O BANQUER DE YEBA

Trescruzando a portalada e branquillera de casa mía, se dentra en o patio. Á ra man dreita se bi troba un banquer de fusta. Ye un mueble senzillo sin gota de filigranas que, en a suya corada, alza una istoria, parellana á muitas atras, d’ o bino d’ o Semontano.

Si tos bi asentaz en o banquer e le’ en demandaz, tos recontará de buen implaz que dende a edá meya, os montañeses baxaban t´o Semontano ta puyar-se-ne dimpués cara t’ arriba con os boticos bien plens de bino. Ye que en ixas montañas no se criaba güaire bien. Ta ers, igual como ta toz, o bino feba parti prenzipal d’ a birolla e tamién d’ a fiesta. Por ixo, o escamallo de baxar e tornar a puyar carriando bino con as caballerías lo’ n baleba de beras.

Tos ferá memoria de cómo, malas que s’ eba encubau e tresmudau, o bino ya yera asperando que benisen os que más aprezio le feban: os montañeses. En chornadas de muitas oras petenaban con os baxes por sarratons e ballonadas dica plegar ta ra tierra semontanesa. Trayeban queso, zezina, carne salada e atros produtos. Una begata, os de Yeba/Yaba que beniban a escar bino ta casa nuestra, que tamién sapeban de fusters, baxoron con o banquer, que atura astí ta cutio.

Tos alsegurará que en o Semontano, as zepas se criaban asaber que bien. Tos dizirá cómo se bendemaba con os trinchez, cómo se carriaban en os cobanos, cómo se pisaban as ugas en os cubos, cómo s ‘emburaban as brisas (que componeban barrazas e borfollos), cómo se trescolaba o mosto fermentato t’ o laco, c’omo s´encubaba, se tresmudaba … dica que espirallando, punchando por o zurred u canilla surtiba ixe bino choben, con a ulor fragán, con a color brioleta e a sapia afruitata. O bino que amenistaban e deseyaban.

L’ ascuitarez dizir que en puyar t’ a montaña o bino ganaba asabelo e se feba más fortal. Bi acompañaba as botas e alforchas d´o treballo en o món, as chentas cutianas, as beilatas en nueis de nieu arredol d’ o fogaril, os ponchos caliens en o ibierno, as fiestas e zelebrazions , e se consagraba en as misas. Se’ n bebeba de bino, e mesmo se’ n “minchaba” con o pan remullau : o “pan con bino” d’ as brendas infantils.

Tos ferá alcordanza de que encara que en zagueras d’ o sieglo dezinueu s’ establió en Balbastro a casa Lalanne que dimanaba de Burdeus, con teunicas bitibinicolas franzesas, o comerzio d’ o bino continó igual como dende feba sieglos dica que plegoron as añadas sisanta d’ o sieglo benteno. Allora a espoblazión, a industrializazión, e o cambio sozial cluxioron a soziedá tradizional e o suyo comerzio d’ o bino semontanés. As tararainas s’ apoderón d’ as bodegas e as cubas de muitos nietros en as que bi cabeba una persona ya no se tornón á emplir. As zepas d’ os biñeros se rancoron amonico: solo se criaba bino ta o consumo de cada casa, ya no se’ n bendeba pon. Nomás aturaban que os tonels rituals, ixos que cuan naxeba un ninón s’ empliban de bino ta beber-ne cuan fese a primera comunión e que a “madre” u solera dimpués se feba biella, á begata de zien añadas u más. Allora o bino ya no yera tinto : a suya color se tornaba ambarina e trasparén e a suya sapia se feba “ranzia”. Yera o bino espezial d’ as zelebrazions: fiestas, rondas, misas.

O nuestro banquer s’ enfuelga de que, bien se bale, en as añadas ueitanta d’ o sieglo benteno, as bodegas modernas coneutoron con a tradizión e s’ establioron por dezenas en o Semontano adautándose á os nuebos tiempos e teunicas bitibinicolas. Asinas podemos espleitar güei d’os binos con denominazión d’orichen protechita Semontano. E ye d’ acobaltar que ne b’ ha beluns con nombre en aragonés : “mingua”, “glarima”, etc.

Tot ixo e muito más l’ en podrez ascuitar á escuchez á un banquer que s’ alcuerda igual de bien como yo de que a zaguer begata que os de Yeba baxoron á escar bino, fa más de 60 añadas, yo estié con ers, en salir d’ a escuela, minchando zezina montañesa en a bodega de casa tía Laura (casa Isarre). E tamién de que os de casa nuestra en tardemos unatra zincuentena d’ años en tornar a besita ta ra familia de Yeba. Pero que á ra fin bi puyemos e que encara pudiemos gustar o bino d’os biellos tonels d’ a casa montañesa d’ a que beniban ta casa nuestra a mercar-ne. Ixe día entre meyo d’ as montañas pirinencas zarremos un zerclo de sieglos. Un binclo inxuplidable d’ o que o banquer de Yeba ye e será perén testigo. Preguntar-li-ne si no, en una nuei d’ ibierno, arredol d’ o fogaril.

BOMBOLÓN BUXO

OTUBRE 2023