TA QUE UNS PODAMOS BIBIR...

 

A biella crapa remuga e me se cata,

mientres o suyo crapito puya por as pinganetas

e blinca goyoso pos no conoxe o suyo destín.

A biella crapa remuga e me se cata,

mientres muígo o suyo braguero rinchato.

Plenaré una pichela de blanga lei

e encara dimpués o crapito abezará.

Muitos días ista eszena se segundía,

os tres chuntos beyemos á ormino amanixer,

dica que un maitín a biella crapa se permena

e o crapito no sospeita o suyo destín.

De chicot yo ploraba con azetas glarimas

cuan o mío lolo degollaba os tiernos crapitos.

Pero er m'amostro con plateras parolas que remero:

-Ta que uns podamos bibir,

atros tienen que morir.

E tot remata con un esberreco afogato

por as mías mans ensangrentatas.

E a biella crapa nierbosa s'amaga en un cantón,

pero encara remuga e me se cata.

Sin dandalo berruntará pasatas esperenzias.

Fabian Castillo

Bahirdar Zuria - Bombolona Naval