As fornigas e o mundo d’a mirmecolochía

 Toz aguardamos a primabera por unas cosas u atras, pero ta os que somos afizionatos á ra mirmecolochía prenzipia una d’as millors estazións t’os nuestros quefers. Bai, ¿que no sapes o que ye a mirmecolochía? Rai, yo, dica bien poquet, tampoco no. Pus ye bien fázil; a mirmecolochía ye a parti d’a zoolochía, más que más d’a entomolochía (que ye o estudeo d’os inseutos), que estudea ras fornigas e o suyo desembolique en cualsiquier aspeuto. Pero tot ixo no más lo fan os que sapen, yo tiengo fornigas en casa e las cudio, que ya ye prou.

¿Por dó prenzipiar? Bien, as fornigas perén han estato unos d’os animals más misteriosos ta yo. Encara remero cuan yera en o recreyo de parbulos e me enrestioron milentas d’ellas. No por ixo determiné de acotolar-las, a o ravés, se posoron en a mía capeza como un animal fetiche. Perén prebaba de no chafar-las por a carrera e, en cualsiquier inte que podeba, me aturaba ta desfrutar-las. Os suyos mobimientos, as colors... Tot yera polito en ellas. Agora ya de gran me cuaca leyer sopre as espezies, os suyos comportamientos, e más que más, acucutar-las e cudiar-las. Ta esplanicar o que tiengo en casa calerba esplanicar a formazión de una colonia de fornigas:

As colonias prenzipian con os buelos nunzials. Isto se produze sobre tot en primabera pero bi ha muitas espezies que fan os buelos en atrás estazións (más que más en agüerro) anque, ixo sí, cuasi denguna espezie los fan con os fortals fredos d’o ibierno. Istos buelos los fan as alaicas. Istas son fembras, clamatas prenzipesas, e os masclos, que son os zandangos. En istos buelos, e dimpués de fer l’auto sexual, as fembras se tornan en reinas e s’encarnan preñatas ta tota ra suya bida. Nunca no amenistarán a compañía de más masclos. Bien que fan. Dimpués as reinas se rancan as suyas alas e rechiran o millor puesto ta prenzipiar a formazión d’a suya propia colonia. Puede estar que siga o sulero, un tocón, un tarugo, baxo un cantal... Pende d’a espezie pero puede estar que a reina no torne á salir-ie mai d’o suyo forniguero. Más tardi, e tamién pendendo d’a espezie, no meterán os suyos uegos dica dimpués de bels meses. Ixos primers uegos estarán de creximiento rapedo, asinas poder estar naxitos antis con antis t’a aduyar á ra reina en os primers intes d’a formazión d’a colonia. Podrán beyer-se as primeras fornigas fillas d’a reina en 20 diyas alto u baxo dimpués d’aber meso ros primers uegos. Cal remerar que a reina, si ye claustral (isto ye que no torna á salir-ie), puede estar sin de minchar bels meses e estar firme feble. Belunas aprobeitan á minchar-se as suyas alas ta tener una mica de fuerza. Por ixo amenista l’aduya antis con antis. Cal remerar tamién que totas as fornigas fillas d’a reina son fembras. No más meterá masclos cuan a colonia siga matura. Ye a reina qui eslixe cuán meter masclos e lo fa metendo uegos batuecos. Se claman uegos aploides e tienen no más un unico conchunto de cromosomas (como ros espermatozoides u os obulos d’os seres umanos, no pas ya ras presonas). D’istos uegos no fecundatos naxerán os masclos, cualo ochetibo ye preñar á una fembra e amortar-se. Cosa más. E asinas se torna t’o rolde d’a bida. Os masclos preñarán á fembras, istas ferán as suyas colonias, que meterán uegos, que crexerán...

O naximiento d’una forniga ye espeutacular porque fan metamorfosis. Prenzipian estando uegos, dimpués se tornan en larbas e dimpués en ninfas. Iste prozeso de metamorfosis poderba durar dende tres u cuatro semanas enta dos meses alto u baxo.:

Tener fornigas en casa no ye fázil. Cal saper a espezie e que cadaguna puede tener esferens cudiatos e alimentazión. Por ixemplo, yo tengo seis colonias de cuatro espezies esferens: Messor barbarus, Camponotus cruentatus, Lasius niger e Crematogaster scutellaris. Belunas amenistan más umedá, atras menos, unas minchan grano, atras minchan atros inseutos (por ixo tamién tiengo cucarachos e cucos)... ye un mundo. Ixo sí, mai mai mai cal xublidar-se de que están seres bibos e cal respetar-los.

Uei he fablato no más una mica d’istos politos animals pero, si tos parixe, atra begata podérbanos fablar d’a suya fisonomía u d’o suyo caráuter, porque... ¿de cuala traza alenta una forniga? ¿Pueden haber más d’una reina en un forniguero? ¿Dó biben? Y ye que... las miro e las miro e, en beras, quererba estar una forniga.

Bombolón Borinero, Rubén Clavería Luna