CATAROS: OS BLOSOS. (I)

 

O catarismo estió un camal d’o cristianismo que s’estendilló por o sur de Franzia entre os sieglos  XI-XIV.

S’ alazetaba en una conzenzión esistenzial dualista con dos prenzipios antagonicos : o  bien e o mal. Teneba pues una ideya maniqueya d´a reyalidá. Seguntes ixa dotrina, Dios no eba  puesto creyar o mal que bi ha tan fundamén arradigato en as presonas e o mundo, por o que  eba tenito que entrebenir tamién o diaple en a mesma creyazión. Profes que ixa traza de prexinar  mos aparixe uei estrafalaria e pasata de moda pero, si paramos cuenta d’a istoria ixo de bien mal, buenos-malos, amanixe á ormino. Nomás cal remerar as zintas de l´ueste americanas: indios  malos, baquers buenos. 

Cataros ye un bocable que promana d’ a luenga griega e que sinifica blosos, “puros”, como  esprisión de que no quereban contaminar-se con o mal. Tendeban a lebar una esistenzia treballadera como texidors u en cualsiquier atra faina. Os suyos bispes no feban parti d’o  tarabidato feudal de poder que a Ilesia catolica refirmaba en ixas embueltas , o que contribuíba  a que l’ orden establito lis tenese firme quimera. No almitiban más que un sacramento que  clamaban consolamentum. Bi eba dos libels d’embrecamiento en a suya prautica relichiosa: os  creyens normals e os perfeutos. Istos zagueros no se casaban ni teneban relazions secsuals, por  que no quereban contribuyir a trayer más fillos ta iste mundo, reino d’o mal. Como tampó no  minchaban carne d’animals. Por tot ixo, como ye de dar, a Ilesia de Roma los teneba por ereches.  Dica o punto que o papa Inozenzio III los escomulgó á ers e asinas mesmo a qui les protexese,  más que más a nobleza oczitana, que gosaba fer-lo. Por primera begata en a istoria, o debandito papa de Roma pedricó una cruzata cuentra cristianos, tanimientres que as d’antismás yeran  estatas dirichitas cuentra musulmans. Ixo incluyiba a perduga por confiscazión d´as posesions d’os ereches e de qui lis aduyase. Antimás se legalizaba o dreito de conquista d’o Midi franzés  por parti d´os cruzatos d´o norte de Franzia, que á o mando de Simon de Monfort emburzoron  as tierras oczitanas ta apoderar-sen d’ eras.  

O feito teneba unas implicazions puliticas importans: os estaus d´o Midi franzés, cuala alfaya yera  o Condau de Tolosa, yeran religatos por fundas relazions feudals con a Corona d´Aragón , como  se beyerá en o siguién capitol. Yeran estaus alueñatos d’o norte franzés e con una presonalidá  bien zereña: cal remerar que a luenga d´o Midi yera l´oczitano (langue d’oc), no pas o franzés  (langue d’oïl), e que a cultura d´os trobadors con a suya poesía antimás d’as suyas organizazions  puliticas como os “capitols” los esferenziaban plateramén d´a resta de Franzia. 

Crueldaz, en ista cruzada cuentra os cataros como en totas as guerras, bi’n abió á embute e por  os dos costatos: a istoria reyal no casa con o maniqueísmo de buenos e malos, encara que o relato que dimpués se gosa fer, por un regular, sí. Bi’n abió de barbaridaz á rebutir, d’as que  belunas han permanexito en a memoria coleutiba. En as coronicas se reconta como en Béziers  os cruzatos matoron a cataros chunto con catolicos que no quereban denunziar-los. Regular que  o legato d’o papa dizió: amortaz-los toz, Dios reconoxerá á ros d’el! En Brahm les rancoron os dos  güellos a toz menos á uno que nomás l’en quitoron uno, ta que asinas, burnio, los guiase t’atro  lugar ta bi orrorizar-los. En fogueras en cremoron asabelos de cataros: os zaguers en a gran chera  d’o suyo zaguer refuchio d’o castiello de Montsegur, an un molimento encara remera uei “als  catars, als martirs del pur amor crestian”. Una contrimuestra más de que os etiquetatos como  malos asobén son masacratos por os autoconsideratos como buenos. Ye que, en ista como en  cuasi totas as ocasions istoricas, tanimientres que ta es uns os malos son es atros, ta es atros os  malos son es uns. Guerras: catafila de mortaleras e calamidaz, igual tiene que sigan guerras antigas como ista u autuals como as de Ucrania u Gaza”. Istoria: mayestra d’a bida á ra que  tozolonamén no li s’en ha feito ni li s’en fa brenca de causo. E asinas continamos.

Antiparti, con a enchaquia d’o catarismo e d’a cruzata que se desembolicó, como si no bi’n ese prou, o papa establió a Inquisizión. O suyo ochetibo yera engalzar á os ereches cataros, faina d’a  que fazió tautes á os flaires dominicos. Dende allora a Inquisizión s’ emplegó muitos sieglos ta  rechirar e acotolar cualsiquier mena d’ereches esbarratos d’a ortodocsia u chens que tenesen  unatra relichión: chodigos, moros, protestans, broxas e mesmo bel santo u santa, que de tot bi’n  abió. 

Febrero, 2024. BOMBOLÓN BUXO