REBISTA 1 CHINERO

BOMBOLONIAR 1 - CHINERO

PRESENTAZIÓN

"Ordio,bombolón y ababol", imachen  de Vanesa Olivar

Cuala estió a mia sorpresa que rechirando por os retes ta replecar informazión de Bombolón, a primera azezión que surte ye de como claman en Benezuela á una piedra gran. Aquí grans ya son, en conparanza con as abellas… ¡pero imos! ¡¡Si que son grans os bombolons en Benezuela!! Con o que si mos aturamos á prexinar, ¿qué feran en Benezuela ta Bomboloniar?

Seguntes Rafel Bidaller en Fendo l’onso. Asayos de antropolochia zoolochica, Editorial Comarca Alto Gállego, 2017, Bombolón: “ye una denominazión que abarca muitas espezies linneanas de cucos, por un regular imenopters –a familia d’as abellas, a biespras e os bombolons– pero tamién lepidopters –palometas e paxarelas– u d’otras collas como os coleopters. O prototipo d’ista familia ye un inseuto d’o chenero Bombus e parellanos, una mena d’abella rezia e zerruda.”

Bomboloniar tiene muitas definizions: mormostiar, roñar, romanziar, meter baqueta, dar ferrete, morgoniar, candaniar, dondiar, esbolastriar, rebolotiar…

Partindo d’ista definizión e fendo una comparanza con toz os que femos Bomboloniar, no pue’estar más azertata. Cadagun/a de nusatr@s semos d’un puesto esferen, con as nuestras basemias, particularidaz, zereños. Con as mesmas ganas de dar ferrete ta que se nos sienta arredol d’o mundo, treballando ta empreñar l’aragonés como empreñan os bombolons as flors cuan esparden o suyo polen.

Meter-lo en balura á ro mesmo ras que as demás luengas.

Con ista fin e con muitos atros… ye naxito BOMBOLONIAR.