BASEMIAS ENTRE LUSCO E LUSCO

 Caye o lusco mientres esmicazo as pinochas xutas,

debanto os güellos d'o corbillo e alufro l'orizón royenco.

Amonico o granizo parpiello se ba zarrando

y en breus intes a nuei nos embolica. 

Dende iste biello balconacho, tron an yo m'acoflo,

embazilato me quedo debán l'amplismo zielo.

¿Será berdá que iste chigán uniberso 

encara contina en espansión inrematable?

Beigo esnabesar o Tiempo bueito, sin de roidos ni cosa,

solo que o mixín boboniando me s'encaragola entre as garras.

Me pregunto á qué belozidá biachamos por o espazio

e si emos d'arribar ta bel puesto lexano.

Me'n dentro con o mixín á fer a zena e prexino

si bel día no nos estamparemos en cualsiquier cantón

de belatro uniberso de por asti difuera.

¡Bai chiquer, dixa-lo estar!, me digo,

maitín lis ne daré o panizo á ras pirinas

si Dios nos ne quiere dar un atro día.

Fabián  Castillo , Bombolón Retabillador