O BICÓN D’ALQUEZRA

Ye un toponimo que si paramos cuenta en a suya etimolochía: D’o latín VĪCUS, promana l’aragonés bico : “barrio” en castellano. 

Bicón ye formato por bico, con o sufixo -on. Iste sufixo -on, ye un  achiquidor, contrariamén á o caraúter aumentatibo que presienta en  castellano. En o que pertoca á l’aspeuto apreziatibo iste sufixo pende d’o  contesto soziolochico u d’a intinzión presonal d’o que fabla, de trazas que  puestar despeutibo, pero tamién cariñoso. 

Imachen d'Alquezra de Bombolona Tozolona

O Bicón ye pues un bario chicorrón d’Alquezra, encara que ue ye  espaldato. O puesto contina clamando-se asinas. 

Bico difuera d’o casco urbano propiamen dito, difuera d’a puerta este,  qu’en l’autualidá ye espaldata. Yera un bico chicorrón, si paramos cuenta  d’os restos arquitectonicos que bi son. Bellas cantoneras d’as puertas mos  dexan imachinar as casetas que asti bi yeran. 

Una carrera estreita dende a puerta este, dica ra cortada, poco más  que unos 100 metros alto u baxo. Dica que se troba con a surtida d’a Cueba  Reina, seguntes a tradizión oral… “Cueba Reina” ye a boca d’un pasador  secreto que bi ha dende a Colechiata dica ra rematadura d’o Bicon. Pasador  ta poder fuyir sin ser-ie beyitos... 

En O Bicon … mos diz a lienda… qu’en as nueis de San Chuán encara  se sienten esbramucar os caballos d’os zaguers moros qu’en cuentas de  reblar debán d’os cristianos, gosaron alzar o suyo onor blincando por a  cortada d’a colechiata que da á pegar ta ra fin d’o Bicón.

Bombolón Buxo i Bombolona Panzarguala

O CHIRAR D’A BIDA

O chirar d’a bida ye un zarziello,

que  empentato por un nino s’esboca

por  una enruellata carrera encosterata.

Ye un trillo que redola e que redola,

e que á begatas se’n sale d’a garba.

Una farranca que redola entre a glera,

empentata por un río engaronato.

 

A  endrezera d’a bida  ye larguiza,

e amenista empentons bellas begatas,

igual como ixas campanas que bandían,

pero que ascape aturan sin os zereños brazos.

 

Malas que o tiempo esdebiene bi ha un gran peso

que en fundos avisos nos afunde,

en barucas que á ro nuestro esmo aturmentan,

e allora, allora l’alma amenista un buen esbrunze.

 

Pero, dize-me, biella choliba,

tú que abitas en l’altero d’os campanals:

¿Cuánto tiempo fa ya que mans umanas

no bandían con rasmia ras campanas?

 

                                           Poema 50 de Basemias d’un campasolo.

 

                                           Fabián Castillo Seas , Bombolón Retabillador   

Alcordanzas e recosiros.

Año 1951. Un choben plega en Barzelona, solenco, con o suyo gambeto rezienmén enguerato e a suya maleta de cartón, unico paramento (caragol con a suya casa denzima ). Con os suyos pinchos 18 años, repolito, ristolero, zereño, rebutién de goyo, agarrapizato a ra barra d’o trambía , amostrando ro reloch en o maniquiello, fendo-se a riseta  e soniando ro esdebenidero que acucuta pleno, preto, dezaga d’os suyos inozens güellos. Beniba de fundos tiempos, escuros  e d’ oraches aspros e tierras cutias,  que no tarten , abezatas a ra chelor, a ra nieu, a ro silenzio…No conoxeba solo que  casas esboldregatas e bidas crebazatas. 

A mía ye a istoria d’un pai que se’n fue ta Barzelona e d’una mai que soniaba en as beilatas en o suyo lugar una bida tranquila e que nunca no eba prexinato dexar a suya casa , su mai, a os chirmans, a tierra …ye bella istoria d’amor e d’esdebenidero.

Agora los me  miro e los beigo fendo gambadas por as Ramblas, politos, rufos, bien acotraziatos, mesmo argüellosos, o zielo como teito. 

Me se  mira mai,  me se  mira pai…una nina espunta igual como ra luna , como os cadiellos en as oliberas…

Ye un firme nabesar por os camins d’ a diaspora ( Ramblas, Plaza Cataluña, Tibidabo, La Pegaso, Hospitalet…), endrezera ta continar o biache  ta una bida millor. Emigrar como destín, no bi ha garra posibilidá de bida en ixa dura tierra de peñas altas, de fozes crepatas e foscas, d’ auguas chelatas (as gorgas d’ o riu , os brincos de l’ augua , fe ficazio si te capuzas …) e de zinglos alters. Barzelona e a bal d’ o Llobregat espuntan con asperanza . Ye o progreso ( de realogatos  a tener un auto 600).

Bombolona de Propio

A moler

A Trobada d’aragonés d’Alquezra ye ocasión de que chen de cualsiquier puesto, e profes que tamién d’o Semontano, s’amane ta ras chornadas, que ya han cumplito a suya terzena edizión en 2025.

Belún d’os asistens mos fa plegar que con ixa enchaquia ha puesto capuzar-se en l’aragonés que teneba alzato e bella miqueta amagato en o suyo esmo, permitindo que surta e rechite.

Bomboloniar s’enfuelga que ixas chornadas alquezranas faigan onra en a faina presonal e coleutiba de rebiscolar e desembolicar l’aragonés.

Iste ye o causo d’una presona que mos ha feito o presén d’a suya presenzia en totas as trobadas reyalizatas e que agora mos fa plegar iste treballo suyo publicato en “Fuellas” en 1995.  

_________________________________

A moler

Ya remata l’añada, ya son replegadas as olibas y ya s’han alzaus as escaleras en as bodegas. Dimpués de muitos diyas tancatas, as puertas de o torno se ubren. Dimpués de muitos diyas aguardando, agora todo ye prisas. Bi ha que aventar (ta triar as olibas de as fuellas), que embasar y que pesar.

En o Semontano de Balbadtro, encara bi ha muitos lugars en os que entre Nadal y Reis, s’ascuita o cluchir de os ruellos de piedra amasegando as olibas y furtando-les todo ro caldo que han alzau en as suyas carnes.

Cada begada son más as trabas (econimicas, sanitarias,…) ta que continen os tornos moliendo en os lugars. Añada par d’otra, a medrana de que o torno se tanque ye platera. Denguno s’atribe a dizir cosa de Balbastro u de Bierxe, puestos en os que bi ha de fabricas ta bender as olibas y mercar azaite. Pero ixo, ta ista chen aferrata a ra ruya tierra y a ros suyos fruitos, no lis cuaca cosa; como diz o mío pai, “ixo de saper que l’azaite ye de as tuyas olibas…”

O torno ye poquetes días ubierto, en primeras, porque poqueta chen encara triballa ras plantas y antimás; porque no todas as añadas o tiempo dixa que se faga güena cosecha.

Antis de que denguno muela, bi ha que fer as onturas, que no ye atra cosa que untar o torno porque ye reseco y se chupa muita azaite; por ixo denguno quiere ser o primero. Antis, por cada casa que moleba se lebaba un doble d’olibas (unos doce kg) y dimpués se partiba l’azaite. Agora se mercan as olibas y l’azaite se vende.

Ya feitas as onturas. Cada uno leba as olibas seguntes o diya que le toque moler.

En o piso d’enzima, bi ha una gruenza en o que se chita un pie d’olibas (cuatrozientos u cuatrozientos trenta kg).

Debaxo de a gruenza, bi ha un balsón grandizo y redondo en do s’engrana poquer a poquer mientras dos ruellos de piedra escomenzipian a chirar l’uno a ra par d’otro, dica que todo siga bien aplanau y feito una pasta (alto u baxo dos oras).

Iste balsón se comunica con una balseta más chicotona en do ba posando-se a pasta.

Con ista pasta imos rellenando as espuertas que se ban ficando una denzima d’atra. Isto ye parar un pie y seguntes o grande quesiga (más u menos kg) emplegaremos alrredol d’un ziento d’espuertas.

Dimpués, esta retaila se leba ta ra prensa y s’apreta dica que as espuertas dixen de sudar (asinas lo claman cuando l’azaite escomenzipia a surtir). Antis de disparar a prensa, s’escalda o pie para uta recullir bien toda l’azaite y no tresbatir miaja; tamién se fa isto ta que s’aclare y tienga millor color.

Por unos caños de tierra que bi ha debaxo, a prensa se comunica con unos tinetes que se plenan de o caldo que surte de a prensa. Se dixa posar, cuanto más millor, ta que l’azaite como pesa menos, se pose por denzima y siga bien separata de l’augua. Se reculle y se mide con un catatico de cobre, l’arroba (12’5 kg), estreito por a boca ,ancho por o culo y con dos ansas grandizas (como si esen orellas). O tornero lo fica en o tinete con cudiau ta que no se regüelba y no cullir miaja d’agua; se bazia en boticos en do caben cuatro arrobas.

Agora ya tenemos l’azaite nuestra pero bi ha que dixar o torno parau ta o que muela dezaga de nusatros. Bi ha que escapazar, ixo ye sacar a pasta prensada (cospillo) de as espuertas y dixar-las paratas ta otri.

Atra cosa que bi ha que fer ye limpiar os tinetes en do dimpués de cullir l’azaite han quedau as morgas (augua y posos); isto ba a parar ta otro cuarto separau de o torno, clamau “infiernetes” en do se posan as morgas en atros tinetes.

Cuando se plenan, torna a pasar o mesmo que antis, l’augua t’abaxo y una miaja d’azaite ya mas puerquiza y con fortor se posa denzima.

Con ista azaite de as morgas se pueden fer dos cosas; dixar-la posar tres u cuatro diyas, recullir-la y bender-la más barata u tamién se puede fer xabón. Agora ya denguna  muller lo fa, pero antis se la lebaban ta casa y en calderos de cobre la feban bullir y rebullir con sosa; con una espumadera replegaban o que flotaba, lo dixaban posar en caxons de fusta y listos ta labar.

Cuando se charra de o torno, no se puede rematar sin remerar os remojons; ye cuasi una tradizión en o torno minchar pan tostau bien untau con allo y ficar-lo dentro de o tinete; ta que l’azaite no s’escorrese y minchar-lo sin lamparons, meteban una plancha de cospillo debaxo, atra denzima y conforme minchabas, apartabas o cospillo y te chitabas bel trago de bino. Ya tos  podez prexinar que a semana de moler, en o bar, en bi ha poqueta chen.

M.M.