BASEMIAS DEBÁN O ESPIELLO
Amo a polideza d’una muller choben
Que decanta ra suya güellada,
En as quedas auguas d’un ibón en primabera,
U que alufra con malinconía l’orizón,
Como si estase a zaguera begata que lo fa.
Amo a suya imachen esnabesando ros fenals,
Replegando ababols entre as ordieras,
Alufrando a naturaleza con güellos retiláns,
En ixas oras d’a tardada cuan o sol se decanta
E con panda angunia entre boiras royas s’esmorteze.
Amo a suya güellada embelecata
Debán o espiello d’a suya cambra,
Alufrando-se en silenzio o suyo cuerpo espullato,
Polita imachen d’a chobentú que encara güe poseye…
Pero en beyer as flors machurritas denzima d’a limonda,
Un esconorto embadexe os suyos pensamientos,
Por ixa trista zertitú que era adebina,
E que en o espiello l’amuestra a suya umana biellera.
Fabián Castillo Seas (bombolón retabillador)
No hay comentarios:
Publicar un comentario