A CASA (IV)

Leyer “A casa I” Leyer “A casa II” Leyer "A casa III" Leyer “A casa V” Leyer “A casa VI”

Abacho n’o corral, chunto a puerta d’o güerto, bi eba una zolle gran, en á que se teneba a berra de cría, a suya misión yera librar os gorriñons, que gosaban estar cachiladas prou lumerosas, pos en libraban diez u doze, e ébanos de meter ficanzia pos en podeba chafar belún con as suyas patas. Días antis a berra bi eba estau berronda, e tenébanos que lebar-la t’o masto que yera en Raiquero, en casa Gorgonio. O trayeuto se feba china chana por a carretera, a mía mai debán, clamando-la gula gula, e fendo rudio con un pozal con un siñal de panizo, e atro dezaga con una bareta d’arrear, e muita pazenzia, pero se feba por o maitino e á minchar ta casa. En unos días, cuan t’abisaban tenebas que tornar á buscar-la ta Raiquero ya empreñada. Aquer berraco yera una bestia impresionán, se sentiban os gruñitos dende a carretera cuan teneba fambre. A berra nuestra tamién yera grandaz e bibíba en a zolle más gran, teneba un minchadero de obra, mitá drento, mitá difuera, asinas no teneban que ubrir a puerta ta dar-le a pastura, u o que le chitases, minchaba de tot, e no solo que berde, una begada engalzó á una pirina espiguardata que s’eslizó drento d’o bazión e no dixo ni as plumas, os tozinos minchan de tot.  Atra begada a mía mai curó á un gorriñón que abeba naixiu sin de forato n’o forón, e no cagaba acordis, asinas que con unas esticheras li fazió un tallo chicorrón e li ubrió ro bodillo, con micromina lo untaba toz os días e salió adebán, lugo lo dixamos pa casa. En o cuarto d’as ferramientas d’agora, tamién abió zolle, ta un par de berros d’engorde, con a fin de fer a matazía en ibierno, e dentro d’o Torno, ta ra drecha, dos zolles más, chicotas, antis de escubrir o solero de piedra, e as pilas de decantazión e a prensa, que beyébanos cuasi enronada d’un mezclaizo de piedras, tierra, enruenas e l’augua que siempre plegaba de filtrazións dende os güertos e carrera d’alto, enfilada por dos arbellóns, uno gran e un atro más chicoz. Grazias á iste sistema de replegar as auguas, o pozo tenió augua en o suyo fundo, dica ras añadas 60, augua fresca, p’abrebar as bestias, grans u chicas, refrescar ortalizias, beberzios, etz. Teneba un ramal ligau á una anilla fixa alto, e pa meter as cosas un saco d’arpillera, u una zesta ligada en a punta, amos, que no en teneba de carrucha. Ista augua se perdió dimpués de meter l’augua corrién por as casas e os socanillatos. Por ixas añadas plebeba muito. E a resta d’a cachilada se bendeban á bel gorrinero que beniba con un cambión.

A zona d’o Torno allora ta nusotros yera cualcosa esconoxito de raso, sentíanos charrar d’er, “no dentréis t’o torno que tos podez cayer”, tien un bentañón con rella, pero os bentanicos estaban zarraus, e pa dentrar teneba una puerta encastrada en una paret de piedra rematada por faxos d’olibera ixutos, igual como una xarmentera, pero ixos faxos yeran muito biellos. O ruello de molturar, de grandaria prou gran e muito peso, se trobaba difuera, á canto d’a paret, allí drecho, siempre bi eba bella craba puyata en er, prenendo ro sol e remugando. E ro sulero redoncho con a canalizazión de piedra entretallada d’una pieza en a mesma lenera, en do ixe ruello treballarba antismás, asinas como ras escaleretas pa baxar e ras pilas de decantazión e ra prensa con ixas piezas de fusta queradas por o paso d’as añadas, estiorón ta nusotros cualcosa prou importán, ta refirmar-nos en a ideya d’o museyo etnolochico, una casa que teneba un torno d’olibas de piedra no yera cualsiquier cosa.

Dende o siestro, por un baxador á ra cucha de amplos rellanos se baxaba t’a Puerta Falsa, una gran puerta de dos fuellas que daba salita ta carrera Arregueses. Ista dentrada se zarraba por  dentro con un gran zerrullo e una tranga trabesera ficada en unos foraus d’a paret.  Dende ista puerta dica ra puerta d’o güerto, e dica ro fundo d’o torno, que conserba un gran pesebre, yera o espacio d’o corral, por an campaban á l’archa todas as bestias, dende bel par de güeis, u machos, dica ras güellas, crabas, coniellos, aucas e pirinas.  Tanto ro teito d’a zolle d’a berra de cría, que yera gran, como as parez d’o güerto e d’Arregueses, estaban cubilatas por muntóns de faxos ixutos de brancas de bribar os arbols, clamata xarmentera, fendo un entrepuz prou gran pa que dengun animal eslampase d’allí. Una begada beyé á ra mía mai con un gran auco que abeba pillau en un brazau e con unas esticheras en a man, e me dizió que lis retallaba ras alas á os más  grans porque bella begada, li se’n abeba eslampau beluno bolando. Atra begada una locada de patez que adormiban á ran d’o solero, en bel cantonacho, una rata los amorto á cuasi toz. Asinas que o mío pai mandó fer un piser á os piqueros con unos maderetes e machimbrau entre o solero e ra clamada Galería d’abacho, que estió acotraziada pa tener allí os coniellos, pos á begadas as cachiladas yeran acotoladas por bella ratuzia. Allí se disposaron bellas conielleras, e se zarró tot con puerta, finestras e mallas metálicas.

D’as crabas tenébanos lei, e cuan libraban, minchábanos requesón con azucal bel día. Os crabitos s’amortaban pa carne u se bendeban. Pa cubrir as crabas se lebaban t’o buco, o macho cabrío, que solo en teneban en belunas casas. As güellas iban con o rabaño común e abeba un pastor que soltaba toz os días. Cada casa teneba una siñal pa conoxer-las, por un regular yeran tallos en as orellas, tamién cuan iban esquiladas les se tintaba a lomera con follín, u con pentura roya. Os corderos s’amortaban pa carne u se bendeban. Bella cordera se dixaba pa criar.

(Continará…)

Fabián Castillo Seas,   Bombolón Retabillador

Leyer “A casa I” Leyer “A casa II” Leyer "A casa III" Leyer “A casa V” Leyer “A casa VI”