“BIEN SE BALE, S’HA PERDIU O BURRO PERO SE TROBÓ RO RAMAL”

Os dominches á ra una d’o maitin ye una ora muito propia ta fer o bermú, e si ye o bermú d’a fiesta encara millor. Tanto si s’han baixau as brisas como que SI no. En a  zaguera fiesta chicota, d’Alquezra, en primeras d’agüerro ro conzello mos sosprendió con  un conzierto de jazz. No estió un conzierto de trazas normals. Yeran ninos os que mos lo  ofrezioron. Una orquesta feita por zagals e zagalas de tota ra probinzia, dirichitos por  Dani Escolano. 

Iste grupo de zagals e zagalas son parti d’un proyeuto que se clama “Jazz for  KIds”, que chusto ista añada fan 10 años d’a suya empezadura. E aprobeitand ista  enchachia son premiatos con o premio d’Altoaragoneses de l’año.  

En iste proyeuto se desembolica una amostranza de totas as trazas de mosica d’o  jazz e d’a mosica moderna. A más de escuela de jazz ye un puesto creatiu ta chobens  artistas, an se mete en balura a creatibidá d’os escolanos como ochetibo. 

L’amostranza d’a escuela de “Jazz for kids” ye trestallata en tres libels, con  l’ochetibo zaguero de que cualsiquier d’os escolanos, en rematar o suyo paso por o  proyeuto seiga capable d’optar a una plaza d’un conserbatorio superior, ya seiga d’Aragón u d’España: 

- Libel 1: de 10-12 años, nozions musicals basicas ta encomenzipiar a estudiar  jazz e improbisazión. Se treballa perén chuntos en colla, de 10 a 15 mosicos  an se desembolica la amostranza d’o lenguache d’o jazz, l’articulazión e o  fraseyo propio d’os esferens estilos. Con Román e Alexandro Esperanza como  mayestros. 

- Libel 2: de 13-15 años, ya abezatos con os estrumens, con o firme ochetibo de  refirmar as trazas mosicals como ro blues e escalas modals basicas d’improbisazión. Emcomenzipian a desembolicar a suya creatibidá. Dani  Escolano e Alejo Ziria dirichen ista colla de 14 escolanos. 

- Libel 3: de 16-18 años ya con un muito dominio d’o estrumens, e que o suyo  ochetibo final ye parar a os escolanos ta una preba d’azeso ta un Conserbatorio  Superior de mosica. Dani Escolano e Alejandro Esperanza dirichen a un grupo  de 6 escolanos. 

Una d’as atras disziplinas que se bi amuestran ye a escuela de teyatro mosical, an  s’achunta a mosica bocal, o teyatro e ra danza con o fin de fer produzions de muitisma  calidá eszenografica. Pato Badián e Irene Alquezra paran a 16 escolanos ta fer as suyas  produzions. 

Ta fer parti no más cal ser-ie matriculato en bel zentro mosical d’Aragón, ofizial  u no, tener un libel menimo mosical, e un tiempo entre 9 e 18 añadas. 

Ixo de salir d’a casa e sentir mosica de jazz en o canto casa tuya… fa muito goyo.  E más que más si no ye reguetón, que no digo yo que no seiga mosica… que lo’n ye¡ pero yo encara no le trobo ro misterio… anque preixino que a istos zagalons también les  cuacará. Como cal que seiga!!! que ta ixo son d’ista chenerazión. 

Bi ha muitas memas de mosicas, totas igual de güenas, igual d’importans, mosicas  que s’alimentan d’otras mosicas, que influyen en chenerazions posteriors ta creyar nuebos  estilos..  

Cal amostrar a ras nuebas cherazions estilos esferens ta que faigan a mosicas que a ers les faiga goi, que’n creyen, que’n toquen, que’n sientan , que bailen mosica,  qu’espleiten fendo e amostrando a suya mosica. E si isto plega ta o puesto que tiene que  plegar… podremos dir: “BIEN SE BALE, S’HA PERDIU O BURRO PERO SE TROBO RO RAMAL”.

    Bombolona Panzargüala