O Pai que aponderaba con delera:
Ize asina:
Güena cosa de días estío Toñed de casa Lorenzico zilebrando a güena noticia que l’iban dau de que teneba que fer o Serbizio Melitar en Pamplona. En aqueras añadas d’antis, cuan os misaches se feban biellos sin salir cuasi d’o lugar, a Mili yera a millor enchaquia ta biachar y conoxer cualcosa ixos mundos de Dios. A Toñed l’aganaba y le feba muito goyo, anque no toz os quintos yeran d’a mesma traza de pensar. Bi eba beluns que no lis febas salir d’o cado de casa ni con o furón. Puede estar que tenesen cualcosa de razón, pos en aqueros años d’estreitezes en mica puestos enreligaban os cans con longanizas y en as casas abeba muito treballo.
En casa Lorenzico bibiban os pais y tres chirmans, Toñed yera o caganiedo, y abeba poqueta cosa que esgarrapar. Cuatro olibas, cuatro almendretas, un güertichón dezaga de casa y una patolera d’animals por o corral, pirinas, coniellos, corderos, bella craba, dos latons d’engorde en una zolle y un burricallo. Os piqueros no eban dentrau en ixa casa, mesmo dende que la fiziorón os bisagüelos.
Pasoron bellos meses y Toñed escribió una carta á os suyos pais an lis diziba que eba trobau una zagala d’a que s’eba namorau, que yera de muy güena familia y que ya pensaban en fer casorio.
Asinas que o pai, mirando d’aduyar a o suyo fillo a conserbar aquera güena amistanza, que bien poderba estar que se combirtiese en a primera choben d’e casa Lorenzico, que tan prezisa yera, prenzipió a escribile á o zagal cartas an l’iziba as grans cullitas que teneban y o bien que bibiban en aquera casa. Y Toñed l’en leyeba a ra mesacha:
Iste año en os reganos de San Julián tenemos de tot, cada dos dias puyamos un biache con dos cuebanos a caramuello de hortalizias, nos ha feito guen orache y a zequia baxa plena d’augua. Y en atra se leyeba: Dimpués de muitos dias de zeprenar, ayere rematemos de coger as olibas, y contando todas as dembas imos replegau zincuanta piez. Imos feito una rematadura pa combidar a crespillos y poncho a meyo lugar. Ize ra tuya mai que iste ibierno mataremos os dos latóns pa fer más mondongo, mira de pedir premiso y t’en biens una escapada por aquí. Asinas en atra d’Agosto li diziba: Pos chiquer, entre os tres no adubimos a dallar o grano d’as dembas d’o Plano, asinas que lebamos una cuadrilleta segadors que nos aduyan. Güena añada ista, as zafras ya son emplitas d’ordio, no mancará prenso ta ro ganau ni ta os bajes iste ibierno. A ra tuya mai ya l’agana trayer á os piqueros ta reparar a frontera de casa y fer un escusau nuebo. Y ta sanmiguelada l’escribiba: Quinze dias lebamos trasegando por a bodega, pisando ugas en o truxal y plenando tonels de mosto. Imos bendemau a biña y tenemos bin ta’l gasto de casa y ta bender.
Con ista mena de notizias aquera zagala cada begata yera más encandilata con aquer eredero que eba trobau d’o Somontano, y Toñed cada begata más goyoso pos a relazión iba asabelo de bien y ya charraban de casorio.
A rematadura d’ista historia estió lo dia que i plegoron ta o lugar os nobios en una galera d’aqueras que beniban dende Laszellas, con a idea de fer o casamiento. Era, toda emperifollada, trayeba un par d’arcóns con o jobar y a dote, toda emplita de goyo, también trayeba como osequio d’os suegros ta Toñed, una capa, un bastón y un sombrero.
Nomás dentrar en o lugar, era prenzipia a relogiar as casas y a que más gran y güallarda beyeba, li parixeba que yera a d’o suyo nobio. Y en casa d’o Medico, de grans balconadas, diziba: -Ixa bede estar a tuya casa, berdá Toñed. -No chiqueta, no, que encara no imos plegau. Y ya en a Carrera Mayor: -Pos de raso que estará ixa con ixos arquetes en a falsa, berdá nino? -No nina, no, que ixa no ye. Y en a Plaza Mayor te salta: - Ixa tien que estar, a que tien l’escudo de piedra denzima d’o soportal? -No nina, que ixa tampo no’n ye. Y ya se metió toda nierbuda.
Endrezan carrera San Lucas t’arriba y allá a ra fin d’a carrera plegan ta debán d’una caseta con a frontera d’adobas y cuatro finestretas chicotas, por ande saliba una fumera que parixeba que se cremaba tot. Y li dize Toñed: -Ista ye, parexe que están enzendindo o fogaríl.
¡Oy chiquer, malas que bido ra zagala aquera ambiesta, con os tres ombrachos acoflaus en as cadieras y aquera lola estizoniando y con o fuelle en a man, preto a plorar y no se podió aconortar en toda ra nuei.
A l’otrol día, dimpués de muito estroliquiar, a zagala determinó de marchar. -Ande ba parar, nino, ista ye a tuya casa, pos cuantos embustes dizía o tuyo pai en as cartas, y yo bien melampa d’abierlo-me creyiu, desgraziada de yo, maitín m’en tornaré t’o mio lugar, como i de quedarme en ista casa que parixe un foricachón.
Asinas lo fazió y al mes benién lis plego una carta y dende allora se rezita ista copla:
Li ha plegato una cartica
a Toñed de Lorenzico
pa que ritorne ra capa
o bastón y o sombrerico
Fabián Castillo Seas, Bombolón Retabillador
Iste cuento lo contaba Antonier, lolo de Marisa
No hay comentarios:
Publicar un comentario