ENTIBOS DE VEIRE

  Yéranos en o sieglo XX cuan a provincia de Uesca se plenó d’entibos en puestos an os suyos vecins tenioron que albandonar as suyas casas deixand as suyas vidas, as suyas casas, as suyas memorias, as suyas trazas de vivir-ie… 

Bi ha muitos entibos como:

• LANUZA (21/01/1978 os zaguers vecins albandonan o lugar).

•  YESA con os puestos de RUESTA, ESCO, TIERMAS (istos d’a provincia de Zaragoza en as 

  añadas 60 albandonan os lugars).

• A PEÑA (13/09/1913 se fació a devantadera).

• CHANOBAS chunto con LAVELILLA e LACORT  (os  Garcés que estioron os zaguers vecins 

  en deixar a suya casa lo facioron en l’añada 1984). 

  Bien se vale que dimpués de muito luitar, no se plego a fer, sin de reblar, continan entadevant

   ta que Chanobas torne a ser o lugar que estió.

• O entibo d’o GRAU (1969 se remato a suya construcción) con o lugar de  LIGÜERRE D’A 

  CINCA, MORILLO DE TOU, 1968 cuan se fació o 

  engrandamiento d’o entibo de MEDIANO. En iste se  remato d’abadinar o lugar o 29 d’abril de 

  1969 cuan encara os vecins yeran aintro d’as suyas casas. 

• BISCARRUES, BARASONA… e atros entibos muito chicorrons …

 O entibo de MEDIANO ye enclavato en termino monecipal d’o monecipio d’a Fueva. Ye un puesto privilechiato d’a comarca d’o Sobrarbe, en o sur de Sierra Ferrera, muito amán d’a comarca d’a Ribagorza, e no más a 11 km de l’Ainsa, A Fueva ye a mayor plana de Sobrarbe. Forma parti d’o Cheoparque mundial Unesco Sobrarbe-Pirineos.

S’esparde en una superficie de 230 kilometros cuadrados con una población de 600 habitans. Os lugars i son entre os 620 e os 800 metros d’altitut sobre o ras d’o mar, sendo no más Troncedo o que ye más altero a 1008 metros. Forman parti d’o monecipio una ventena de lugars u nucleyos habitatos sindo Tierrantona a cabecera e o lugar de servicios.

O desmbolique principal d’as chens d’ista val s’alacetato e contina fendo-lo en l’agricultura e a ganadería. Asti se cria o “laton d’a Fueva.

Actualment en istas zagueras añadas, s’han incorporato muitos aloxamientos turísticos.

En o municipio d'a Fueva se fan presens, destacatos e variatos paisaches interiors. O mazizo calcario d'a Peña Montañesa e Sierra Ferrera cusira con a suya presencia a tot o territorio. A Fueva goza d'impresionans ‘balcons’ dende os cuals desfrutar d'escepcionals panoramicas, como por eixemplo dende Muro de Roda u o Castiello de Samitier.

Cualsiquiera que leye isto s’imachina un puesto reyament privilechiato, e lo’n ye. Pero sinyors ¡¡¡ ya semos otra vegata querindo estricallar o paisache, a val, as vidas d’as presonas que asti viven ta fer negocio, ta fer-se muito más ricos, chen que ya lo’n son.

En o sieglo XX atramalloron os lugars, os paisaches, as chens d’o territorio aragonés d’entibos d’augua e agora les gosa tornar-lo á fer … Ista vegata con ENTIBOS DE VEIRE.

En iste monecipio preixinan fer o proyecto de 2 HORTALS FOTOVOLTAICOS (con 91 megavatios en 130 hectarias) e UNATRO (con 50 megavatios en 54 hectarias), encara que s’achuntan os tres fendo-ne uno más gran. Os vecins son chaquetiand con empresas d’enerchias renovaples (que se fan riquismas a costa d’atra chent, sin parar cuenta d’os efectos colaterals qu’isto plega a fer) que i son dezaga d’a contrución d’istos mega proyectos, con os politicos que otra vegata no más preixinan en ers.¡¡¡ Mas les valeba contribuyir a creyar comunidaz d’autoconsumo enerchetico!!! Ta fer muito más fácil a vida en o mundo rural, que se les plena ra boca charrand d’o mundo rural e dimpués á ra hora fer o que cal fer … Se chitan t’atrás¡

A chen d’A FUEVA creyó una plataforma en esfensa d’o suyo territorio, d’a suya vida. “A FUEBA NO SE VENDE”, por meyo d’a que han feito accions ta reividicar os suyos dreitos (manifestacions, chornatas , trobadas…). Cal chilar, chunto con a chent d’A FUEVA ta esfender o suyo territorio, que como encomenzipien como en primeras d’o sieglo XX con os entibos d’augua, mos feran o mesmo con os ENTIBOS DE VEIRE.

“O polvo d’estiu cubriba campos, casas y caixigos. Os

ombres d’a presa asperaban a orden ta baixar as compuertas

Y fer d’a bal un lago y un ziminterio. Con as

compuertas, cayeba como una estraleta o progreso, segando

bidas que beniban qui sabe de cuan. O progreso 

que mataba á uns ta que otros tenesen nueba vida. Per os fils

metalicos correría muito más qu’electricidá, encara que

luen nadie querise saber-los.”

Piazo de Güelo Allue d’Anchel Conte, publicato en La Unión,

Boletin Informativo d’a Coordinadora Aragonesa de Lugars Afectatos por os Entibos

(nº2-3, Febrero de 1989, p.2)

“O NUESTRO REFIRME T’AS RENOVAPLES, PERO NO ASINAS”

Testo: Bombolona Panzargüala. Fotos: Bombolona Tozolona.

PAISACHE DE PRIMABERA

S'esparden os ababols por as amplas ordieras,

tintando de royo ros paisaches.

Por marguinazos e dembas enlastratas azuleyan matapollos,

e as aliagas tacan as faxas d'amariello.

Os cachigos berdeyan zereños e brilans,

e a berdor d'os choplos s'enfila enta ro zielo.

Grans cantals grisos aduermen entre berdes tozals,

e os biellos azipreses cosiran os fosals.

A intensa luz d'o sol que te plena ros güellos,

ixas boiras que esnabesan igual como ro cotón.

Os lugars chicoz de piedra e color de buro,

as casas aborguilatas arredol d'a ilesia.

O blango amadrugador d'as almendreras,

o dorato d'os trigazals en o berano:

Platero ye que si Ban Gog rebilcase,

se'n benirba á pentar t'o Semontano.

FABIAN CASTILLO SEAS (BOMBOLON RETABILLADOR) 

Casbas - Imachen de Bombolona Naval

 

ESTIU-AGÜERRO - 40 ANIBERSARIO MUSEU SAN CHUAN DE PLAN

 

LAZY DAYS

LAZY DAYS, CHANDRO DÍA HUE, UNA CANTA D'ESTIU

Lo títol orichinal: LAZY DAYS

Lo taute: GRAM PARSONS

Los mosicaires e cantaires: THE FLYING BURRITO BROTHERS

Lo idioma orichinal: ANGLÉS (USA)

En l'anyo: 1966 (publicata en 1970)

Enlaz a Youtube:

La Canta

Una falordieta tan simpla e tan bien trobata. Un día cualsiquier en o cual, per os motius u razons que siga, no cal ir ta treballar, ni t'a unibersidá, ni existe garra compromís u convenzión social que nos vincle ta hue. Podemos galbaniar e, per eixemplo, parar-nos un rustito, una turrada, de carne. Nos relaxaremos e pasaremos un buen día. Ixublida-te'n hue d'a declaración d'a renda u de cualsiquier atra angulema que ista exprisión siga alegorizando u metaforizando.

Existencialismo de puntetas. D'un día chandro en feremos un día barrenau. En aproveitaremos la galbana e nos ferá honra dar-li-ne sentiu a iste día pando.

Ista ye la sintesis d'iste texto, compuesta ta 1966 per Gram Parsons e no publicata dica 1970 per o grupo que encapezaba allora, The Flying Burrito Brothers.

La mosica d'ista canta ye una magnifica muestra d'o que Gram Parsons, con atros grans grupos como The Allman Brothers Band, van creyar en aquels intes, la fusión entre lo country clasico e lo rock ascendent allora, ye dizir, lo Country Rock.

Gram Parsons (veigaz l'epigrafe adedicau t'o taute d'a canta) tenió una vida muitismo, masiau, efimera. Tamién la tenioron, profés, los grupos d'os que va fer parti. Ye per ixo que ista canta, como las atras que va publicar, no tenió continidat en l'exito ni rafolladas de versions. La canta estió gravata per os tres grupos de Parsons, manimenos allora només va estar publicata ísta de The Flying Burrito Brothers. Muitos anyos dimpués, estió publicata ísta atra de The Birds [https://www.youtube.com/watch?v=0c6YJjkUDXA], a partir d'a grabazión que eba estau feita en 1968.

Ascuitaz-la, sentirez cómo lo día chandro y pesau d'estiu esdeviene un día activo e choncante e veyerez jopar la galbana.

 

O taute e os cantaires e mosicos

Gram Parsons, cualo nombre de naximiento yera Ingram Cecil Connor III (Florida, USA, 1946 - California, USA, 1973), va estar taute, cantaire, guitarrista e pianista. Naxiu de Florida, pero criau de Georgia, yera de familia materna adinerata, mientres que lo suyo pai yera un heroi condecorau d'a aviación de guerra. Tenió azeso ta educazión de libel conforme a la suya clase. Lo suyo pai se suizidó choben e su mai, tornata a casar luego, va cayer en l'alcolismo. Con a suya familia desintegrando-se a la suya arredol, Gram desembolicó de bien choben fortals intresos mosicals. Va fer parti d'os grupos International Submarine Band (1966-67), The Birds (1968) e The Flying Burrito Brothers (1969-70). Dimpués empezipió la suya carrera solenco e colaboró estreitament con Emmylou Harris. Va fenecer d'una sobredosis de droga a los 26 anyos en una cambra d'hotel.

Ye considerau como uno d'os grans impulsors d'o naximiento d'o country rock, la fusión d'o country tradizional e lo rock puyante [con as suyas dosis correspondients de folk, soul u rhythm and blues] en aquels intes. La suya desaparixión prematura nos privó, bien seguro, d'un gran quefer de creyazión mosical.

The Flying Burrito Brothers, con iste inverosimil, oximoronico i chocante nombre, estió lo grupo que publicó ista canta en 1970. Conoxiu como gran grupo de country rock, més que més per os influyents discos Lo dorau palazio d'o pecau [The Gilded Palace of Sin] u lo mesmo Burrito Deluxe, an yera encluyiu Chandro día hue. Lo grupo ha sofierto innombrables cambios de personal e ha esistiu baixo diversos nombres, sin que i aigan retrobau a suya estela orichinal.

 

A proposa de traduzión

• Per un regular, he mirau de fer la traduzión lo més achustata posible t'o sentiu e literalidat d'o testo orichinal.

• Foi la traduzión de lazy ta chandro e de crazy ta barrenau per sinificau e, més que més, per ritmo e metrica.

• En o caso d'o verso Now, baby, don't go away, como se repite tres begatas e i capen sin d'esbarrar lo sinificato, meto tres traduzions diferens asinas: de Now baby ta agora, ta agún e ta nina

• Semellán foi en o caso d'o berso Please, don't spoil my lazy day, an traduzco don't spoil ta no l'espaldes, ta no l'amueles, e ta no el malmetas.

• Traduzco barbecue ta rustidor, puestar tamién ese podito meter-ie turrador.

It's a lazy day I'm down with nothing else to do It's a crazy day I got a thing that I want to try with you Now, baby, don't go away Please, don't spoil my lazy day Now, isn't it better, didn't you know? You're just sitting down here, by my radio I'm gonna make you worry none about your income tax No, there's no need to hurry, I think I'll teach you how to relax It's a lazy day I'm down with nothing else to do It's a crazy day I got a thing that I want to try with you Now, baby, don't you go away Please, don't spoil my lazy day No, you don't have to think about nothing to do 'Cause when I get you down to my barbecue I'm gonna make you feel funny, sparkle like a brand new dime No, I don't have no money, but I always got plenty of time It's a lazy day I'm down with nothing else to do It's a crazy day I got a thing that I want to try with you Now, baby, don't you go away Please, don't spoil my lazy day It's a lazy day It's a lazy day It's a lazy day

Chandro día hue no tiengo garra cosa a fer día barrenau i ha bel quefer que quiero prebar con tú, agora no te'n vaigas pas no l'espaldes per favor ¡Qué bien que semos los dos aquí! posaus l'un a costau de l'atro, chuntez d'o tuyo irpf te voi a tranquilizar no cal correr, me pienso que a relaxar-te t'amostraré Chandro día hue no tiengo garra cosa a fer día barrenau i ha bel quefer que quiero prebar con tú, agún no te'n vaigas pas no l'amueles per favor No cal que pienses tú qué poderbanos fer cuan te portaré t'o mío rustidor Voi a fer-te sentir bien goyosa, brilante e feliz No en tiengo de diners, pe- ro de tiempo en soi siempre sobrau Chandro día hue no tiengo garra cosa a fer día barrenau i ha bel quefer que quiero prebar con tú, nina no te'n vaigas pas no el malmetas per favor Chandro día hue Chandro día hue Chandro día hue

Bombolón Carbonero - Chunio 2023 (d'o Practicum feito en mayo/chunio de 2022)

O METODO CIENTIFICO. SEMMELWEIS

Imagen de pch.vector en Freepik

En a metat d’o sieglo dezinueu encara no se conoixeba que os microbios existisen. Asinas que en ixas puendas no se podeba ni sisquiá prexinar que estasen os tautes d´as malotías infecciosas.

En un hespital de Viena bi eba dos clínicas de maternidat. La una yera atendita por medicos e l´atra por comadronas. Yera de toz conoixito que a clinica d´os medicos teneba una mortalidat mas grant. O que no se sapeba yera por qué. Dica que bi amaneixió Semmelweis, medico hongaro de 28 años, que, recién plegato ta l´hespital e como director, se proposó d´averiguar a causa d´ixe feito. E lo fazió como ye menister ,emplegando ro metodo cientifico.

Enzetó ro proceso mesurando bien os datos de mortalidat d´as dos clínicas, fendo servir-ie ferramientas estatisticas ta asegurar-se de que as esferenzias no yeran produzitas por a casualidat. Malas que escartó a casualidat, s´embrecó en escubrir a causalidat. Ta fer ixo prenió en consideración esferens hipotesis chusmetendo-las á ra comprebación experimental con a rigor que desixe o metodo cientifico. Pero con garra d´ixas hipotesis obtenió dengún resultato. A mortalidat no cambeaba cambeando ixos factors posibles.

Un día, un profesor amigo d´el se murió poco dimpués d´haber-se punchato con un bisturí fendo una autopsia d´una muller fallecita de fiebre de sobreparto. E lo fació con sintomas parellanos á os d’a mesma parturienta. A observación d´iste feito levó á Semmelweis á formular a hipotesis siguient: a “matiera calaverica” untaba ras mans d´os medicos cuan practicaban as autopsias, transmitindo-se en o inte d´a libradura á ras parturientas que yeran atenditas por ixos medicos. Ixa “matiera calaverica” yera responsable d´a malotía d´as mullers como lo yera estata d’a d’o suyo amigo. Prexinó que talment ixo explicarba a mas grant mortalidat d´a clínica d´os medicos, por que as matronas no feban autopsias.

Ta comprobar a debandita hipotesis fazió que, antis d´atender as libraduras, os medicos se lavasen as mans con una solución parellana á ra lexiva (dica allora sólo que se lavaban por dencima, sin parar masiata cuenta). Malas que ixa mida se puso en practica tornó a mesurar os resultatos como cal e istos confirmoron a suya hipotesis: a mortalidat d’a clínica d´os medicos baxó ascape dica o libel d’a clinica atendita por as matronas.

Os resultatos publicatos por Semmelweis no estioron adempribiatos por muitos d´os suyos colegas. Talment no quereban almitir que as suyas mans transmitiban a malotía e que els, sin querer, yeran os tautes.

Pasteur, escubrió más tardi as bacterias, una d´as cuals, o estreptococo beta hemolitico yera o que en reyalidat se transmitiba con ixa “matiera calaverica de Semmelweis”, orichinando a fiebre puerperal d´a que se moriban muitas d´as mullers atenditas en a clinica d’ os medicos.

Semmelweis remató mal. Pero dixó un grant exemplo d´emplego d´o metodo cientifico bi mentendo en chuego  capacidat d´observación, intelichencia e rigor metodolochico. E tot isto en beneficio d´os sers humans. Huey sapemos que, como él escubrió, o lavato e hichiene d´as mans ye l´alazet d´a prevención d’ as infeccions hespitalarias , quirurchicas e de muitas atras malotías.

Cuentrariament os suyos colegas negacionistas son o exemplo de cómo en masiatas ocasions no se quiere ascuitar as alvertencias d’a ciencia, sigan istas feitas en a demba d’ una pandemia, d’ o cambio climatico u en cualsiquier atra.

Chunio 2023. 

BOMBOLÓN BUIXO.

BOMBOLONIAR POR BARCELONA!!!

O cabo semana d’o 9-11 de Chunio os bombolons estiemos bomboloniand por Barcelona, combidatos por a Colla de charradors O corrinche, ta seminario “L’Aragonés en a era dichital”.

 

Os bombolons dentramos á escena de tardis, tenébanos a misión d’amostrar o nuestro treballo, en un entorno esferent á o nuestro.

Espliconiar como creyamos BOMBOLONIAR dende os alacez dica hue. A nuestra presentación se fació por meyo d’un Powert Point an se desembolica a nuestra trayectoria, reforzata por á exposición oral de traza presencial. Iste ye o texto en o que mos alacetemos ta fer a charrada:

"PRESENTACIÓN DE BOMBOLONIAR TA BARCELONA.

Á ras buenas, soi Bombolona Panzargüala e formo parti de

BOMBOLONIAR dende os alazez, en o logo se fa honra á ras colors d’a

sinyal d’Aragón, representatas en o royo d’os ababols e o amariello d’os

ordios, achuntandose ta fer una “A” d’Aragón. Una “A” gran,

mayuscula, que entre os dos acarrazan á toz os BOMBOLONS que gosen

escribir-ie.

Tot encomencipió en setiembre de 2021, cuan una colla de chent que se

matriculó, entre istas yo, en o DEFA (Diploma d’especialización en lengua

Aragonesa) que s’imparte en a Universidat de Zaragoza en o campus de

Uesca. En a suya oncena promoción.

Estió una añada muito dura pero muito pincha… de istos vimbres surtió

una amistat que plegó a ser actualement ista “familia”, que ye

BOMBOLONIAR. Semos chent de esferens puestos e con esferens

ocupacions e basemias, basemias que fan de bomboloniar un puesto an se

desembolican as ideyas de cadagun, cada ideya más esferent, rariza,

polita… No más mos chuntábanos ta os examens, ¡otra coseta no¡ 

Pero os bombolons d’a añada 21- 22 son sociables en a suya naturaleza, e les

caleba chuntase, encara que estase ta chitar bella biera ¡que no ye mala

faina ixa!

Cuan remató ro curso con a basemia de fer a rematadura… se mos

presentó un chicorron-gran problema, ¿cómo ro fébanos ta chuntanos toz,

si no podérbanos ser más esparditos? dexó de ser-lo ascape, en cuentas de

fer rematadura encomenzipamos a fer chicorronas-grans trobadas, (Graus,

Echo, Alquezra…) trobadas que contrebuyoron a fer muito más cereña ista

amistat que encomenzipio por ixas engüeltas en setiembre de 2021.

Ye muito platero que mos chuntemos chent que’n primeras no tenébanos

otra delera que chuntar-nos, charrar en aragonés, fer lifaras … e d’ixos

achuntamientos surtió ra ideya ta no tresbatir o contacto, e con ganas de

empentar una luita per e por o Aragonés. Ta que toz os contenitos

aprenditos no se cafegasen en o universo d’as parolas ixublidatas 

IXO MAI¡¡¡ CON BUENOS PEGA¡¡¡ e d’ixas deleras borineras … ESTIO

NAXITO BOMBOLONIAR¡

Como ye cuasi normal en istos tiempos, tenébanos un grupo de watshap

en dende asti encompencipiamos á dar-le güeltas á ra ideya de fer bella

coseta alrredol d’os contenitos aprenditos en o DEFA. Cal decir que no

costo cosa empentar-lo, mos metiemos d’alcuerdo ascape, tanto en o

nombre, a linia á seguir, como en as trazas de treballar.

Encomencipió Bombolona Esploradora fendo ro logo. Bombolon

Borinero que ye qui s’encarga d’esparder o blog por os retes fació una

cuenta de correyo, creyó as cuentas d’os retes socials, (instagram,

facebook, youtube) en a que toz os bombolons e bombolonas: Bombolón

Buxo, Bombolón Chuzo, Bombolón Laminero, Bombolón Retabillador,

Bombolón Pedrodoz, Bombolón Carboner, Bombolona Tozolona,

Bombolona Panzargüala, Bombolón Borinero, Bombolona Naval,

Bombolon Alicate, Bombolona Esploradora… puen dentrar-ie. Toz e totas

ninviar-mos os articlos ta ixa cuenta de correu e dende asti Bombolona

Naval ye a que s’encarga de publicar-los… Bi ha que ninviar os articlos en

os formatos de Word e pdf, e si ye posible bella foto ta ilustrar l’articlo.

Os articlos son de totas as trazas, ixo seguntes les cuaque á os

bombolons, cadagun escribe o que le pareix, dende creyación literaria,

cretica social, falordietas, historia… cudiando ro diseño en as trazas que

mos ye posible…

Agora semos 15 bombolons e bombolonas enfainaus en o blog, no toz

son escolanos d’o DEFA, beluns no i son bombolons, fan colaboracions

esporádicas como @collagesxrach, s’han ito adibindo á ro luen d’o que

levamos d’andatura. Ta ser parti de BOMBOLONIAR no más cal tener-ie

muita ganas de charrar, escribir, prexinar … en Aragonés, trobar un

pseudonimo bombololinero e ninviar os escritos ta

bomboloniar@gmail.com.

A nuestra delera ye continar treballando per l’aragonés, esfendendo un

aragonés plural que dé voz á toz,

TANIMIENTRES BI HAIGA BELLA PURNA… ASTÍ I SEREMOS".

Ta rematar cal agradeixer á ra Colla de Charradors O corriche a suya convidata ta ista chornada alrredol d’o aragonés. Que creyesen que os bombolons, e iste chicorron proyecto, podérbanos alportar bella coseta. A nusatros mos fació muitismo goyo acudir-ie.

¡¡¡MILENTAS GRACIAS POR PREIXINAR EN NUSATROS!!!

A “SACA” D’A VIRCHEN D’O CASTIELLO DE BIJUESCA

O primer dominche de chunio se celebró un evento especial en Bichuesca, a “saca” d’a Virchen d’o Castiello, una romería que se celebra nomás cada venticinco años e que achunta a chen de toz lugars d’a redolada d’ista tierra en a “raya” con Castiella, tanto d’o costau castellano como d’o costau aragonés. Asinas participan os lugars de Deza, La Alameda, Carabantes y Reznos en a Provincia de Soria y Malanquiella, Clarés, Torrelapalla, Berdello, Turrillo e Bichuesca en a Provincia de Zaragoza.

La zaguera vegada que se celebró estió en l’año 96, allora, a romería teniba que haber-se celebrau en o 2021 pero por as restriccions d’a Pandemia se tenió que rezagar dos años, ye un evento historico que tiene os suyos orichens dillá por o sieglo XVIII (seguns fuens documentals, encara que se diz que puestar que l’orichen seiga d’antismás) do se suposa que habió una gran sequía en a redolada e se decidió sacar en romería a la Virchen d’o Castiello que ye en Bichuesca, una Virchen a la que tienen muita devoción tanto en Bichuesca como en tota la redolada por os muitos miraclos que l’en chitan. En primerías se teniba que repetir a romería cada meyo sieclo pero más tardi, en l’año 1946 decidioron fer-la cada cuartalada de sieclo. Tamién se diz que iste evento teniba l’obchetibo de fer comunidat e mezclallar a las chens d’ista redolada, os lugars mencionaus que se claman “d’a Concordia”.

A la fin plegó lo gran dia, dimpués de muitos parativos, reunions con os lugars participans, asambleyas vecinals en Bichuesca, trestallo d’afers entre cada colla d’a organización de l’evento, plegó l’asperau cuatro de chunio, o dia que se ferba la romería continando a mesma ringlera que tradicionalmént se continaba en totas as suyas edicions.

Se devantan bien luego as chens d’o lugar, a las siete oradas, con caras de muito suenio dimpués d’una nueit de borina con una gran orquesta que remató de tañer a ixo d’as cuatro d’a nuei ta replegar as cruces, siñals e religadas d’a procesión en a ilesia d’o lugar, bien pinchos e bien mudaus muitos con mudas tradicionals y “de dominche” e marchan enta la dentrada d’o lugar ta recibir a o primer convidau ta la romería, o lugar de Reznos que como ye de dar tradicionalmént, prene o mando d’a romería e allora se fan os saludos e cambeo de poders entre as autoridaz d’os dos lugars, se fan cantas de biemplegada e marchan chuntos ta la plaza d’o lugar do se deixa a la chent d’o lugar convidau ta en tornar una atra vegada ta la dentrada d’o lugar a recibir a o siguient lugar, Deza y asinas con Malanquiella, Carabantes, Clarés, Berdello, Torrelapalla e La Alameda por iste orden.

Romería d’a Virchen d’o Castiello de 2023 en Bichuesca

Finalment se marcha entra l’atra dentrada d’o lugar a recibir a o zaguer lugar convidau, Turrillo e dimpués de fer os saludos entre as autoridaz cebils e eclesiasticas, s’en marcha de nuevo ta la plaza do las chens de Turrillo fan un dance tradicional de cintas. Achuntaus toz os lugars convidaus, en marchan chuntos ta la Ermita ta sacar-ie la Virchen e prencipiar a romería por o lugar en levándo-la de tornada ta la plaza do se fa una misa presidida por os bispes de Soria e de Tarazona e do se bendicen os rollos que cada lugar en traye ta la fiesta con os que dimpués se ferá una rifa.

Rematada la misa, marchan de nuevo toz chuntos en romería ta levar a la Virchen de tornada ta la Ermita en do se fan cantas en o suyo honor e se da por rematada la romería.

Finalment se fa un festival de jotas en a Plaza con participación de dos grans joters como Nacho del Río e Yolanda Larpa e a charanga que ha tañiu durante tota la chornada tañe unos temas más ta rematar la chornada e despedir a las chens d’os lugars convidaus.

En finitiva ha estau un evento historico y especial por muitos motivos, o primer que se celebra cada cuartalada de sieclo, dos años más ista vegada por a Pandemia, porque achunta en un lugar tan chicorrón  como Bichuesca de cien vecins a arredol de cuatro mil personas e porque fa un acto de chirmandat entre lugars d’os dos costaus d’a “raya” de Castiella e Aragón e allora suposa un evento emocionant de retrobadas e ricuerdos.

Un éxito d’evento en una chornada menazada por una tronada que a la fin no florió a romería, puestar un  atro miraclo d’a Virchen e que s’aspera que se torne a celebrar drento de ventitrés años (Cal restar os dos años de más con os que se fació ista edición), en o 2046.

Chorche.Bombolón Alicate

BAGDÁ

Plebia de fuego y espanto sobre Bagdá,

alteras colunnas de fumo negro tintan

de muerte as oras primeras d'ista nuei

aziaga an l'ombre s'arrozega.

Tremola a ziudá e ruche un estrandalo

cuan os paxaros enzetaban o suyo escanso,

cuan os ninos s'entregaban á o suyo suenio

e no prexinaban que nunca no rebellarban.

¿Por qué amostraz ista orror bía satelite,

e mezclaz a trachedia con a marcha bursatil,

cuan l'angunia e a muerte s'arramplan

de bidas inozens á espuendas d'o Tigris?

Güé más que nunca m'abergoña estar ombre,

güé más que nunca me fa mal l'aire que alento.

Bi ha muitas luzes en a ziudá, luzes e muerte,

ya no deberba amanixer dimpués d'iste estricallo.

FABIAN CASTILLO (BOMBOLON RETABILLADOR)

LA RAZÓN MAÑA

Amanece un día més en la vida de Supermaño, nuestro oregonés més universal. Se llevanta pe’l maitino sin fer aparatos, como cualsiquiera de nusotros, pero él ye cosciente de la fama que s’ha fei y de la suya responsabilidat como personache dibuixau per el zaragozano Alberto Calvo. No puede fer burro falso; un borguil de publlico embelecau sigue en tebeos y comics las suyas aventuras y enseñanzas machistrals. Brenca fácil ye mantenir-se a nivel d’ixo que s’aspera d’un sobrebuen mañico. De contino ha d’estar a la tisba de tot lo que ocurre al suyo redol, fer un analís riguroso de la situación y actuar aprisa pa que la razón maña se impose en el mundo. Ben ye verdat que la suya razón no le viene de lo aprendiu en bell llibro u bella escuela, ye algo innato. Debe tenir una genetica maña, unos genes que s’han iu seleccionand a lo llargo de muitas cheneracions familiars, dende el cromaño prehistorico, pasand pe’l maño íbero, hasta el supermaño d’hoi. El resultau d’iste proceso evolutivo el veyem retratau, con lupa d’entomologo, per el suyo biografo. En cada historieta, Supermaño se i fa pa que Calvo repllegue en dibuixos els suyos poders, y las suyas meditacions filosoficas se veigan ben refllejadas. 

Uno d’els sacrificios que tiene que fer un superheroe ye estar disponiblle a cualsiquier hora del día u de la nueit, amas de vestir sempre el trache d’els superpoders. Per ixo, el nuestro protagonista va resolver no desnudar-se mai. No creigaz que ye brenca fácil, fa falta tenir muito espritu pa tomar ixa decisión. Isto l’afuerza a no veyer gota d’aigua encima d’a suya pell y que las moscas y mosquitos esvolastrien de contino, seguind-le a toz els puestos. Pero rai, que un heroe maño se i fa a tot y de toda pedra sabe fer paret, como de seguiu tos voi a contar.

Iste maitino, Supermaño s’ha llevantau como cualsiquier día. Asperará con pacencia que els acontecimientos de la vida el recllamen; nunca no se sabe cuan puede fer honra la suya presencia como superheroe. No tardará guaire a recibir el primer aviso de socorro. En almorzar, la suya muller ha marchau a recordar els tocins y ha parau cuenta que no n’i habeba brenca que dar-les de minchar. Ye una muller feita a tratar con heroes, perque en tiene uno a casa. Denseguida habrá pensau “Isto ye cosa de Supermaño” y con ixa voz de cocho enrabiau que tiene l’ha gritau:

—¡Ospanetanegra, marcha escopetiau a mirar pastura pa els bichos que los tiens llasos y estransius, redios! ¡Que yes un baldragas, copón!

En sentir una llamada, la sesera de Supermaño se enchega ascape y comenza a rular y baruquiar como si no n’i habese un mañana. A la fin, dimpués de tanto trafego mental, una chicota espurna llampadea adentro del suyo tozuelo.

—No i pases pena muller, que n’un santiamén te los farto ben fartaus —le sulta Supermaño, que ya sabe como fer pa trobar-les birolla porcina.

La llum a la sesera le fa relacionar el suyo ferum con la pudor d’els tocinos, y caye en la cuenta que si chuntase toda la suya roña, apegada como una crosta al cuerpo, suplliría prou pa que minchasen toz els chinons.

Asinas va fer. Va allenar un balde gran d’aigua, se va desvestir y se va zabucar ta drento, hasta que va notar la color, la ulor y el gusto del caldo en el suyo punto. Ya teniba una buena pastura. Cuan les ne va dar, la porcada se’n regalaba. Tenibaz qu’haber-los visto. Els tocinos chilaban de gozo y se deleitaban como si comesen llamins.

Unotra vez, Supermaño ha conseguiu que la razón maña trunfe, y que el chirar del mundo se veiga menos fiero, menos negro, més humano.

                                                                                                                      Bombolón Pedrodoz

                                                                                                              Feliciano González Fumat