OLGA Y LOS MINISTRILES. CONZIERTO EN SENA

O 28 de chulio zaguero “Olga y los ministriles” ofrexioron un conzierto en a localidá monegrina de Sena. A ocasión yera espezial al bi celebrar-se o cabodaño d’ as 50 añadas de ra asoziazión cultural local. Bi eba parata una zena “zelta” orichinata con a enchaquia d´unos treballos arqueolochicos que se fazioron añadas dezaga en ixa mesma localidá escando-ie repuis zeltas. A chenta, d´a que espleitemos firme toz os asistens que empliba-nos a plaza mayor á rebutir, estió asaber que bien organizata. Se conoxeba, en isto tamién, que ra asoziazión cultural leba muitas añadas fendo traña. Ta rematar mos ufrioron un brebache “zelta” feito con plandas naturals d´o monte que, al paso d´o concierto, feba remerar as lifaras en l’ aldeya gala d´Asterix , pero parando cuenta de que, en iste causo, con bardos e mosica bien pincha.

A costato d´a casa d´o conzello, una alfaya d´estilo aragonés d´o sieglo XVI, “Olga y los ministriles” emplioron a plaza de Sena con a suya mosica de muitisma calidá con sobrebuena represientazión de cantas en aragonés como “Mai”, “S´ha feito de nuei” e “Aqueras montañas”. O repertorio estió una selezión fundamén arradigata en o flolclore e cultura aragonesa, d´os cuals iste grupo fa perén una contrimuestra muito sobresalién. Cal acobaltar a boz de Olga e a bersatilidá mosical de Salvador, que de conchunta con os suyos compañers feba goyo sentir. Bi eba antimás una parella de baile, con a que o espectaclo yera encara más estetico.

Sena alza o suyo danze, como parti alazetal que ye d´a suya identidá. A gaita de boto que fazió sonar Salvador ye una reproduzión fidel d´una gaita de boto tradizional conserbata en ixe puesto. Preba d´o dinamismo cultural de Sena estió a partizipazión d´una colla de gaiters e dulzainers que tocón de conchunta con o grupo de Olga á ra fin d´o conzierto, antimás d´a interpretación d’a “Polka de Sena” con a partizipazión de bailadors populars locals. En o que pertoca á o patrimonio d’a billa, antimás d´a debandita casa d´o conzello, cal siñalar a ilesia d´estilo gotico tardano aragonés d´o sieglo XVI con una intresán torre-puerta e bellas casas señorials en a carrera de D.Benito Cavero.

Pero antimás d’ isto, ta yo estió sobre tot una nuei muito espezial al achuntar-nos tres antigos amigos d´os tiempos d´a unibersidá. Ésenos quiesto estar-ne cuatro pero con o cuarto nomás pudiemos charrar por bideoconferenzia. A trobada  mos fazió remerar con nostalchia os tiempos d´o colechio mayor Pignatelli de Zaragoza, en o que se pribaron as nobatatas por botazión d´os colechials ya en 1973. Remeranzas e recosiros de bida en chunto que mos beniban ta l´esmo e que, dimpués de tantas añadas,  parixeban tan frescos e reyals como si estasen d´ayer mesmo: tot pasa e tot atura, como bien diziba Machado, e o millor de tot ye l´amistanza.

Ya ta rematar, agradexer dende “ Bomboloniar” a “Olga y los ministriles” o suyo treballo mosical en aragonés no nomás en toz os suyos conciertos sino en a publicazión d´o suyo disco “Flamas”, de raso en aragonés. Con ixo se fa más bistera e se prestichia a nuestra chiqueta luenga , que bien que l’amenista.

AGOSTO 2023

BOMBOLÓN BUXO