Boira yes tu

O suyo mostacho yera niero. No pas blango, no pas d’a color d’a ballueca dulza u sisquiera blanquiñoso. Niero; yera niero como un tizón. Ixo sí, cuan s’empliba de bel suco gasioso li se ficaba en os morros una esbruma blanga que feba pareya con as camisas que gosaba lebar. Uei yera uno d’ixos días: camisa blanga, un ordio par d’atro e l’ancón ficato en a barra de cualsiquier tabierna que estase en o camín que esnabesa a ziudá dica ra suya casa. Dimpués, profes, tornar zanconiando con l’esmo meso atra begata en o suyo treballo.

Boira yera un xorigué prou normal. No guaire gran e una mica solenco, cuasi esbarrainato. Acarrazaba os beires como si tenese as garras de un pardal e teneba un fosco e zerrudo tapiz griso por pelo. Os suyos uellos yeran como caparras e a coda luenga como as suyas nueis en as tabiernas. Con o mostacho tañeba, cuan no teneba atra cosa que fer, sonitos que parixeban l’imno d’a interpresa do treballa dende fa trenta añadas. Ta par d’alabez encara no yera plegata á ra direuzión ixa rata puerquiza clamata Rátinger. Ixa rata prenzipió fendo mandaus e agora yera o chefe de tot un imperio. Boira cuasi se arreguiba cuan remeraba que el no eba puyato de puesto quinze añadas guallardas. Totas ixas añadas fazioron que Boira estase farto. Asinas que prenzipió á creyar un plan: acotolar á Rátinger.

Anque estase cabo de semana, Boira yera de piez muito lugo. O zielo s’enzarraba acompañando asinas as ideyas de iste chicorrón pozal d’odio con garras. Por aintro, prenzipiaba á estar una rata e no podeba aturar o rebullir que feba que os suyos uellos no dixaxen de estar royos en cuentas de nieros. ¿Cómo podeba estar que ixo que tantismas begatas eba aborrezito estase agora a suya presona? Talmén as lurtes de treballo eban feito una foz en a suya capeza pero, en beras, yera porque Rátinger prenzipió en a interpresa por recomendazión de Boira e agora li feba denteras que iste estase o chefe. Inbidia; buen mal iste.

Perén yera canso d’o treballo, pero cuan plegaba enta casa no dixaba de beyer Netflix e cualsiquier bideo en Youtube que relaxase a suya capeza. Con tot e con ixo, e anque eba beyito muitas series d’asasins, no sapeba cosa de como poderba fer-lo. Á tamás d’ixo, teneba ficato á Rátinger como una malotía que no podeba abentar-la. Paró un cuitiello, a naballa d’os fongos, un mallo no guaire gran, una liza e un punchón. As ferramientas yeran prestas pero caleba saper l’inte en o cualo podese enrestir. Bien, sapeba que o guardia no rechiraba en a suya mochileta porque yeran compañers de chimnasio, asinas que podeba dentrar con o trango de un onso. Dimpués puyarba t’o cobalto, do yera o despacho de Rátinger, e... con a enchaquia de demandar más diners por o suyo treballo, trucar-le a capeza como si estase un ferrero. Rai! Yera de buen fer.

Luns. Boira yera muito metodico, asinas que teneba a ropa e a mochileta prestas con tot o que amenistaba ta prenzipiar una nueba bida. Enfiló ro camín t’o treballo con a uellada tresbatita e a capeza plena de ideyas que no aturaban sisquiá un inte. Yera prauticamén un zombie, pero uei yera con firme rasmia e sapeba que eba estato un zombie trenta añadas, no agora. Yera a primera begata que eba dezidito a suya bida. Asinas que marchaba entadebán goyoso de prexinar o suyo esdebenidero. Dillá, luen en a carrera, se amagaba o edifizio d’o suyo treballo. Yera un chigán que aguardaba minchar xorigués como Boira toz os días. Ixe edifizio perén teneba fambre. Cuan Boira plegó ta ra dentrada retaculó un inte, puede estar que por medrana, pero ro guardia-mixino lo saludó con una riseta que empentó á Boira enta o suyo quefer. Boliche, o guardia, no dizió cosa porque a uellada de Boira lo deziba tot e tamién quereba un mundo sin Rátinger.

Puyaba e puyaba ixas escaleretas t’o suyo zielo como si no tenese corazón. Rechiraba en os buedos corredors por si alcaso, pero denguno quereba uei estorbar en o suyo proposito. Bien; yera plegato. Prenzipió á trucar a puerta barruntando l’auto e, cuan Rátinger ubrió a puerta romanzeando, debantó l’ancón e malló no más una begata a capeza d’o suyo chefe. Cuan Rátinger cayió enta o sulero, chusto en ixe inte, cuan a bida de Boira poderba estar atra... Boira dispertó.

Rátinger, con a suya cara de carnuz, yera debán d’a mesa de Boira. Estió rechirando en as pochas prebando de fer rudio dica que Boira ubrió os uellos e no enzertó á dezir atra cosa que:

–Bai! Atro día más en l’ofizina.

Bombolón Borinero, Rubén Clavería Luna

  

"Cualsiquier ofizina", Bombolona Naval