O zaguero diya de chulio espleitemos en Chaca d'una nobal ocasión por á remerar á o cheso Domingo Miral López. Dimpués d'ubrir o auto academico, o Diretor d'os Cursos d'Estiu, o profesor don Bizén Lagüéns Gracia, endicó que ista begata, como a prezedén, l'obcheto d'o omenache estarban os Cursos, e más que más, dos filologos ilustres qui en eban feito parti: Chusé Manuel Blecua Teijeiro e Felizes Monge Casao, a bida e a obra d'os cuals racontarban atros dos profesors d'ixa matiera: Chusé Manuel Blecua Perdices (Blecua fillo) e María Antonia Martín Zorraquino.
 |
Residenzia Unibersitaria de Chaca, obra de Bomboloneta Pilar
|
Fazió un enziso por á fablar d'o diya d'o ricuerdo de Miral, qui naxió en Echo en 1872 e s'amortó en Zaragoza en 1942, cuan abeba sitanta años; ya ixe año, e prexinato per o periodista Francho Dumas, o cuatre d'agosto estió zelebrato ro dito treudo, fa güeitanta e dos añadas. Si perén a calendata eslexita por á fer-lo yera ra más amanata á ra festibidá de Santo Domingo, o 8 de agosto, ista begata s'eba quiesto que consonase con o rancadero d'os cursos por á que fese onra como debantadera formal d'istos.
Auto contino, retaculó dica ra añada 1986, cuan o profesor Blecua prenunzió una conferenzia arredol d'os poetas d'a Chenerazión d'o 27 (á os cuals er clamaba os suyos "amigos"). Y en ixas embueltas a Diretora d'os Cursos yera una firme choben María Antonia Martín Zorraquino.
Adibió cómo más tardi o auto se tresladó á ra luna d'a Residenzia universitaria, an fablaba bellas parablas en ansotano Jorge Puyó e leyeba poemas de Veremundo Méndez Coarasa ra suya filla.
E iste Diya, trenta e güeito años dimpués, segundiaba ixa bibenzia de chobentú, á consonán con os nuebos tiempos: o poema cheso estarba cambeato per una canta en ista bariedá d'o aragonés. Os mosicos estarban Alizia Canguero e o contrabaxista Mario Cantabrana; e a canta, "S'ha feito de nuei", "porque ¿qué millor traza d'empezipiar que con un poema d'aimor?"
Recosiró bels detallos, como a placa fixata en una d'as parez d'a luna d'a Residenzia do s'afirma que Blecua "onró con a suya sapenzia os Cusos d'Estiu de Lengua e Cultura españolas por á escolanos foranos". Tamién s'alcordó d'a profesora Inés Ayala (grazias á ra cuala una escolana refuxiata eba puesto estudear en ixos Cursos d'Estiu), de Rosendo Tello (qui yera estato mayestro d'español por á os foranos i matriculatos), e d'o Romanzero de Cuatre Bientos, en a segona tongada d'o cual fazioron parti, entre atros, Blecua pai e Ildefonso Manuel Gil. Remató concluyendo que per ixos cursos pioners en España yeran pasatas as personalidaz más relebáns e que, antiparti, lur esdebenidero yera prometedor.
Dito tot isto, mos presientó don Bizén á ra profesora Martín Zorraquino, fablando d'os suyos premios, d'a suya fayena rechiradora, d'a suya condizión d'academica correspondién per Aragón en a Reyal Academia Española, e d'os bersos d'o sopradito Romanzero de Cuatre Bientos:
¿Quién hace a todos tilín
por lo fino?
María Antonia Martín
Zorraquino.
Afecto tan general
testimonia
que es de pasta angelical
María Antonia.
Prenió a parola María Antonia por á emponderar ixa festa tan emplita de sentito d'a Unibersidá de Zaragoza, por á agradexer-li as suyas parablas á o profesor Lagüéns e amás per aber feito memoria de Blecua, tan aimato, e de Monge, o suyo mayestro; ers yeran estatos, antiparti, mayestro y escolano. También li onraba estar á o canto d'o suyo amigo fraternal, Blecua fillo, qui li aduyó en intes difízils d'a suya paranza d'as oposizións.
En o que pertocaba á Felizes Monge, endicó que yera fillo d'o mayestro de Mainar, anque abitó a más gran parti d'a suya nineza en A Puebla de Híjar, á ra escuela d'iste lugar o suyo pai (qui, tasamén, estió ro suyo mentor) pasó á exerzer o suyo mestier, ocupazión qui abeban tamién a lola materna, a mai e un chirmán de Monge Casao. En 1941 remató ro Bachillerato con Premio Estraordinario, fendo parti d'a promozión d'oro d'o Enstituto Goya de Zaragoza, en a cuala yeran asinas mesmo Manuel Alvar López, Fernando Lázaro Carreter (filologos), Antonio Ubieto (istoriador), Gustavo Bueno e Constantino Láscaris (filosofos). Á ers (Alvar, Lázaro e Monge) s'adibió Tomás Buesa Oliver en os cursos comúns d'a Facultá de Filosofía e Letras zesaraugustana. E asinas, dimpués, ers daban sopas con onda á os suyos compañers d'as Unibersidaz de Salamanca e Madrid. Toz ers pertenexeban á ra Escuela Española de Filolochía, alazetata per don Ramón Menénez Pidal y en a cuala sobrexeban Damaso Alonso, Rafael Lapesa, Amado Alonso... D'o primero d'istos estió escolano Monge. Alonso li albertió que o suyo proyeuto de tesi arredol d'o Sieglo d'Oro yera inadubible; per ixo achiquió ro obcheto d'a mesma á La Dorotea, de Lope de Vega. Estudeó más tardi en a Unibersidá de Zurich (Suiza) baxo a endrezera d'o arabista e romanista Arnaldo Steiger. Antimás, yera o taute de triballos, beluns enluzernans, arredol d'a Gramatica d'o español e d'a Istoria e Teoría d'a Literatura. O referén á ras frases pronominals de sentito impresonal en español (de 1954) enarcó mesmo á Euchenio Coseriu per a combinazión d'o analís posibilista e d'os fators qui determinan o cambeo lingüistico. Remató, per atro costato, obras alazetals sobre a morfolochía lecsica en español, feitos durando a suya estacha en a Unibersidá de Zurich, asinas como os referens á ra formazión d'as parablas e a sufixazión en castellano. Li feba duelo á doña María Antonia que no esen estatas poblicatas as segonas prebas correxitas d'istos amplos triballos enfilatos á ra Enziclopedia Lingüistica.
Plegó a estar catedratico en 1966, en primer puesto en a Unibersidá de Santiago de Compostela e lugo en a nuestra quiesta de Zaragoza; asinas recuperábanos á un eszezional filologo. Astí estió un pilar d'a Lingüistica Ispanica á o canto de Tomás Buesa con a creyazión d'os estudeos de Filolochía Romanica. Estioron os suyos escolanos Ánchel López, Chusé Franco Val, Túa Blesa, Margarita Lliteras e a mesma María Antonia, e zientos d'estudians d’ista nobal demba.
As trazas más propias de Monge yeran a suya increbable desixenzia, o suyo afano d'atualizar-se con a letura d'as rebistas d'a matiera e a suya onradez en a consulta e zita d'a bibliografía.
En o que pertocaba á os Cursos por á Foranos de Chaca, entre os años 1955 e 1968, cuan o profesor Chusé María Lacarra yera Diretor d'ers, amostró Monge en istos, e tamién con o suzesor d'aquer istoriador, o elenista Serafín Agud; Monge estió ro catedratico qui abeba o suyo quefer en o Curso d'Istoria d'España Contemporania, alazetal por á os mayestros. Asinas, don Felizes yera estato un profesor qui eba dato muito e durando muitas añadas á os Cursos.
Remató a profesora Martín Zorraquino agradexendo á o atual Diretor aber-li premitito remerar á o suyo mayestro en o suyo cabo d’año zenteno.
Auto contino, Alizia Canguero e Mario Cantabrana mos fazioron espleitar d'una canta en lengua basca.
Dimpués, o profesor Lagüéns mos presientó á don Chusé Manuel Blecua Perdices, qui yera estato escolano e mayestro d'aquers Cursos, a lizión inaugural d'os cuals prenunzió en 2013 arredol d'a Reyal Academia Española en o suyo terzer zentenario. Asinas mesmo, en 2017 i fabló sobre "as angulemas, retos e roncas d'a lengua española".
Eba amostrato en as Unibersidaz de Barzelona e Autonoma de Barzelona. O libro an se feba o suyo omenache yera "Á l'atro canto d'o mirallo", coordinato per Gloria Clavería. As dembas per as cualas eba abito más intrés yera estatas a Fonetica e a Literatura. O amiro d'os cargos academicos que eba cumplitos esturdiba: os dos más sobrexiéns estarban os de Diretor academico d'o Enstituto Cervantes e Presidén d'a Comisión Estatal por á ra Zelebrazión d'o IV Zentenario d'o Quixote. Per atra parti, s'asienta en o sillo "h" minuscla d'a Reyal Academia Española deinde o 25 de chunio de 2006; antonzes o suyo descurso, almirable, de dentrada bersó arredol d'as primeras pachinas d'o Dizionario d'Autoridaz. Estió ro suyo Diretor deinde 2010 dica 2015.
Por á rematar, aseguró que yera estato profeta en a suya tierra, pus eba rezibito o Premio Aragón (2005), a medalla d'Oro de Zaragoza (2011), o Premio d'as letras Aragonesas (2012), a Medalla d'Oro d'a Unibersidá de Zaragoza (2014) y estió eslexito Senador Onorario d'a Facultá de Zienzias d'a mesma en 2012.
 |
Residenzia Unibersitaria de Chaca, obra de Bombolonet Lorién
|
As primeras parablas de Blecua Perdices estioron que cuan li fazeban una encomienda d'a Unibersidá de Zaragoza en Chaca nomás podeba dezir que sí. Agradexió dimpués á ra profesora Martín as suyas paraulas sobre o suyo mayestro e amigo Felizes Monge, e remeró que os suyos amigos más grans yeran estatos Chuan Martín (pai da cuaternata María Antonia) e Monge, dica o pundo que cuan li caleba prener una resoluta prexinaba er qué ese feito Felizes en ixe causo. En o que pertocaba á Martín, profesor sobrebueno, o suyo zaguer ricuerdo yera estazionando ro suyo auto en o puesto que bi eba baxo as escaleretas d'a Residenzia an yéranos. E Antonia, seguntes er, eba como erenzio as birtuz d'os ditos Chuan Martín e Felizes Monge. Agún remeraba á aquera bien plantada chobenastra qui arribaba á ras primeras clases, con ixa guallardía que eba abita perén, asinas como güe manteneba as suyas falera y empenta.
Reconoxió que "Á Chusé Manuel Blecua li feba goyo Chaca" estió ro primer tetulo que eba prexinato por á suya retolica. Dimpués s'alcordó que por á suyo pai tan importáns yeran as clases d'o primer año de Baxillerato como os cursos de Dotorato. E también d'as besitas que feba á Chuaquín Marco en a garchola de Carabanchel. Blecua pai yera naxito en Alcoleya de Zinca e, fime choben, marxó enta Zaragoza (tanimientres chentaban lis racontaba á os suyos fillos as esperenzias d'a suya nineza en ista ziudá y ers en ideyaron una retolica paralela), an abitó en a pensión "A peña", en o Arco Zinegio; e astí posó un primer repalmar por á meter-ie o suyo primer libro. Dimpués remató Dreito e Filosofía e Letras, en a demba d'Istoria, porque agún no se podeba estudear Filolochía en Zaragoza. Ganó una beca en a Unibersidá Menéndez Pelayo, do conoxió á bels mayestros d'ista disziplina, como Francho Ynduráin (dimpués retor d'a mesma). Dimpuesas d'isto, o cambrero dilichén d'a pensión adubió una Catedra d'Enstituto en Cuevas d'o Almanzora (en a probinzia d'Almería). Antiparti, Blecua pai, meyata ra Guerra Zebil, creyó a colezión de clasicos Ebro, qui emitaba aquera atra poblicata per os franzeses, por á fer-los más aparéns e que agún se troban en as librerías de biello.
Rematata ra Guerra, marxó a Balladolí, á o Enstituto femenino "Núñez de Arce". En ista ziudá castellana coinzidió con o profesor Emilio Alarcos. En ixas embueltas, un catedratico de Zaragoza, don Miguel Allué Salvador, estió combertito en Presidén d'as Caxas d'Estalbios; allora tornoron toz os Blecua á Zaragoza e abitoron en a carrera Mariano de Cavia. Astí Chusé Manuel Blecua fillo e o suyo chirmán Alberto se fazioron letores en un quiosco de tebeos.
E tamién en Zaragoza Blecua pai amostró en o Enstituto Goya, o más desichén d'a ziudá, una autentica enstituzión. Beluns d'os suyos escolanos implioron o desento de catedraticos prebocato per a contienda: Fernando Lázaro Carreter estió profesor en Salamanca e Manuel Alvar López en Granada. Ista estada en o Goya li premitió biaxar á ros Estatos Unitos e Olanda. E Chusé Manuel fillo i marxó con er porque o pai yera xordo, asinas que se bolbió ro suyo aduyante; desembolicoron os dos un sistema de comunicazión propio. Ixa xordera la compartiba con o poeta cubano Euchenio Florit, á qui li adedicó un articlo, "Nuevo entremés de los sordos", en a rebista "Revistatlántica" con a enchaquia d'o nobanterno cabo d'año d'o islenco.
En 1959 deixó l'amostranza meya e prebó con a unibersitaria, en a Catedra d'Istoria d'a Lengua e Literatura Españolas en a Unibersidá de Barzelona. Á toz lis fazió goyo, fueras d'a suya mai, qui no enduró ro treslato.
D'arrienda d'articlos e triballos ye o taute. Per cuaternar beluno, está siñalera ra suya edizión d'a obra de Quevedo por á ra editorial Castalia. Encara eban trobato ros suyos manoscritos arredol d'a poesía contemporania. Poderba concluyir asinas que o suyo pai, Blecua pai, abió una bida completa.
Antimás, desfrutó d'a esperenzia de treballar en o món literario y editorial de Barzelona á o canto de Martín de Riquer e Chusé María Valverde en o enfilamiento d'a colezión de clasicos de Planeta. O fruito d'aquers años barzeloneses de Blecua estió una gran fayena dozén e rechiradora.
Una atra carateristica de Blecua yera que bibiba o paisache con toda intensidá; er e o suyo amigo Monge saliban per Chaca chuntos, con lur amistanza indestruyible e confitanza sin de antorizio. Blecua se proclamaba "cazataire de luscos". Exir á o cambo estió perén bital por á er. De tornada á ra Residenzia, os suyos amigos yeran os culpables, con lurs partidas de cartas e rufiertas, d'o inamoramiento de Blecua con Chaca. Per tot ixo Chaca yera por á er un ideyal de bida.
Remató Blecua fillo acobaltando a onor que estarba colaborar "con busatros en o Archibo de Filolochía Aragonesa". Dimpuesas d'istas parolas, Alizia Canguero mos deleitó con una canta d'a suya autoría.
En zagueras, prenió a parabla o alcalde de Chaca, qui emponderó ro puesto do yéranos: emblematico e marabelloso, anque "no s'haiga feito de nuei", porque Alizia Canguero podeba cantar en cheso u en euskera porque yera marabellosa. Era repostió rapeda: "Como as lenguas". E toz li aplaudioron.
Recrosidó ro mainate que nomás restaban tres añadas por á o zentenario d'os Cursos. Endicó que ixa yera ra segunda begata que abeba ra onor d'estar en aquer auto espezialmén emotibo, con toda ra istoria que abeba Domingo Miral, o nombre d'o cual portaban o Enstituto e una carrera de Chaca. Agradexió á ra Unibersidá de Zaragoza ra organizazión d'ixe Diya; concluyó que asinas Chaca yera una ziudá unibersitaria, e lo deziba con muito argüello. Asinas mesmo, refirmó ro compromís de permanenzia e colaborazión mutua d'o Conzello e d'a Unibersidá por á prolargar ixa relazión e arribar á o dito cabo d'año. Subrayó que fer memoria suposaba contrimostrar que yéranos bibos e agradexitos con o nuestro pasato, e dimpués declaró zarrato ro auto, como rematanza d'o cual ascuitemos ro "Gaudeamus igitur", en a boz d'Alizia Canguero y en as cuerdas d'a suya guitarra pulsiatas á ixena con as d'o contrabaxo de Mario Cantabrana.
David Martínez López, Bombolón laminero.
