EN A BODEGA DE CASA MÍA

 Ye una tardi d’a sanmiguelada. Ha plevito en o maitín. Ascape s’enzetará á vendemar.

Astí bi soi yo, zarrando o cerclo en a bodega de casa mía, con un vaser de vino viello d’o tonel que se s’inauguraba cuan naxeba un ninón en una casa semontanesa. Que iste de 1986 ye de l’anyada d’a naixencia d’o mío fillo. Ritual de fertilidat, ye de dar, celebrato con vino, como cal.

Igual como muitas atras cosas d’antis más, ista mena de vins rancios no son ué guaire apreciatos por as chens d’agora. Los trovan aspros, recios, masiato cereños. E puestar que lo seigan, pero a suya polita color trasparent, o suyo esprito e as suyas connotacions los fan especials. Son vins amán d’os de consagrar u comulgar, que ye o que, de bella traza, femos os que en bebemos. Comunión con a casa, a cultura e os nuestros devanpasatos. 

Toz os vins, iste tamién, cal gustar-los, si puestar, en a mesma bodega. Astí amuestran millor tota ra suya sapia, en integración armonica de continent e contenito. Tanimientres en tasto un gotet, aguaito arredol e veigo os pilars d’a casa d’o sieglo decigüeito. O laco e o cubo enronatos pero encara presents e reconoixibles. Os tonels e botellas, d’os que tos poderba contar a suya historia, aduyato ixo sí, por o banquer de Yeba d’o patio, que ye o más saputo en istas custions. Tos remeraz de cuan baixaban os montanyeses a mercar vino d’o Semontano?

Foi memoria d’os tiempos d’as cuadrillas zorrupando por as bodegas, capins u meyo capins. Tardis e nueis bullaticas e barafundieras de vins, tortas e cantas. Tamién d’o present, d’o tiempo d’a fiesta en o verano con as rondas e a choventú d’a casa espleitando d’as nuestras radizs. 

Agora en un silencio d’agüerro, a bodega aparenta más un puesto sacro, un templo de Baco cristianizato convenienment. Una isla de tranquilidat an, luen d’os trachins d’o mundo, no se bi siente cosa. E fa goi aturar un ratet. Como deziba Carbonell: he sapito que o puesto an que se ye naixito ye o millor ta escansar-se. Pos ixo ye o que foi, de muito buen implaz.

Irremediablemet s’en viene ta l’esmo ro trunfo d’o tiempo, que fuyindo s’eslampa como un eslambio. Manimenos, encara tenemos l’inte present, e ye de dar que bel futuro, antis de que plegue l’hivierno.

Sanmiguelada de 2024

BOMBOLÓN BUXO