O METODO CIENTIFICO. SEMMELWEIS

Imagen de pch.vector en Freepik

En a metat d’o sieglo dezinueu encara no se conoixeba que os microbios existisen. Asinas que en ixas puendas no se podeba ni sisquiá prexinar que estasen os tautes d´as malotías infecciosas.

En un hespital de Viena bi eba dos clínicas de maternidat. La una yera atendita por medicos e l´atra por comadronas. Yera de toz conoixito que a clinica d´os medicos teneba una mortalidat mas grant. O que no se sapeba yera por qué. Dica que bi amaneixió Semmelweis, medico hongaro de 28 años, que, recién plegato ta l´hespital e como director, se proposó d´averiguar a causa d´ixe feito. E lo fazió como ye menister ,emplegando ro metodo cientifico.

Enzetó ro proceso mesurando bien os datos de mortalidat d´as dos clínicas, fendo servir-ie ferramientas estatisticas ta asegurar-se de que as esferenzias no yeran produzitas por a casualidat. Malas que escartó a casualidat, s´embrecó en escubrir a causalidat. Ta fer ixo prenió en consideración esferens hipotesis chusmetendo-las á ra comprebación experimental con a rigor que desixe o metodo cientifico. Pero con garra d´ixas hipotesis obtenió dengún resultato. A mortalidat no cambeaba cambeando ixos factors posibles.

Un día, un profesor amigo d´el se murió poco dimpués d´haber-se punchato con un bisturí fendo una autopsia d´una muller fallecita de fiebre de sobreparto. E lo fació con sintomas parellanos á os d’a mesma parturienta. A observación d´iste feito levó á Semmelweis á formular a hipotesis siguient: a “matiera calaverica” untaba ras mans d´os medicos cuan practicaban as autopsias, transmitindo-se en o inte d´a libradura á ras parturientas que yeran atenditas por ixos medicos. Ixa “matiera calaverica” yera responsable d´a malotía d´as mullers como lo yera estata d’a d’o suyo amigo. Prexinó que talment ixo explicarba a mas grant mortalidat d´a clínica d´os medicos, por que as matronas no feban autopsias.

Ta comprobar a debandita hipotesis fazió que, antis d´atender as libraduras, os medicos se lavasen as mans con una solución parellana á ra lexiva (dica allora sólo que se lavaban por dencima, sin parar masiata cuenta). Malas que ixa mida se puso en practica tornó a mesurar os resultatos como cal e istos confirmoron a suya hipotesis: a mortalidat d’a clínica d´os medicos baxó ascape dica o libel d’a clinica atendita por as matronas.

Os resultatos publicatos por Semmelweis no estioron adempribiatos por muitos d´os suyos colegas. Talment no quereban almitir que as suyas mans transmitiban a malotía e que els, sin querer, yeran os tautes.

Pasteur, escubrió más tardi as bacterias, una d´as cuals, o estreptococo beta hemolitico yera o que en reyalidat se transmitiba con ixa “matiera calaverica de Semmelweis”, orichinando a fiebre puerperal d´a que se moriban muitas d´as mullers atenditas en a clinica d’ os medicos.

Semmelweis remató mal. Pero dixó un grant exemplo d´emplego d´o metodo cientifico bi mentendo en chuego  capacidat d´observación, intelichencia e rigor metodolochico. E tot isto en beneficio d´os sers humans. Huey sapemos que, como él escubrió, o lavato e hichiene d´as mans ye l´alazet d´a prevención d’ as infeccions hespitalarias , quirurchicas e de muitas atras malotías.

Cuentrariament os suyos colegas negacionistas son o exemplo de cómo en masiatas ocasions no se quiere ascuitar as alvertencias d’a ciencia, sigan istas feitas en a demba d’ una pandemia, d’ o cambio climatico u en cualsiquier atra.

Chunio 2023. 

BOMBOLÓN BUIXO.