O día 28 de chunio de 2023, con a enchaquia d´a rematadura d´o DEFA 2022-2023, se fazió una conferencia machistral en a cambra de chuntas d´a Facultat de Cencias Humanas e d´a Educación d´o Campus de Uesca d´a Universidat de Zaragoza.
Se bi presientó a publicación que sopre Razón feyta d´amor, poema aragonés d´a primera metat d´o sieglo XIII, s´ha feito en “Aladrada ediciones” con estudio, edición e notas de Chesús Bernal e Francho Nagore, e con a colaboración d´a catedra Johan Ferrández d´Heredia.
Iris Orosia Campos directora d´o DEFA enzetó l´acto siñalando a suya bastida. Intervinioron Carlos Serrano, por “Aladrada ediciones” e Paz Ríos, qui presientó á ro conferenciant Francho Nagore acobaltando-ie e cuaternando-ie a suya variata producción poetica en aragonés.
Como caleba, se fació una remeranza emocionata de Chesús Bernal, coautor d´o libro, que mos dixó en 2019, aprecisando que a primera presientación d´o libro s´heba feito en Valtorres, o suyo lugar de naximiento, en merexito homenache á iste ilustre aragonés.
Francho Nagore, en fluyito aragonés e con refirme audiovisual, fue esgranando os diferents aspeutos rilacionatos con o poema ocheto d´estudio:
- O tetulo, d´o que se gosa tallar a parola “feyta”, que ye precisamente a marca d´a suya identidat en luenga aragonesa.
- O manuscrito e a cronolochía d´a composición, en primeras d´o sieglo treceno.
- L´autor, Lope de Moros, d´a localidat d´ixe nombre situata en a comarca de Calatayud, amán d´a buega con Castilla, por o que a luenga d´o poema ye l´aragonés, con muitos rasgos castellanos, d´as serranías ibericas.
- As esferents edicions que s´han feito d´o poema por atros muitos autors que s´interesoron chustificadament por o que ye una d´as primeras contrimuestras d´a lirica peninsular
- O tema e a estructura d´a composición: que en a primera parti ye una trovada amorosa e que, dimpués d´una chuntura, cambea en a segunda ta una rufierta entre l´augua e o vino.
- O esquema d´a obra: introducción, historia, chuntura, debate e rematadura, esplanicando Nagore istas custions e chustificando a suya opinión de que no son dos poemas en uno sino nomás uno.
- Os aspeutos literarios, tanto en o que pertoca a custions formals como en l´analis d’as influyencias d´a trovadoresca oczitana, gallegoportuguesa e goliardesca.
- A simbolochía e l´alegoría amagatas en a obra, como gosa acontexer en a literatura meyebal.
- As custions lingüisticas : dialeuto iberorromanico con elementos lingüisticos aragoneses en a suya mayoría, antiparti d´atros galaicoportugueses e oczitanos debitos istos á ro influxo d´a luenga literaria en ixas embueltas. En o que pertoca á ros rasgos aragoneses siñaló detalladament tanto os de mena fonetica, como morfolochica e lexica que chustifican e refirman a suya adscripción aragonesa. Asinasmesmo, s´aturó en os terminos que poderban fer dandaliar entre una atribución aragonesa, castellana u gallega, fendo al paso en ixe analís detallato. una referencia á ras caracteristicas d´a scripta meyebal aragonesa.
- A conclusión: Razón feyta d´amor ye un poema escrito en l´aragonés propio d´as serranías ibericas d´o sieglo treceno, reflexando ra luenga d´o poeta taute: Lope de Moros.
En rematar a conferencia machistral de Francho Nagore que estió muito aplaudita, a organización ufrió un chiquet socalce que premitió fer una charradeta entre toz os asistents.
Antiparti, dende “Bomboloniar” agradexemos asabelo as amables parolas d´a doctora Campos Bandrés adedicatas ta o nuestro blog e a suya colla de blogueros naxita d´entre os escolanos d´o DEFA 2021-2022. Un grupet inicial que afortunadament se ye enamplato agora con atras alportacions personals de firme valura e que contina ubierto t´atras colaboracions que vaigan fendo cada vegata un “bomboloneyo” més fortal.
30 de chunio de 2023
BOMBOLÓN BUIXO
No hay comentarios:
Publicar un comentario