CATAROS: OS BLOSOS (II)

En l’articlo prezedén d’o mesmo tetulo se siñalaba que con a enchaquia d’a erechía e a cruzata cuentra os cataros bi abió fundas implicazions puliticas entre os condaus oczitanos e a corona d’Aragón. Ista custión istorica será l’ocheto d’o presén analís, que por fuerza no puestar más que por denzima denzima, pues no baga d’ entrar-ie en profundidaz.

Os estaus d’o sur d’a Franzia autual yeran enreligatos istoricamén con Aragón dende o suyo naximiento como reino. Como lo’n yeran tamién con os condaus catalans, en particular a Probenza.

En o que pertoca á l’Aragón meyebal, matrimonios d’a casa reyal, interpresas melitars, pautos de  pastors, e tota mena de intercambios e de relazions eclesiasticas e sozials yeran abituals entre  os dos bersans d’os Pirineus, que allora no teneban o fortal carauter de buega que alquirioron  dimpués en a edá moderna. Antiparti as luengas: l’oczitano, l’ aragonés e o catalán teneban  asabelas afinidaz, compartindo en bel grau a cultura oczitana d’os trobadors. 

Como chiqueta contrimuestra d’as relazions istoricas traspirinencas nomás cal siñalar un par de  feitos : o rei Sancho Ramírez nimbió ofrexito á ro suyo fillo caganiedos, Ramiro (que dimpués  plegarba à ser o rei “monche”), ta o monesterio de Saint Pons de Thomières (Sant Ponç de  Tomièiras, en oczitano), que se troba no pas muito luen de Narbona á cuasi 500 kilometros de  San Chuan d’a Peña. O bizconte Gastón IV de Bearn(u Biarn) partizipó de traza muito destacata á costato d’Alifonso I “o Barallador” en a conquista de Zaragoza á os almorabides en 1118. A suya  aduya tenió tanta importanzia que estió nombrato primer siñor d’a capital d’o reino. Si tos  amanaz ta o museu d’a basilica d’ o Pilar, podrez beyer-ie l’orifán de guerra de Gastón de Bearn,  una esconoxita e muito polita alfaya feita en bori en o sieglo onzeno. Creyez-me: ye una pieza istorico-artistica que no pas tos dezeuzionará. 

Plegatos ya t’o sieglo XIII con os cruzatos d’o norte de Franzia emburzando-los e fendo esferras e orrors à embute , os xorrontatos estatos oczitanos, tornan toz a güellada ta Pietro II, rei  d’Aragón e conte de Barzelona ta demandar-li aduya cuentra Simón de Monfort. O conte Ramón  VI de Tolosa, cambea en chinero de 1213 o suyo churamento feudal que d’antis más pendeba  d’os reis de Franzia, ta o rei d’Aragón Pietro II. Se trencaba asinas una línia churidica de cuatro  sieglos, dende os tiempos de Carlomaño. Antiparti Ramón VI yera casato con Alienor d’Aragón,  chirmana de Pietro II, igual como o suyo eredero , o futuro Ramón VII teneba por muller a Sancha  d’Aragón, unatra chirmana d’o rei. Cal acobaltar o enreligamiento dinastico que suposaban ixos  casorios, parando cuenta d’ as fundas implicazions puliticas que teneban os matrimonios entre  prenzipes en ixas embueltas meyebals. 

Asinas os condaus u bizcondaus de: Biarn, Bigorra, Comminges (Comenge), Gevaudan, Millau,  Probenza, Tolosa, que yera o prenzipal , e Montpellier que yera siñorío propiedá de María, a  muller de Pietro II, pendeban en 1213 d’a corona d’Aragón. Bi eba allora una mena d’estau  traspirinenco que s’estendillaba dende o Moncayo dica ras Alpes, en parolas de Michel  Roquebert, o prenzipal istoriador d’a cruzata cuentra os cataros. 

Pietro II d’Aragón teneba gran prestichio dimpués d’a vitoria d’as Navas de Tolosa (no trafucar  con a Tolosa/Toulouse oczitana) en a que eba partizipato l’añada d’antis, en 1212, à costato  d’Alifonso VIII de Castiella, que l’organizó, e de Sancho o Fuerte de Nabarra. A redota almoade,  en a que no bi partiziporon o rei de León, Alifonso IX, ni o de Portugal, Alifonso II, siñaló o  prenzipio d’a fin d’o poder musulmán en a peninsula. Ta ixa baralla tamién eba pedricato o  mesmo papa Inozenzio III unatra cruzata. Cal remerar que ixe papa eba coronato en Roma como rei a Pietro II en 1204. Como se puede beyer en a catafila de cruzatas, luitas relichiosas, barallas,  imperios, entrebenzions papals en a politica, etc, o poder ye estato perén l’ochetibo à aconseguir,  rebestito d’o que calga. E ixo, por l’inte, no cambea guaire. 

Ta mirar de protexer à os suyos subditos oczitanos Pietro II prebó en primeras a endrezera  diplomatica pero, como ista fazió burro falso, en zagueras le tocó enfrontinar-los militarmén. O  día 12 de setiembre de 1213 o suyo exerzito de caballers chunto con os aliatos oczitanos luitaron con os cruzatos de Simón de Montfort en Muret, chunto à o río Garona. O rei Pietro yera muito amán d’as primeras ringleras e estió amortato en un emburze d’a caballería cruzata. En morir-se Pietro II tot l’exerzito aliato s’esboldregó sufrindo-ne de camín asabela mortalera. Paradoxas d’o destino, Pietro II d’Aragón, que ye pasato t’a istoria con o sobrenombre de “o catolico” s’amortó esfendendo os suyos feudos oczitanos proteutors d’ ereches cataros, en a cruzata pedricata  contra istos zaguers por o mesmo papa que lo eba coronato. 

Pietro II estió apedecato bellas añadas dimpués en o monesterio de Sixena, que eba fundato a  suya mai e reina d’Aragón Sancha de Castiella. 

Dimpués de 1213 a corona d’Aragón encara conserbó bellas tierras en Rosellón e belatras  redoladas amán de Carcasona, pero con a redota de Muret remató o proyeuto d’estato  traspirinenco de Pietro II d’Aragón. O suyo fillo, Chaime I, cambeó a politica de enampladura d’as  buegas d’a corona ta part d’o Mediterranio, con a conquista de Mallorca e Balenzia. Añadas  dimpués o condau de Tolosa estió adibito t’o reino de Franzia, disparixendo legalmén. 

Asinas, as luitas que en ixe inte de 1213 eban feito chuñitas as chens d’un costato e de l’atro d’os  Pirineus, continoron deseparatas ya en cadagún d’os dos bersans. Disgraziatamén a istoria mos  amuestra perén que malas que se’n remata una de guerra no gosa tardar muito en empezipiar se-ne atra. En ixas bi semos encara uei, güeitozientas añadas dimpués.

Portalada d’o monesterio de Sixena. Panteón reyal de Pietro II d’Aragón.

ABRIL, 2024. BOMBOLÓN BUXO