Qué podemos leyer en aragonés?

Bellas buenas ideyas pa que traigan os Reis a ninons e grans, recomanatas por o profesor de Literatura Aragonesa d'o DEFA  (Diploma de Espacialización en Filolochía Aragonesa) :  

Gracias, José Ángel!!

AQUELARRE DE REMERANZAS

¡Espiaza ista freda nuei que t’acoquina,

ubre-te o tozuelo anque siga á tozolons¡

¡Apara bien o caldero d’as alquimias,

e arrulla en er as biellas parolas

que allá luen encara tiens alzatas,

robinandosen ta cutio en a memoria¡

¡Zabuca temién as tuyas remeranzas,

os biellos trobos, cantas e falordias¡

¡Espacha ras basemias e remera os tuyos chuegos,

e para un dulze elisir d,a nineza,

ta que podamos beber d’as añadas que marchoron

como una machia que biache por o Tiempo¡

 

¡Arrulla bel siñal d’ontina e bel tarranco betiquera,

bellas fuellas xutas de figuera esmicazatas.

Un zapo d’os grans, rinchato d’esfumarriar,

e un gurrión de miedo pero que siga esplumaziato.

De contino s’adibe una bochiga cochín,

e bel moñaco feito con a masa d’as tortetas,

meya zesta de cospillo e un remullón d’azeite.

Zoquetas de chavalín e esgarrapaderas d’esparber,

Gallinaza d’as pirinas e cagaletas d’as crapas,

escagarzo d’o pilón e augua fosca d’a pozaca,

millor si ban capezutos e una mica de tarquín,

e meya ozena granotas d’a fuen de Monchirigüel.

Chita bin de celebrar anque siga con a mosca,

e adibe un rampallo d’ugas collón de michín,

sangre de petred, de charro e de porpúz,

e o pipón amariello de bel chordo negro.

Replega una ambosta litóns d’o litonero mas biello,

e fe un brebache de langostes escaldatos en bel cozero.

Una charinga de cañas ta mullar á ras mesachas,

e tamién chita o cañuto e o tirafondas de goma.

Un pozal d’augua d’o ballo cuan bache de Basacól,

bels pitos de cachigo si de beire no en tenez,

e bella cullebra zerruda si en sapez trobar,

e si no bos en trobaz, un zarpau de leremecos.

 

Remenar con a rasera sin espiguardar o fuego,

adibir un  manullo de ruta e una ambosta d’arañóns,

e as alas d’un moriziego cazato con trapo e percha,

e que rebulla bien o brebache si querez buena birolla.

 

¡Biene enta nusotros, biella e machica broxa,

Amuestra-nos os tuyos anzestrals arcanos,

E rechira con o tuyo poder de tantos sieglos,

A nuestra olbidatiza e robinata memoria¡

 

                          Fabián Castillo Seas, bombolón retabillador

                         Poema 18 de Basemias d’un campasolo

Goyosa Nabidá a toz

                       

III TROBADA - ALQUEZRA 10-11-12 de chinero

 

III TROBADA

 Nomás queda un mes escaso pa poder achuntarnos de nuevo con iste intresante programa

Si tos cuaca venir-ie serez toz bienplegatos

                     

“BEYER A CRABA ROYA”

Me fa goyo bomboloniar  ué con ista esprisión, por aber-la sentito en o mío lugar no fa muito.

À o respeutibe m’agana aturar-me en os siguiéns feitos:

1. L’aragonés un siñalín residual, con bella alfaya de cabo cuan.

Un lugar d’o Semontano. Yéranos charrando en o bar, en una morfuga lingüistica prou castellanizata. Asobén surten os  articlos (o, a, os, as u os suyos alomorfos ro, ra, ros, ras), a particla pronominal-alberbial (en, ne), repuis lesicos no guaire infrecuens, etc… que, pendendo de qui fable,  nomás amanixen cuan no para cuenta. Ixo sí, cualsiquier bocable, charrazo u estrutura gramatical, son emplegatos perén como cal: ye o que tiene l’aprendizache por trasmisión oral como a luenga materna.

Allora, cátate que un “misache” d’o mío tiempo (arredol de 70 añadas) fendo-ie memoria d’un acayezito que l’eba pasato, se conoxe que trobó en una angulema tarcual: “ya bié A Craba Roya”, dizió literalmén. Toz lo entendiemos perfeutamén. Denguno diziemos cosa, pero creyez-me que yo me quedé embabiecato e al paso bien contento de sentir una esprisión tan chenuina.

Pos ixo que, de tanto en tanto, mesmo en ambiens con prozeso de sustituzión lingüistica enantata se siente bella esprisión autentica como lo’n ye ista.

Parando iste chiquet articlo, he rechirato en bels dizionarios ta mirar si la rechistran. No lo fan Andolz, Mostolay, Martínez ni l’Aragonario. Sí que lo rechistra o Diccionario ortografico de l’aragonés (EFA). Tampó no lo he puesto trobar en o EBA (no marchaba) ni en “Refranes, dichos, mazadas…” d’Arnal Cavero, sin escartar que bi seiga pero que yo no l’aiga beyito al no estar arringleratos por orden alfabetico.

2. Antropolochía, cosmobisión en aragonés.

Cada luenga ye una traza d’esplanicar e beyer o mundo. Iste ye un buen exemplo ta l’aragonés. Si traduzísenos literalmén a esprisión t’ atras luengas no tenerba sentito. En castellano u catalán no se’n troba una parellana u cuando menos yo no en conoxco.

“A Craba Roya” ye o diaple u dimonio. En as clases d’esprisión oral d’o DEFA, con a mayestra Paz Ríos Nasarre, aprendiemos que tamién se diz “Patetas” e “Unglotas”. 

Se puede beyer una craba roya, si ye que l’animalón ye d’ixa color, pero en aragonés “A Craba Roya” no ne b’ha más que una, como a mai.

Manimenos, a identificazión d’o diaple como una craba u buco ye un feito unibersal,  reflexato machistralmén en aquelarre por Goya entre atras muitas representazions e carauterizazions. Coneutato con iste conzeuto ye a nuestra esprisión.

 “Beyer A Craba Roya” no tiene garra sentito literal sino fegurato:  ye estar apurato de tot, en zagueras, en “as tres piedretas”, amán d’a “bal de Josafat”, en o branquil d’a muerte… 

No me digaz que “beyer A Craba Roya” no ye una esprisión bien pincha e bien chenuina que tresmina una traza de beyer o mundo e a bida en o que pertoca a esprisar a esperiencia unibersal d’o sufrimiento e d’a muerte.

Un exemplo más, e bien platero, ta enfrontinar sin de complexos aquers que encara gosan tener barra de dizir que l’aragonés no esiste, ye un dialeuto, u simplamén una traza de“charrar mal” o castellano como mos carrañaban e correxiban en a escuela. 

Abiento de 2024

BOMBOLÓN BUXO

Curso en Zaragoza

Os días 19 e  20 d’ o mes d’ aborral se fazió   un curso baixo ra enfiladura de Manuela Adamo en l'aula d'a Istituzión Ferrando ro Catolico, en a Deputazión d'a ziudá de Zaragoza.

En o  curso, con o títol  Folcloristas olvidados  en la España de Franco: Lomax, Schneider , Larrea, presentato por Carlos Forcadell, direutor de l'IFC, partiziporon os ponens Manuela Adamo, Vincenzo Santoro, Ascensión Mazuela e Mario Gros, toz els relebans estudiadors d'o folclore.

Tamién dintro  d'iste curso se fazió ra presientazión d’o libro El tarantismo mediterráneo. Una cartografía cultural, de Vincenzo Santoro , traduzito por Manuela Adamo, en a librería Calamo. Comboyoron a ro taute en o auto Manuela Adamo e María Tausiet.

Como diz en o programa d'o curso, l'ochetivo d'o mesmo ye ra recuperazión  d'a importán fayena  que enfiloron  istos folcloristas, en parti  uei olbidatos, de replega  d'o folclore en a epoca d'a posguerra, en os difízils tiempos d'o franquismo, Sin els e ro suyo triballo, a recostruzión d'as nuestras tradizions  mosicals populars , manipoliatas  e amagatas  por a cultura ofizial d'o rechimen, uei serba ta nusatros  imposible correxir  toz os esbarres que se fazioron e restaurar en o posible l'autentizidá d'o que estió ro nuestro folclore popular.

Bombolona De Propio

Omenache a Ánchel Conte

O dia 23 d’ o mes d’ aborral,  consonando con o cabo d’ año d'a muerte d'Ánchel Conte, se le fazió en Barcelona un omenache. L'auto tenió puesto en o IES Moisés Broggi, istituto do treballó os zagueros años d'a suya bida. Se reunioron allí presonas que lo conoxioron y estimoron: amigos d’o Zentro aragonés (CAB), compañers de treballo, alumnos de bachillerato y ESO e ros suyos familiars, escolanos  d'aragonés d'os primers años en o CAB e asabelala  chen que  lo conoxió, como presona e como poeta.

L'auto empezipió con a interpretazión de poemas musicatos en o disco Cadenzias  por parte de bels integrans d’o grupo Os Chotos . Una mayestra de zeremonias endrezaba l’ auto y enfilaba  os parlamentos, que se suzedioron con emotibidá en una sala plena de chen, toz aplegatos  ta fer memoria e recrosirando  a ro mayestro, a ro poeta , a l'amigo. Con as parabras de cadagún d'os interbiniens,  l'auditorio podió conoxer a fegura e ra bida d'Anchel dende totas as ambiestas:  

 d'o poeta que estió e ye , d'a erudizión d'o estudioso d'a Istoria ,d'a luita de l'autibista embrecato con as suyas ideas politicas e con a militanzia cuentra ra homofobia en a suya condizión de comunista e homosexual. D'a suya funda dedicazión a l’ amostranza, d'a pasión por o trato cutiano con l’ alumnalla e  d'o suyo amor contino e  increbantable por Aragón,  sin excluyir  a  conbibenzia con totas as tierras e chens de prozedenzias esferens  con qui compartió os intes d'a suya bida. Bi abió amás  rezitazión de poemas e  una contrimuestra espontania de danzes d'o Sobrarbe ( él estió o creyador d'o grupo) con os  mosicos de Chundarata.

A sala s'implió de parabras en as tres luengas d'Aragón.

L’ auto estió organizato por o CAB  ( Centro Aragonés de Barcelona).

Bombolona De propio

Una canta de Leonard Cohen: Suzanne

La canta: SUSANA

Lo títol orichinal: SUZANNE

Lo taute, mosicaire e cantaire: LEONARD COHEN

L'idioma orichinal: ANGLÉS (CANADÁ)

En l'anyo: 1967

Enlaz a Youtube: https://www.youtube.com/watch?v=n_56ep729TE

A Canta

Canta escrita per o poeta e mosico canadiense Leonard Cohen. Lo suyo orichen ye un poema que Cohen publicó en 1966 dintro d'o libro Parasitos d'o Zielo (Parasites of Heaven). En o mesmo anyo, Judy Collins en gravó una versión e a l'anyo siguient, la gravó lo mesmo Cohen. De graniza valura lirica, la canta ye un pinte, un quadro, un retrato d'una nuei pasata per una parella [Cohen esplanicó muito dimpués que ixa trobata heba existito de veras, encara que sin d'a fuerza erotica que rechuma per os poros de tota la canta], la protagonista Susana e lo mesmo Leonard Cohen. 

Cohen i detalla la suya percepción d'a personalidat de Susana, lo sentir que le va prevocando a él, l'atracción que brulla entre éls, amants, imants, aimants, l'estau de confianza mutua, l'eternidat que viven en una nueit que ye un inte. Lirismo, erotismo, amor, ensuenio, poquetas cantas transmeten sentimientos e creyan sensacions tan fundas e, a la vegada, tan fortals como ísta. O ríu, present en tota la canta, ye lo San Lorién, e la ciudat, Monreyal, lo lugar de Cohen. E encara, p'adubir dimensions a la canta, i ha la referencia a Chesús de Nazaret, tan especial venindo d'un chodigo.

A més d'a version orichinal de 

Judy Collins, [https://www.youtube.com/watch?v=F3WOAqtRRvQ]

se n'han feito una infinidat. Per meter-ne belunas aquí, en acobalto las de 

James Taylor, [https://www.youtube.com/watch?v=8QzRYk62cfk]

Roberta Flack, [https://www.youtube.com/watch?v=Ud9KV-2ro_g]

Nina Simone, [https://www.youtube.com/watch?v=fZZ8_2fUfZ0]

Joan Baez, [https://www.youtube.com/watch?v=FaD7alSpl48]

la chocant de Tangerine Dream, [https://www.youtube.com/watch?v=oH2rsAIPke0]

e la magnifica, en catalán, de Toti Soler [https://www.youtube.com/watch?v=RJj2o919dtk]

O taute, mosicaire e cantaire

Leonard Cohen, chodigo cualo nombre hebreu ye prou més embolicau, estió naixito en Monreyal (Quebec) en 1934 e murió en Os Ancheles en 2016. Anglofono, encara que quebequés, estió poeta, cantaire e novelista, cualos testos son emotivos, intimistas e de gran lirismo. 

No empecipió la suya actividat como cantaire que a los trenta y tres anyos. Los temas d'as suyas cantas son universals, como l'amor, las relazions personals, la sexualidat, la depresión, la muerte, la relichión...  Dende o 1994 dica o 1999 estió retirato en un monesterio budista en Los Angeles, en 1996 en estió ordenau monche. 

Dillá de Susana, atras cantas creyatas per Cohen estioron Aleluya, Prende iste bals, inspirata en un poema de García Lorca, Ei! ixa no ye manera de despedir-se, O Partisano, O Futuro e atras muitas, totas cantatas con o suyo ritmo cuasi monotono, l'austera a mesa en escena, con a suya voz greu e l'esprisión seriosa.

La traducción

• La poesia que porta iste testo en as venas dificulta en muitos casos trobar soluzions direutas pa la suya traducción. Manimenos, ixa mesma esencia poetica fa a saber de bonico fer-ne la traducción e rechirar ixas solucions. Puestar ístos son los dos casos que eixemplifican millor isto que digo:

For you've touched her perfect body with your mind

que traduzco ta 

con l'esmo la polideza li has tocau

u siga, de mind ta esmo e de perfect body ta polideza e cambiando l'orden d'os sintagmas dintro d'o verso

She is wearing rags and feathers

From Salvation Army counters

que traduzco ta

de vestiu porta perreques

d'ixos de beneficencia,

u siga, de rags and feathers ta perreques e de Salvation Army ta beneficenzia, que pa yo que, en o nuestro contexto, se capirá millor.

Me se entrefá que no son malas solucions i que encaixan prou bien con o ritmo e a metrica.

• Atras traduccions especificas son:

de takes you down ta te fa ta

de wavelength ta aura (Then she gets you on her wavelength ta te mete en a suya aura), traducción ni literal ni directa, pero que yo me pienso que reculle bien la ideya d'o verso orichinal.

• En a traducción de Long before the sky would open e per razón d'a metrica, meto l'articlo o aón, per coherencia deberba meter lo: muito antis d'ubrir-se o cielo.

• E tamién per exichencia d'a metrica, traduzco And you want to travel blind ta a ciegas quieres viachar, quan m'hese estimau més meter a boticiegas en cuentas d'a ciegas.
  

Suzanne takes you down to her place near the river You can hear the boats go by You can spend the night beside her And you know that she's half crazy But that's why you want to be there And she feeds you tea and oranges That come all the way from China And just when you mean to tell her That you have no love to give her Then she gets you on her wavelength And she lets the river answer That you've always been her lover And you want to travel with her And you want to travel blind And you know that she will trust you For you've touched her perfect body with your mind. And Jesus was a sailor When he walked upon the water And he spent a long time watching From his lonely wooden tower And when he knew for certain Only drowning men could see him He said "All men will be sailors then Until the sea shall free them" But he himself was broken Long before the sky would open Forsaken, almost human He sank beneath your wisdom like a stone And you want to travel with him And you want to travel blind And you think maybe you'll trust him For he's touched your perfect body with his mind. Now Suzanne takes your hand And she leads you to the river She is wearing rags and feathers From Salvation Army counters And the sun pours down like honey On our lady of the harbour And she shows you where to look Among the garbage and the flowers There are heroes in the seaweed There are children in the morning They are leaning out for love And they will lean that way forever While Suzanne holds the mirror And you want to travel with her And you want to travel blind And you know that you can trust her For she's touched your perfect body with her mind.

Susana te fa t'o suyo puesto a canto d'o ríu puedes sentir-ie las barcas, e pasar la nueit con ella sabes que ye barrenata, per ixo quieres estar-ie e t'ofreixe té e taronchas, que promanan luen d'a China E cuan ya vas a dicir-li que no en tiens d'amor pa dar-li te mete en a suya aura e deixa que lo ríu diga que serez amants pa cutio E quieres viachar con ella, e ciego quieres viachar sabes que con tú confía con l'esmo la polideza li has tocau.                  Chesús yera marinero quan caminó sobre l'augua e pasó a muntón de tiempo mirando dende a torre e quan sapió que podeba només vier-lo qui s'afoga dició "Serán marineros dica la mar los libere" pero él yera trencau, muito antis d'ubrir-se o cielo desemparau, cuasi humano, en un inte tu sapieza afonó. E quieres viachar con él, a ciegas quieres viachar estás que con él confías con l'esmo la polideza t'ha tocau. Agora te prende a man e te conduce t'o ríu, de vestiu porta perreques d'ixos de beneficencia, lo Sol como a miel s'asoma sobre la Ilesia d'o Puerto e t'amuestra a mirar entre las flors e la basuera i ha herois entre las algas, i ha zagals en o maitín s'abocan enta l'amor e i s'abocarán pa cutio. Susana con o espiello. E quieres viachar con ella, a ciegas quieres viachar puedes confiar con ella con l'esmo a polideza t'ha tocau. Bombolón J. Ll. Carbó