ENTA RA NORMALIZAZIÓN

        Cal aprender. O ser umano bibe t’aprender, t’amostrar, ta eboluzionar como presonas,  como comunidá, como soziedá… Con ixa enchaquia marchemos tres bombolons t’Altsasu, an yéranos combidatos por AEK (Coordinadera d’Euskaldunizazión e Alfabetizazión) que treballa cara ta ra normalizazión  d’a luenga basca con l’ ochetibo de que tota ra poblazión d’Euskal Herria gose bibir en  euskera con total acomodo. 

            Una sobrebuena representazión de AEK: Anne, Lurdes e Tito, mos acullió con os  brazos ubiertos en o cabo de semana d’o 19-20 d’otubre, que yera casualmén a feria  d’Altsasu. No podeban aber eslechito un cabo semana más aparén, pleno d’autibidaz, en  as que aprender tamién d’as suyas tradizions. D’ixa traza eban parato una chornata plena,  de treballo de día e de borina en rematar: ¿qué ye una trobada sin de borina? Ta ixa nuei  contemos antimás con Maialen, una alsasuarra bien conoxedera d’a suya billa e d’a suya  cultura.  

Anne, Lurdes, Tito de Korika y os bombolons Panzargüala, Borinero y Buxo en Alsasua

O programa d’o maitín estió tota una lizión d’istoria d’a organizazión AEK dende  os suyos orichens dica ra autualidá. Un proyeuto d’o que agora fan parti 600 profesors en  rechimen de cooperatiba que dende fa decadas ye adedicato ta l’amostranza de l’euskera  en a poblazión de más de 16 añadas e que tiene 100 locals d’amostranza clamatos  “euskaltegis” esparditos por toz os territorios d’ Euskal-Herria. 

Dimpués de bien minchar, a tardi estió adedicata ta esplanicar a “Korrika”, que  ye una cursa biañal que con gran esito sozial e de partizipazión recorre más de 2000  kilometros pasando por toz os puestos do bi ha “euskaltegis”, replegando al paso diners  ta ra finanziazión de l’amostranza de l’euskera. (Se beiga á o respeutibe l’articlo d’o  nuestro blog .

Estió muito intresán beyer de primera man cómo treballan por a normalizazión de  l’euskera: cursos (presenzials, en rete, cursos ta coleutibos espezíficos adecuatos ta os  suyos ochetibos: interpresas…) complementatos con estanzias en rechimen de internato  en “barnetegis”, a rebista “Aizu” (dirichita a presonas que son aprendendo euskera),  programas de prautica oral, iniziatibas multiestratechicas (con produtos de consumo  local)….antimás de cooperazión con luengas minorizatas, como a nuestra, entre atras.  

Bi teniemos asinas a oportunidá de conoxer una esperienzia imbidiable, muito  fortal e muito esitosa de normalizazión d’una luenga: l’euskera.  

Tot ixo en una morfuga de intrés e comprensión por a suya parti d’as dificultaz  que en o causo de l’aragonés entrepuzan o camín d’a suya normalizazión, ufrindo-nos consellos prauticos ta ra nuestra endrezera, que a suya fin ye asabelo de alueñata. 

Antimás mos en tornemos asperando que en a “Korrika” benién de l’añada 2026 tiengamos “un kilometro por l’aragonés” de traza que tamién astí podamos fer l’aragonés  más bistero.  

Por a sobrebuena acullita presonal, que mos fazió sentir comboyatos e como en  casa, e por a eszeuzional lizión soziolingüistica de normalizazión d’una luenga que bi espleitemos, no cal sino esprisar o nuestro sentimiento de fundo agradeximiento ta ra  representazión d’a AEK en as presonas de Anne, Lurdes, Tito e Maialen. 

Eskerrik asko, muitas grazias. 

Otubre de 2024. Bombolons Panzargüala, Borinero e Buxo.