Á ro luengo d’a bida as zercunstazias te leban a fer escubrimientos, son ixas situazions an as estrelas fan conchunta, ta que te clame o ficazio bel aspeuto totalmén desconoxito dica allora.
Isto me pasó a yo en zagueras de ro año pasato, mi mai, que ye una mincha libros, en ixas embueltas leyeba LA MUJER SIN NOMBRE, de Vanessa Montfort, 2020. E no dixaba de charrar-me d’o intresán que yera ro libro... tanimeintres leyeba iba contando-lo-me , ye a biografia de Maria de la O Lejárraga, muito intresán, me deziba... una muller escritora naxita en o zaguer terzio d’o sieglo XIX e que desembolicó a suya trayeutoria literaria en primeras d’o sieglo XX, con a unica e gran zercunstazia que yera o suyo marito qui siñaba as suyas obras.
En primeras d’iste año cuan paré cuenta d’as nominazions á ros premios Goya 2022 d’o zine español, cuala estió a mia sospresa qu’en a categoría á millor pelicula decumental, entre as zinco nominatas, yera un decumental tetulato A LAS MUJERES DE ESPAÑA, MARIA LEJÁRRAGA compartindo nominazions con: El sostre groc (o teito amariello), Labordeta, un hombre sin más, Oswal, El falsificador, Sintiendolo Mucho. Pocas begatas he tentito tantismas ganas de beyer undecumental... e ista begata bi’n eba dos que no me podeba cazegar, uno yera Labordeta un hombre sin más (encara no ro he beyito, ¡ya me fa duelo!) e l’otro yera o de Maria Lejarraga.
¡E cuan digo que as estrelas s’achuntan ye berdá!, una ye muito friki con isto d’as zeremonias d’entrega de premios d’o zine... ¡qué le imos a fer... basemias que tiene una! O dia d’antis d’a zeremonia d’entrega d’os Goya, fendo zaping en a telebisión plegue ta Canal Sur (canal que no beigo mai) e resulta que iste documental ye feito en a Comunidá Autonoma Andaluza. E con ista enchaquia en a bispra d’a zeremonia ro chitaban por a telebisión. ¡Dica en orario de plena audienzia¡ Estió a primera begata que beyeba yo Canal Sur... En iste inte me dizié ta yo mesma... cal conoixer a bida d’ista muller, e dende allora soi en ixe propósito. ¡ Atra basemia ta yo...!
 |
| Imachen de @collagesxrach |
Tos presiento á Maria de la O Lejárraga (San Millán de la Cogolla, La Rioja 1847). Naxita en una familia acomodata, sendo nina marcho con á suya familia ta Carabanchel bajo, ya que su pai, medico, exerzió a merezina en Madrid. Estió su mai qui s’ocupo d’a educazión d’os suyos fillos, personalmén, seguindo modelos franzeses.
Maria cursó estudios en l’Asoziazión para la Enseñanza de la Mujer, an se trobo con as ideyas pedagochicas d’a Instituzión Libre d’Enseñanza. En zagueras d’o sieglo XIX remató os estudios de Comerzio, estando a primera profesora d’anglés en a Escuela d’Institutrizes e Comerzio. Cursó Machisterio en a Escuela Normal de Madrid, cuan yera estudián estió en o Congreso Pedagochico Ispano-Americano an refirmó as tesis d’Emilia Pardo Bazán. Mayestra entre 1897 e 1907, en 1905 estió becata en Belchica an conoxió os sistemas educatibos d’iste país, as Casas d’o Lugar e por tanto as tesis sozialistas.
Cuentos breves estió á suya primera obra (1899), sin de muito esito, isto e ro feito de ser mayestra, la empento á amagar-se dezaga d’o nombre d’o suyo marito, Gregorio Martinez Sierra. Escribió en esferens rebistas literarias muito populars en ixas enbueltas como Vida Moderna, Helios (1903- 1904) que cual a fundó chunto Juan Ramón Jimenez, de qui yera muito amiga, en a quel publicoron tamién, Emilia Pardo Bazán, Antonio Machado, Jazinto Benavente, os Chirmans Quintero...; Renazimiento (1907). Chunto á ras suyas inquietudes literarias, Maria yera poliglota o que ra lebo á fer traduzions d’o anglés e d’o franzés.
Dixó estar ra dozenzia t’adedicar-se á ra literatura, a suya obra Canzión de cuna (1911) estió premiata como a millor obra de teyatro d’a temporada 1910-1911 por a Reyal Academia Española. Una bentena d’obras representatas en Madrid entre os años 1929-1931 yeran de Maria. Fazió chiras por Franzia, Estatos Unitos e Latinoamerica.
En 1913 o matrimonio conoxió a Manuel de Falla en Paris, e cuan tornoron ta Madrid encomenzipiaron una serie de colaborazions chuntos, en 1915 estrenoron El amor brujo con musica de Falla e libreto de Lejárraga en o Teatro Lara.
Gran autibista feminista, con as ideyas plateras de que as mullers en a soziedá se desembolican arredol de dos aspeutos, o secso e a clase sozial. A maternidá e ro domestico como temas binclatos á ra indibidualidá femenina como ziudadana de pleno dreito. En 1914 publica Cartas á ras mullers d’España, e Feminismo, feminidá e españolismo en 1917. Formó parti d’asoziazions feministas. En 1920 estió delegata d’España en o VIII Congreso d’a International Suffrage Aliane an colaboró en a redazión de una carta de dreitos femeninos, reconoxiendo a igualdá política, administratiba e zebil d’os dos secsos á ran nazional e internazional. Autibista de ra Soziedad Española De Abolizionismo. Yera una escritora de zurdas que ya no bibiba con o suyo ome, peren mas preocupato por o esito comerzial.
Chunto con Victoria Kent e Zenobia Camprubí, entre otras, fundoron o Lyceum Club que presidiba Maria de Maeztu.
S’afilió á o Partito Sozialista en 1931, encomenzipiando a suya labor propagandista republicana con ziclos de conferenzias, en as cuals esponeba os aspeutos d’o nueu rechimen, chitando difuera os miedos que poderba aber bi-ie, fundamentalmén os relichiosos. Promobio chunto a Pura Maortúa e María Rodrigo l’Asoziazión Femenina de Educazión Zebica, en a cual intentó a renobazión teyatral con a creyazión d’o Club Anfistora, dirichito por Pura Maortúa e Federico Garzia Lorca en 1933.
Estió eslexita deputada d’o Congreso de ra Republica por Granada e designata bizepresidenta d’a comisión d’Instruzión Publica. En 1936 estió en Suiza como Agregata Comerzial d’o ministerio d’Agricultura, Industria e Comerzio. En 1937 cesó d’as suyas funzions en a secretaria d’a delegazión gubernamental española cuan bi abió a sutituzión de Largo Caballero por Juan Negrín en a chefatura de gubierno, feito que orichinó ra suya marcha ta Niza, e cuan remato a Guerra Zebil s’esilió enta Franzia, Mexico e Argentina.
Escritora muito prolifica, en teyatro, nobela, conferenzias ... desembolicándo como tema prenzipal en os suyos escritos, o que calerba que fesen mullers t’albandonar as balors tradizionals; libretos musicals en colaborazión con Usandizaga, Joaquin Turina, Manuel de Falla...
 |
Imachen de @collagesxrach
Maria publicó as suyas memorias en l’año 1952 en Buenos Aires, Una mujer por caminos de España, an mos amuestra a situazión d’a muller en ixas enbueltas dende a suya conzenzia feminista e sozialista. |
En o año 1947 cuán s’amortó o suyo marito, d’o que yera deseparata dende 1922, a filla d’o suyo marito e actriz Catalina Bárzena reclamó os dreitos d’autor, Dende allora, Maria encomenzipió a siñar as suyas obras con o nombre de María Martínez Sierra.
Lejárraga s’amorto en Buenos Aires (Argentina) en o año 1974 á ros 99 años.
María: literata, mayestra, congresista, autibista feminista... Muller no reconoxita como muitas atras que a istoria no a meso en a suya chusta balura. Una istoria feita por omes ta omes, dixando enta o canto a muitas mullers que desembolicoron a suya trayeutoria profesional á o mesmo ran que l’ome más erudito.
Bombolona Panzargüala
