos, coraletas. Como ista cambra yera gran, se teneban tamién sobre unos maderos ficatos en a paret toda mena d’aperos de man, ixadas, ixadicos, estrals, estraletas, dallas e dallons, forcas de fierro, pa sacar o fiemo d’a zolle u d’o siestro, ya que as güellas e crabas, pirinas, aucas e coniellos campaban por an quereban. De firmes estacas ficatas n’as paretes, pinchaban grans manullos de benzellos, ramals, faxillars, zinchas. Por bel cantón s’acantonaban trastes como cuebanos, canastas, zestas, corbillos, mandils. En o lau drecho d’ista cambra d’as patatas, se ubriba, como á un metro d’altaria d’o solero, una chicota finestra que daba trango á un gran trastero, bazibo pa atros emplegos  por o suyo eslibel, s’alzaban en dentro d’er toda mena d’oxetos que perdeban a utilidá. No bi eba luz e cuan de chicoz dentrabanos con una lampa á refitoliar, salíbanos aluzinatos de tanto traste raro, tot amuntonato allí con polbo e tararainas:  Cabezeros de camas de fierro, de fusta, chergons, mesillas, biellos lababos con espiello, xarras, palanganeros, biellas maletas, bauls, arcons, baldes, pozals, sartens, calderos e asabelos pucheros e cazuelas de bardo, muitas cazuelas meyo crebatas nos feban buena onra ta ras cucañas d’o día d’a Fiesta Mayor, meteban dentro carambels, cosas de chugar, bolsas de patatas, de pipas, chicles, e tamién bel coniello bibo, e toz querebanos pillar o puchero d’o coniello, pos lo te lebabas ta casa ta minchar.

O panizo se pinchaba n’os baroz d’os balcons e miradors, dica que cubriban tot  con pinochas, enreligatas una con atra por a fuella ixuta que teneban de coda, se pasaban entre os baroz e quedaban pinchadas ta ixucar-sen. Se beyeban muito politos os balcons tot amarillisco, e os gurrions tamién se fartaban de minchar-ne. Dimpués se iban espinochando e se daba de minchar con er á ras pirinas, aucas, coniellos, e meso n’a zebadera de bella caballería. 

Ya imos nombrau dinantes o Pozal de l’azeite, depósito de piedra e talochato interior de cheso, cuala suya boca de carga se sitúa chusto antis d’o cuarto as patatas, á ra dreita, an se beye á trabiés d’un cristal de seguridá o suyo interior que tendrá unos tres metros de fondura, con puerta de fusta, con barra de fierro ta poder-la zarrar ta que no cayese broza, a caldereta con enganche e ramal ta puyar l’azeite pos abeba que fer-lo á brazo. Cuan se beye dende abaxo iste depósito, as paretes de piedra e sobre un plano de zemento as letras F C, e l’añada 1933. L’azeite pasaba á rezipiens más chicoz, como tinallas e pilas de piedra ta o suyo gasto, e á ra fin se meteba n’os boticos de perello craba con un embasador gran ta o suyo trasporte enta atros lugars, d’o Mesón de Sebil t’alto.

Asti mesmo, á ra cucha, s’ubriba a parte superior d’o Truxar, an se pisaban as ugas d’a bendema, sobre uns tablons mesos en paralelo e aposatos sobre a boca d’o mesmo, que tenerba alto u baxo 2 metros por atros 2, e una fondura de entre 2 u 3 metros. Una begata bien chafadas, se chiraban os tablons ta que as brisas cayesen t’o fondo d’o truxal, que yera recholato, as cuatre parez e o fondo con unas losetas royas de zeramica, de unos 30 x 30 cm. Iste truxal teneba en o suyo fondo no más que un forato de salida, de fusta clamato xeta, por o que surtiba o mosto ta un rezipién de piedra clamato laco, an se meteban os pozals de zinc que se iban plenando ta dimpués ir plenando as cubas. As cubas teneban una bentaneta con tapa pa plenar, e pa sacar-lo teneban un tapón de fusta o un grifo. A tapa de fusta achustaba mui bien, pero la sellaban con cheso pa que fermentase millor e se faziese buen bin. Bi eba tamién un depósito de obra con boca de carga más gran, de fusta, e un grifo gran de salita, en er se meteban o mosto con as brisas, tot chunto, cuan se quereba fer bino tinto. 

A limpieza d’o truxal se feba baxando con una escalera de fusta e sacando todas as brisas con una forca de man, e plenando canastas. Istos repuis yeran formatos por as barrascas u rametas d’as ugas e ros borfollos, as pelletas d’os granos, tot bien chafato, se mezclaban con o fiemo d’o siestro, e tot remataba como fertilizán natural pa os mons. Asinas quedaba presto dica l’añada benién. En a bodega se teneban cubas pa o gasto de casa e uno pa o binagre, que se iba replenando con bin desamorau, u que se poneba agrio. D’as cubas clamatas madre, se sacaba o bin pa o gasto á barrals de beire forratos con caña e bimbre, con dos ansas pa o suyo manullo. Os trasiegos d’o bin se feban de perén en mingua, pa que no se malmetiese. De no fer-lo asinas, o bin se tornaba agrio. Bi eba que bochar-lo o menos posible, no trucar as cubas ni fer rudios estridéns amán d’ers.

Tamién se teneba en a bodega una pila de piedra con tapa de fusta, ta alzar azeite, unas palluzas d’esparto ta alzar a sal e a saladera d’os xamons.

 (Continará…)

Fabián Castillo Seas,  Bombolón Retabillador

Leyer “A casa I” Leyer "A casa III" Leyer “A casa IV” Leyer “A casa V” Leyer “A casa VI”