Entreautos

 Entreautos, de Ana Giménez Betrán

A obra Entreautos de Ana Giménez Betrán estió editata por Gara d’Edizions en otubre d’o 2014, estando ro cuarto lumero d’a Colezión Arto, e premiata con o Premio de Nobela Curta Ziudá de Balbastro en a suya VIII edizión. Sobrebuenísmo premio ta una obra eszelén.

Ana Giménez Betrán fue naxita en Uesca en 1968. Ye Lizenziata en Filosofía e Letras por a Unibersidá de Zaragoza e mayestra de Educazión Secundaria dende 1996. Drento d’a suya fazeta filolochica ha publicato esferéns treballos: Apara l'oído y beyerás as cosas claramén (1994), Bellas aportazions a la toponimia d'Aratorés (1999), Tres fitos d'a bida: una cosmobisión aragonesa (2000) u Reloch de pocha no ye solo una nobela (2011-2012). 

Anque talmén ye más conoxita en a suya fazeta de creyazión leteraria, con esferéns treballos tanto en relato curto: Foratos (2007), Esquite (2011) y ADN (2013, Premio de Relatos “Luis del Val”); como en nobela: Ixos tiempos güegatizos (2000, Premio Concello de Lo Grau), Palestra (2005, Premio Internacional de novela corta “Chusé Coarasa”) u, a nobela que aquí femos rezesión, Entreautos (2014). 

Como emos puesto beyer, a obra de Ana Giménez Betrán ye plena de premios e, profes, no ye casualidá. Como tampoco no ye casualidá que a taute eslexise enmarcar Entreautos en a Uesca de 1932. No solamén por a conoxita falaguera e traza d’a taute pa fer biachar á o leutor á intes sucheréns d’a Istoria, sino tamién porque aquera Uesca yera un rebullizio prauticamén en tots os aspeutos. Politico, cultural, umano… Rebullizio que, antiparti, yera reflexo d’un cambeo en a España d’a rematadura d’o primer terzio d’o sieglo XX. 

Entreautos ye una nobela istorica que mos acompaña d’a man amostrando a idiosincrasia cultural d’aquera Uesca d’a que dizen estió tan autentica como rezia. A enchaquia prenzipal d’a nobela no ye atra que as esferéns representazións que l’autriz Margarita Xirgu fazió con a suya compañía teyatral en o teyatro Olimpia de Uesca en chunio de 1932. 

Por causa d’a suya estacha en a ziudá, e grazias á ra tramata de personaches e istorias que amonico ban texendo-sen, Ana Giménez Betrán mos fa una nabeganzia por as carreras e prexinallos d’os oscenses d’a época. Fictizios, pero tan reyals…

A obra se trestalla en cuatro “autos” (Asayos, Estreno, Telón e Addenda) e, fendo onor á o tetulo, amostra de qué traza ra bida ba desbastando-se-ne entre els. Anque a obra se trestalla como si se tratase d’os pasos cronolochicos en o estreno d’una obra teyatral (con a suya chestazión, os suyos asayos, o suyo estreno u a suya cretica por parti d’o publico), están os feitos bitals que entre els surten os autenticos protagonistas. 

De qué traza se texen as amistanzas, de qué traza fluyie a bida, de qué traza zarrando ros uellos puedes prexinar-te en una d’ixas carreras, en una d’ixas charradas… Tot ye importán. 

Magali, una choben rasmiosa de 25 años, fa ras begatas de rechenta en una fonda oscense e de protagonista d’a obra. Ye aquí, en os Asayos, do se mos presientan a fonda e os personaches que cubilla: Carmen e Chusé, pais adoptibos de Magali e amos d’o negozio; Adela, chirmanasta de Magali e filla de Carmen e Chusé, que a resultas d’un disgraziato azidén quedó muta e “cuasi una muller por difuera pero una ninona por drento” (pach.11); Antonio Martí, catalán de naxienzia e tratante de telas, trocas e bienzas, ye uno d’os millores uespedes e confesor de Magali… Pero ye Lino Lacalle, parella de Magali e clién d’a fonda refeito en aguacil que talló con a tradizión familiar e rechiró un esbenidero en atra ziudá, qui mete á Magali en os roldes culturals de Uesca. Toz, de bella traza, son importans pa desembolicar o camín de Magali dica o rolde de Ramín Acín, Concha Monrás, Tomás Seral, Ricardo Compairé u, en zagueras, Margarita Xirgu. 

No se mete guaire ficazio en o drama presonal de Magali con a suya mai biolochica, Tresa, que treballaba en a mesma fonda que a protagonista. Pero ro feito de que estase conzebita por diners cuan dos ombres ofren por Tresa perras guallardas á Chusé e Carmen e l’arrepentimiento de dimpués d’istos fendo-se cargo d’as dos (mai e filla), mos aduya á replecar as rilazións entre els u dende dó se chesta ra suya identidá. 

O día d’o Estreno son Lino e Magali os que chuntos, dimpués d’a respresentazión d’a obra, se’n ban á presientar almirazión á os camerinos de Margarita Xirgu. Astí ye do de traza cuasi fortuita prenzipian una rilazión zercana con l’artista e Miquel Ortín, representán d’a compañía. Dende ixe inte dica que a compañía dixa ra ziudá son as confesións (más que más entre as dos), as rilazións e desemboliques d’istas, os autos e tamién os entreautos u o reflexo d’a Debanguerra Zebil española, os que encuadran e dirixen una obra que, precisamén, mete ficazio en os chiquez feitos que se producen en a Istoria. 

Ana Giménez Betrán mos amostra con mayestría de qué traza se troban os dos mundos: o de una artista amanata, como poderba estar Margarita Xirgu, difuera de ixe mundo artistico; e o de esferéns personaches planos, como Magali u Lino, con cualidaz pa dentrar en un mundo artistico reibindicato por o pensamiento cretico. 

Ye una obra feminista, con conbersas tan autuals como: 

“-Si Dios no ha quiesto dar-me fillos, tendré que aconortar-me, ¿no?, e no me pa que ixo sinifique que no pueda lebar una bida goyosa. 

 -Si os tiempos acompañan, me pienso que plegará bel día en o que as mullers dezidan si tener u no pas tener fillos, e ixo no menoscabará en asoluto a suya condizión.

 -Dizes bien, Magali, as mullers son clamatas á luitar por o suyo puesto en a soziedá, pero a maternidá siempre será una elezión presonal que d’una u atra traza les influyirá en o esbenidero…”

Ista conbersa entre Margarita Xirgu e Magali (pach. 49) mos amostra una reyalidá tan neta que cuasi da tremolins, mesmo uei día.

Entreautos amostra muito bien o cambeo cultural e politico que se yera chestando en España ta par d'alabez, estando abundáns as conchuntas (encara legals) e os autos culturals en ixa Uesca de 1932. Encara más, tenendo feguras como Ramón Acín, achitador e libre pensador por naturaleza. Tot iste cambeo en a mena de beyer á España se reflexa no solamén de par de tota ra obra, sino tamién en os propios dialogos entre artistas que se amostran, más que más, en os Asayos. Por exemplo, o que trobamos en a sobremesa d’a zena de zelebrazión que se reyaliza en o Restaurán Flor dimpués á una esposizión que Ramón Acín reyalizó en o Casino de Uesca (pach. 30). Á ista zena o mesmo artista eba churato ir-ne no más ta o café (como George Orwell churó añadas más tardi, difuera d’a obra, en a esfensa de Uesca d’o ataque faxista en a Guerra Zebil): 

“-Comparto con tu ixa preocupación, ya emos charrato bella bez, bibimos tiempos nuevos, tiempos que mos reclaman furamén un ombre nuebo, libre e intelichén, probisto de solidaridá con os atros sin nezesidá de resortes ni recompiensas en o más allá.” 

Son tiempos en os que a caridá daba paso á ra solidaridá e ye do Magali, presén en toz istos autos, se farta d’o pensamiento libre e se torna una muller fortal, independién e zereña. Isto ye importán, pus ye Magali a que más concara un cambeo de personache, prenzipiando como “simpla” mesacha de probinzia dica estar un personache con pensamiento propio e cretico en l’altaria de Margarita Xirgu.

Ana Giménez Betrán mos ubre a puerta t’o pensamiento cretico dende o prenzipio d’a obra e lo manulla e forma dica ra rematadura d’a mesma. Asinas, entre arquetipos politicos, mos fica en ideyals más amanatos e umanos como están os d’a amistanza, maternidá, feminismo, o treballo u as rilazions amorosas. Anque ye berdá que bels d’istos ideyals poderban estar rilazionatos con ideyals politicos, a taute adube á dar-lis un aire cordial más que más con charradas intimas do ro importán ye a presona.

En cuanto á o manullo d’o espazió, a taute no dixa de meter detalles t’amostrar e definir as carreras, as botigas, os edifizios… Anque tanimientres tota ra obra mos define os no guaires espazios do trancorre (fonda, Casino, Restaurán Flor, teyatro Olimpia…), o berdaderamén importán ye a polideza e prezisión con a que a taute mos describe as carreras de Uesca. Ye ya en Telón do, aprobeitando unas crompas e a zercana salida de Margarita Zirgu, Magali li amostra ras carreras e as botigas de Uesca que, estando un día normal, parixen que están pinchas ta que á Margarita u á o leutor lis faigan goyo (pach. 69): 

“Os güellos de Margarita retaculoron ent’a frontera d’un edifizio en o canto d’a mesma plaza d’a Moneda, en a carrera Periglos, una casa rezién construyita con un empaque singular, con bel aire de modernidá aconseguito merzé á un friso con losetas de zeramica que reculliban escenas de capezutos chugando á o corro. Resultaba curiosa mezcla a d’os ladriellos royos e os capezutos policromatos d’as recholas.” 

Soi conbenzito de que qui aiga esnabesato ixa carrera de Uesca, encara á día de uei, abrá tenito a mesma sensazión que en o libro ha tenito Margarita. 

No solo s’esplaya con as descrizións d’as carreras, sino tamién d’os espazios zarratos, como ro de Ultramarinos La Confianza, alfaya oszense e nazional. A encargata de dar-li toz os detalles á Margarita ye Magali, que se desembolica perfeutamén en trato e definizión d’as obras pictoricas d’o sieglo XIX como as que León Abadías pintó en dito establimiento. Clama o ficazio ro cambeo que en ha ito reyalizando ro personache Magali dica plegar aquí, do a soltura e l’aire saputo que ha ito recullindo la fan manullar-se con maña en situazións como ista. 

Temporalmén a obra discorre sin de esparpallazos, dixando fluyir os feitos dende una embista cutiana con un trango zertero d’o tiempo. Dende o primer inte mos fa sospeitar que a obra puede rematar en un inte concreto (a salida de Xirgu d’a ziudá), pero Ana Giménez Betrán no mos aprezisa ra leutura aguardando dito auto, sino que mos la fa goyar con un ritmo cutio e monioso. 

Como emos dito antis, a obra alquire un zillo de obra teyatral en sí mesma en o manullo d’o tiempo. Trestallata en 4 capetulos, mos fa una introduzión en su Asayos. Ye astí do a taute mos amostra ras ferramientas (personaches, pesonalidaz, rilazións, redolada…) con as que se fa e mos se albierte de un gran Estreno. En iste segundo capetulo ye do, fendo alcordanza á o estreno reyal de una obra teyatral, aparixen “os grans protagonistas” u do se cheneran os autos prenzipals d’a obra. Ye ya en Telón do se cullen os trunfos d’o estreno e do se festella o reyalmén surtito en o Estreno, que no ya atra cosa que l’amistanza zercana e sinzera entre Magali, Margarita, Lino e Miquel. Tanto ye asinas que Telón remata con una zena de chirmanamiento do os dos mundos que á o prenzipio podesen parixer luens s’achuntan entre poesías u collages ta dar paso á una Addenda en a cuala podemos alcontrar esferéns imachens ampratas por a Fundación Ramón y Katia Acín. Ya en iste zaguer capetulo podemos goyar de imachens reyals d’a epoca acompañatas de testos d’a obra en os que beyemos dende do surten as ideyas d’a taute ta meter-las en una obra fictizia. Mos aduya á meternos en contesto, pero ro reyalmén intresán ye poder beyer de qué traza Ana Giménez Betrán consigue tanto con tan poco, pues dixa fluyir a suya mayestría literaria dende a embista de un recontador omniscién con os chicorróns autos istoricos como alazez. 

E ye que a Istoria no la escriben as grans guerras, sino as presonas chiquetas.

Rubén Clavería Luna, Bombolón Borinero