EN A BODEGA DE CASA MÍA

 Ye una tardi d’a sanmiguelada. Ha plevito en o maitín. Ascape s’enzetará á vendemar.

Astí bi soi yo, zarrando o cerclo en a bodega de casa mía, con un vaser de vino viello d’o tonel que se s’inauguraba cuan naxeba un ninón en una casa semontanesa. Que iste de 1986 ye de l’anyada d’a naixencia d’o mío fillo. Ritual de fertilidat, ye de dar, celebrato con vino, como cal.

Igual como muitas atras cosas d’antis más, ista mena de vins rancios no son ué guaire apreciatos por as chens d’agora. Los trovan aspros, recios, masiato cereños. E puestar que lo seigan, pero a suya polita color trasparent, o suyo esprito e as suyas connotacions los fan especials. Son vins amán d’os de consagrar u comulgar, que ye o que, de bella traza, femos os que en bebemos. Comunión con a casa, a cultura e os nuestros devanpasatos. 

Toz os vins, iste tamién, cal gustar-los, si puestar, en a mesma bodega. Astí amuestran millor tota ra suya sapia, en integración armonica de continent e contenito. Tanimientres en tasto un gotet, aguaito arredol e veigo os pilars d’a casa d’o sieglo decigüeito. O laco e o cubo enronatos pero encara presents e reconoixibles. Os tonels e botellas, d’os que tos poderba contar a suya historia, aduyato ixo sí, por o banquer de Yeba d’o patio, que ye o más saputo en istas custions. Tos remeraz de cuan baixaban os montanyeses a mercar vino d’o Semontano?

Foi memoria d’os tiempos d’as cuadrillas zorrupando por as bodegas, capins u meyo capins. Tardis e nueis bullaticas e barafundieras de vins, tortas e cantas. Tamién d’o present, d’o tiempo d’a fiesta en o verano con as rondas e a choventú d’a casa espleitando d’as nuestras radizs. 

Agora en un silencio d’agüerro, a bodega aparenta más un puesto sacro, un templo de Baco cristianizato convenienment. Una isla de tranquilidat an, luen d’os trachins d’o mundo, no se bi siente cosa. E fa goi aturar un ratet. Como deziba Carbonell: he sapito que o puesto an que se ye naixito ye o millor ta escansar-se. Pos ixo ye o que foi, de muito buen implaz.

Irremediablemet s’en viene ta l’esmo ro trunfo d’o tiempo, que fuyindo s’eslampa como un eslambio. Manimenos, encara tenemos l’inte present, e ye de dar que bel futuro, antis de que plegue l’hivierno.

Sanmiguelada de 2024

BOMBOLÓN BUXO

"Sientes?" Revista de l'Asociación Campo

O 29 de setiembre ye a calendata d'o primer numero d'a Revista de l'Asociación Campo 

Parabiens!             

 

Audio - RECLOXIDOS, CHEMECOS Y RECHITOS de Francho Rodés

Poema Primer

Poema 17

Poema 19

Poema 32

leyitos por David, o Bombolón Laminero            

Audio - BARUCAS DE MEYANUEI, de Chusé María Guarido

Fragmento de ra obra Barucas de meyanuei" 

leyito por David, o Bombolón Laminero

A SELBA SONORA

 PERÉN ENTA DEBANT¡

En istas embueltas que mos tocan que vivir, bi ha chent que nosmás preixina en fer a tana¡ de cualsiquier traza.

Una d’istas trazas ye fer a tana alrredol d’a cultura. Ta ers no ye bueno ixo de refirmar-la cultura. No más ye cultura a que a ers les cuaca, as demás trazas de cultura no i son mereixedoras do refirme d’as institucions. Como os festivals… Periferias¡ o primero en suprimir-se, dimpués de que estiese una referencia en o suyo ambito.

Bien se vale que bi ha otra chent que chita enta debant iniciativas esferens, enriquidoras, que meten en valura trazas sosteniples de fer as cosas. Meten en valura a cultura feita como cal fer-la.

Dimpués de muitas añadas cuasi no soi conszient d’o que yera acudir ta un festival de mosica. Ya soi biella ta campar por ixos puestos, as garras no me marchan… dimpués de treballar  cal marchar?  Tot isto me rondiaba por a capeza antis d’endrezar cara ta Mozota.

Ta tornar a redolar por o mundo d’os festivals hemos eslechiu “EL BOSQUE SONORO”. Muita buena elección, se fa en Mozota, un lugarón d’a provinzia de Zaragoza, con alrredor de 130 presonas. Istas chents prexinoron que ta luitar  en cuentra d’a despoblación caleba fer un festival de mosica. 

O bosque sonoro encomenzipió en meyo d’a pandemia, d’a man de tres vecins d’o lugar, con una intención integradera e recheneradera. Con a dinamización cultural e revitalización d’o monecipio rural como ochetivo prencipal dende a prespectiva sustenible, rispetuosa e vertebradera d’o territorio.

Como parti d'o suyo compromiso con a preservación d'o meyo ambiént, dende 2020 por cada dentrada vendida en o festival e a traviés d'a plataforma Tree-Nation, plantamos un arbol en arias afectatas por a perda de selbas. Ista mida esca contribuyir á ra restaurazión d'ecosistemas vulneraples e fomentar a sostenibilidá ambiental. Creyén firmemént en a importancia d'ista acción e animan  a toz os asistents a unir-se a ers en iste esfuerzo coleutivo.

Ista añada ha estau os días 7-8-9 de chunio, izen que será ra zaguera vegata que se fa en Mozota…  Han estau tres días muito pretos d’autuacions. Bi’n abió de totas trazas, ta chent muito esferens :

• Dia 7 biernes: Tulsa, Luz Casal, Rodrigo Cuevas, Zimentiendo Djs, Lord Sassafras. EL bosque sonoro Djs.

• Dia 8 sabado: Depedro, El Kanca, Rocio Márquez & Bronquio, Dj. Pendejo, Rialto Dj & Héctor de a Puente Vj, El bosque sonoro Djs.

• Dia 9 domingo: Amaral, las Odio, Miriam Bronski, Ms. Vondisko, Barbara Gartland, El bosque sonoro Djs.

Chiquetas¡¡¡ ista bomobolona no mas estió ro biernes, duelo me fazió no acudir-ie a resta de días. Dende Zaragoza marchemos ta Mozota en un bus d’istos que claman agora “lanzadera”, en bi-eba de ida e de güelta ta Zaragoza, ¡o millor ta no conducir¡,  a escape estiemos en a chopera… un paisache bucolico. 

 

A organización perfeuta, o lugar muito pincho, a chent, a mosica … tot estió a ra altaria d’as espeutativas. Nusotras bi yeranos ta veyer a Luz Casal e  Rodrigo Cuevas, que ya los conoxebanos, nos trovemos con o descubrimiento de Tulsa, nos ferba muito goyo que o suyo esdevenidero en mosica seiga parellano á o d’as atras dos  estrelas á ras que prezedioron en o eszenario. 

O festival teneba que rematar o dominche con Amaral como buena rematadera. Pero a mala suarde que l’orache faizó que O Bosque Sonoro rematar-se antis con antis. O que agora claman DANA, a mañanada d’o domingo, un burz deixó abadinau o puesto an se feba o festival e no bi abio denguna traza de tornar-lo a fer. Más de 100 litros d’augua …

A organización ye fendo una replega altruista de diners ta fer frent a ras perditas, encara podez colaborar!

  Iste nomás ye una contrimuestra d’as cosetas que se puen fer. Cal refirmar a cultura, NO ME CANSARÉ DE CHILAR-LO¡¡¡¡¡ en cualsiquiera d’as trazas de fer-la. Ta que degún festival retacule, ta que a chent qu’esparde as subvenziones gosen fer-lo con talento…

Levo dende primeras d’o estiu escribindo iste chicorron debuixo,  e plegando a ra fin d’o estiu, contino en o mesmo puesto. M’amaneixen en o tozuelo imachens que s’han desemboicau … de gota traza coderén, puestos esferens, mosicas esferents, chents esferents… E perén plego nomás a una cosa platera. Que cuán más esferens son as presonas, os puestos, as mosicas… muito más enriquidor ye tot o que mos acarraza.

Bombolona Panzargüala        

Á ORMINO TORNO T’AS REMERANZAS

 

Me cuacarba abitar en solencas armitas,

talmén tenerba que aber estato armitaño:

cosirar as imáchens, os tellatos, mientres o díya,

e rechirar en a nuei os lexendarios lecos.

¡O sí, entre biellas parez, entre peñas con mensaches,

u mesmo en alteras cadollas con anzestrals pinturas!

¡ Si podese aturar o Tiempo acabacasas

que sin de piedá nos ranca ro más quiesto!

Aturar, sí, e mesmo tornar-me-ne entazaga,

reprener a historia de nuebas, escribir-la

diya á diya, trango á trango, parola á parola,

y estar testigo asinas de tanta chen olbidata,

de tanta identidá perdita en o camín.

Quererba ascuitar as bozes, os ploros, os chalfegos,

As carrañas d’os biellos á ra catrinalla.

As albadas, os danzes, as mazadas,

as parolas d’os chobens festellando.

Quererba estar un follet peligarzero,

e bibir os intes machicos que yo querese:

Bibir asinas ixos maitins de berano

cuan prenzipiábanos á trillar en a era:

As primeras tornadas perén emozionans,

pos bi eba mar furo e ondulán

y ébanos d’amparar-nos con rasmia

d’estribor u de babor, u d’o mástil

d’as fortals  garras d’o mío lolo.

Estar un ninón caganiedos morgalloso,

plorando porqué belún l’ha feito momos.

Estar un mesache con a delera d’as cazatas,

parando zepos bel maitín de boira preta,

e sentir os ditals encheberditos

cuan ficaba o leremeco en o ganchet.

Pero calla, pobre soniador estalentato,

O Tiempo furtador cosa no perdona,

e as presonas  no somos de puenda

igual como as estazións que perén i tornan:

A nuestra puenda ye solo que una,

e un prenzipio tiene e una fin.

Asinas que rebella d’ixa trista basemia

que tiens de rechirar os intes ya bibitos,

que ni un trango entazaga emos á dar.

 

Fabián Castillo Seas                                

Poema 14 de Basemias d’un campasolo                                 

A CASA (VI)

Leyer “A casa I”    Leyer “A casa II”    Leyer "A casa III"    Leyer “A casa IV”    Leyer “A casa V”

Puyando as escaleras, en o primer sulero yera o minchador, e á ro fundo, y estallau por un tabique con baco gran ta dentrar, o fogaríl, a chaminera del tipo franzes, á ra cucha, sin plegar t’o fundo, bordiata por cadieras, bancos, mesas luengas e curtas, sillas d’anea, repalmadors plenos de pucheros, azeiteras, cazuelas de fierro, pucheros d’arambre, e por o sulero estrebedes ta sartens, estraudes ta pucheros, fierros guardapucheros, fuelles ta escatizar as flamas, estenazas, ezt. e pinchau n’os cremallos bel caldero, que gosaba emplegar-se á diario ta cozer a pastura d’os cochíns. Ye dizir, o puesto más importán d’a casa, o más calién, o más confortable, más que más, en ibierno e cuan s’amortaba ro cochín, que yera un diya espezial. E chusto dentrando n’o minchador, á ra dreita, abeba una cozina con una gran enzimera con dos poziellos, e un grifo por an nos plegaba l’augua d’o depósito ya nombrau dinantes, o cualo, cuan yera pleno, tenerba alto u bacho uns 200 litros, ista fregadera desauguaba por un tubo t’o corral. Ista cozina teneba tamién una coziniella económica de leña, probista de forno an se feban os pastiellos de calabaza e mantecaus pa nabidá, e depósito de augua calién. Aquí se chuntaba  ra familia á ra chenta de meyodiada, e tamién ta ra zena, e ras mullers aguardaban a plegata d’os ombres d’o mon,  azacanadas en as suyas fayenas de casa, que nunca no remataban. O gran fogaríl  yera del tipo franzes, adosato á ra paret, e sobresalindo a suya bancada e estructura cuadrangular de fierro, arqueyato n’as suyas caras laterals e frontals. Probisto de repisa decoratiba e puyándose dende ista, con forma troncocónica dica ro teito. Teneba un cremallo de dos ganchos á esferéns altarias, una bacha ta caldereta chicota, e atra más altera ta caldero de fer o mondongo, tortetas e morzillas. Iste cremallo pendeba d’un gran madero cruzato entre os muros, e n’a bancada teneba un fierro guardabrasas e tamién una simple barandilla n’os laterals.

Á ra cucha d’o fogaríl abeba una mesa de obra, e n’o suyo baco s’alzaban tozas de leña chicotas bien talladas, en cabeba güena cosa. Á ra dreita, abeba una cobileta n’a paret, mui bonica, an o lolo alzaba o que trayeba n’as pochas, naballas, a petaca, bella  almendra, as claus, os mistos, e ya se quedaba posau n’a cadiera á escansar. Y en ixe cantón, arrancaban un par de cadieras mobibles e dos bancos de fusta que rodiaban una mesa prou luenga que yera en o zentro, pero que se mobeba á conbenienzia.

Dende o minchador por una puerta con cuatro beires, se saliba ta o clamau terrau d’abacho, que teneba en primeras un espazio cubilau dica o fundo, an teneban á ra cucha una chicota cambra, clamata d’as almendras, n’a que s’espardeban as almendras escoscadas dica que se bendeban, e lugo pusiorón una cama an adormiban os lolos en os suyos zaguers años, e dimpués atro en forma de terrau escubilau, mui solanero. Chusto en iste terrau, á o fundo, se ubicaba l’escusau, un cuartichón d’un metro cuadrau con puerta e un banco de obra con un tubo de porzelana trococónica, que teneba tapa de fusta con ansa. Iste escusau teneba una finestreta  ta dentrada de luz e joriau ya estaba prou, más que más en ibierno. O paper estaba pinchau en un gancho fino ficau n’a paret, yeran retallos de periódico u d’estraza. Os escrementos cayeban ta ra parte trasera d’o corral, cuatro metros abacho, tot mezclau en un borguil de tierra e fiemo. O terrau yera pleno de tiestos con toda mena de flors, abeba cheranios, calas, clabeleras, asinas como muita albaca pal berano.

En ista sala cubilada, no más dentrar se beyeba n’o sulero recholau un curioso forau de uns 5 u 6 cm. de diámetro que trabesaba a rechola e toda a reziura d’o sulero, e á trabiés d’er se beyeba abacho o corral. Iste forau yera ta pasar un ramal ta pinchar o cochín o diya de matazía. En o terrau se tendeba a ropa, e tamién treballaba asti o pelaire cuan teneba que fer u acotraziar bel colchón de lana.

(Continará…)

Fabián Castillo Seas, Bombolón Retabillador

Leyer “A casa I”    Leyer “A casa II”    Leyer "A casa III"    Leyer “A casa IV”    Leyer “A casa V”